Tribinal vil Bikinski, nan tèritwa Kabarovsk, gen pou l fè konnen desizyon li pran nan ka ki konsène frè Sergey Kazakov. Komisè a poko di ki santans li ta renmen yo bay.

1. 9 novanm 2020

   Yo te ouvri yon dosye kriminèl sou do l e yo akize l kòm moun k ap òganize aktivite ki ekstremis.

2. 21 desanm 2020

   Gen manm komite envestigasyon ak ofisye FSB ki fouye 10 kay, san wete kay frè Sergey. Yo te arete l e yo te mete l nan detansyon pwovizwa.

3. 23 desanm 2020

   Yo voye l nan prizon annatandan yo jije l.

4. 4 jen 2021

   Yo lage l, yo voye l lakay li e yo entèdi l kite kay la.

5. 5 out 2021

   Yo pèmèt li kite kay li.

6. 28 fevriye 2022

   Pwosè a kòmanse. Te gen yon reyinyon ki fèt anvan jijman an e jij la te voye dosye a tounen nan biwo komisè a akoz yon erè biwo komisè a te fè nan demach yo.

7. 28 avril 2022

   Jij la chanje desizyon pou voye dosye a tounen al jwenn komisè a, e li mande pou premye tribinal la rekòmanse pwosè a.

8. 14 jen 2022

   Pwosè a rekòmanse.

Toutpandan frè Sergey kontinye ap demontre li gen lafwa nan Jewova, nou met ansanm avè l pou n di pawòl nou jwenn nan Sòm 31:14 yo: “Mwen gen konfyans nan ou, o Jewova. Mwen di: ‘Se ou menm ki Bondye m.’”