Apre 447 jou frè Dmitriy Barmakin te fè nan detansyon prevantif, yo te voye l tounen lakay li 18 oktòb 2019, kote l t ap rete kòm prizonye. Li te kapab retounen jwenn madanm li, Yelena. Sa fè 13 an depi yo marye.

Yo te arete frè Barmakin 28 jiyè 2018. Lè sa a yon seri polisye ak zam, ak kagoul te antre nan kay grann madanm li, yon granmoun 90 an, pandan li t ap vizite l. Yo te akize frè Barmakin poutèt li te patisipe nan reyinyon Temwen Jewova yo fè. Tribinal distri Pervorechenski, nan Vladivostok, te bay lòd pou yo mete frè Dmitriy Barmakin nan detansyon prevantif pou de mwa. Apre sa, tribinal la te vin ajoute sou kantite tan an uit fwa.

Pandan youn nan lè yo t ap gen pou yo deside pou yo mete sou kantite tan l ap fè nan detansyon prevantif la, tribinal la te di adorasyon frè Barmakin ap fè nan lapè a, se yon “krim kont lòd konstisyonèl la e kont sekirite leta”. Fo akizasyon sa a depaman nèt ak sa ki di byen klè nan atik 28 konstitisyon Larisi a. Atik la fè konnen tout moun “gen dwa chwazi yon relijyon, yo gen dwa fè lòt moun konnen kwayans yo e yo gen dwa aji selon kwayans yo”.

Nou kontan dèske jij Stanislav Salnikov ki nan tribinal distri Pervorechenski, nan Vladivostok, te bay lòd pou yo lage frè Barmakin sot nan prizon, byenke yo pa retire akizasyon ki sou do l yo.

Nou gen konfyans Jewova ap kontinye bay frè ak sè nan Larisi yo fòs ak kouraj, sitou sila yo ki nan prizon, kit se nan prizon leta kit se lakay yo. Frè sa yo, tankou frè Barmakin, se bèl egzanp pou tout frè ak sè yo nan lemonnantye, egzanp moun ki gen kouraj ak lafwa. — Filipyen 1:13, 14.