Tribinal distri Pojaski, nan tèritwa Primorye, gen pou l fè konnen desizyon li pran nan ka ki konsène frè Yuriy Belosludtsev ak frè Sergey Sergeyev. a Yo ka kondane yo chak pou yo pase plis pase 12 an nan prizon.

Yuriy Belosludtsev

• Dat ak kote li fèt: 1964 (Smidovich, Rejyon otonòm juif).

• Byografi: Li te grandi ak granmè l nan yon ti vilaj. Li te travay kòm enjenyè nan yon konpayi ki bay kouran. Li renmen fè lapèch ak fè ski.

  Li te marye ak Yelena an 1985. Yo toule de te sezi wè pwomès Bondye fè pou l elimine mechanste ak soufrans. Yo te ret bouch ouvè lè yo wè jan pwofesi ki nan Bib la ap akonpli. Verite sa yo te pouse yo aksepte yon etid Labib. Yo te batize an 1994.

Sergey Sergeyev

• Dat ak kote li fèt: 1955 (Dikovnitskoye, rejyon Saratòv).

• Byografi: Li te travay nan yon min chabon jiskaske li pran retrèt li. Li te marye ak Nelly nan ane 1991. Yo gen de pitit fi ak yon pitit gason. Yo toule de renmen chen anpil.

  Yo te kòmanse etidye Labib yon ti tan apre yo fin marye. Yo te sezi wè jan pwofesi ki nan Bib la egzak e jan konsèy ki nan Bib la itil. Yo te batize an 1996.

Nan dat 17 mas 2019, ofisye nan Sèvis sekirite federal la (FSB) te fouye anpil kay nan Lichegòrsk, nan tèritwa Primorye. Yo te poze frè ak sè yo kesyon, e genyen yo te pran anviwon setèdtan pou yo fè sa. Yo te kenbe Yuriy ak Sergey nan prizon.

Apre de jou, yo te voye toule de frè yo nan yo sant kote yo kenbe moun nan prizon anvan yo jije yo. Yo te pase plis pase sis mwa kote sa a. Nan mwa septanm 2019, yo te lage yo, men, yo pa t ka kite kay yo. Yo te pase anviwon senk mwa konsa.

Yo toude rann yo kont lapriyè vrèman ede yo andire kondisyon ki te nan sant kote yo te ye anvan an. Sergey di yon lòt bagay ki ede yo gen yon atitid ki pozitif se Labib. Li di: “Mwen sonje pawòl Jezi te di yo: ‘Si yo pèsekite m, y ap pèsekite nou tou.’ (Jan 15:20). Men sa m di tèt mwen: ‘Waw! Tout sa k rive nou yo te rive Jezi Kris, disip li yo ak apot yo. Sandout, Jewova kwè mwen ka bay yon bon temwayaj nan sitiyasyon m ye a.’ Panse sa yo ak repons priyè m yo ban m fòs e yo ede m kenbe jwa m epi rete kalm.”

Yuriy fè konnen anvan sa li t ap goumen pou l li Bib la chak jou. Yon lòt frè te ede l pwogrese nan domèn nan. Pandan Yuriy te nan prizon, se lekti Labib li konn fè ki te ede l. Li di: “Mwen te sonje egzanp mwen te etidye ki soti nan Bib la ak nan piblikasyon yo. Sa te ban m fòs e sa te ede m kenbe jwa m. Epitou, sa te ede m pou m pa enkyete m depase limit.”

N ap priye Jewova e nou gen konfyans l ap kontinye yon “refij [ak yon] fòs” pou frè ak sè nou yo nan peyi Larisi “nan moman difisil” yo ye. — Sòm 46:1.