Ane 2023 a fè 75 an depi Temwen Jewova yo ap tradui piblikasyon ki baze sou Bib la nan lang singalè, lang moun plis pale nan peyi Srilanka.

Se ann anglè sèlman piblikasyon nou yo te parèt nan Srilanka okòmansman, paske anglè se lang ofisyèl peyi a depi epòk Angletè te kolonize yo. Men, an 1948, nou te pibliye premye piblikasyon nan lang singalè, se te bwochi La joie pour tous les hommes. Lè bwochi a te parèt te gen 12 pwoklamatè nan Srilanka, ennan apre, te vin gen 25 pwoklamatè. Sa se plis pase de fwa kantite a ki te vin ogmante.

An 1953, yo te pibliye bwochi Raisons de croire en un monde nouveau ak liv La vérité vous affranchira nan lang singalè. Kèk ane annapre, nan mwa mas 1958, grasa efò frè yo, nou te franchi yon gwo etap nan travay tradiksyon an lè nou te pibliye premye Toudegad nan lang singalè.

Nou te franchi pi gwo etap nan travay tradiksyon nan lang singalè an 2009. Ane sa a, frè Stephen Lett, yon manm Kolèj santral la, te vin Srilanka e l te anonse Labib — Tradiksyon monn nouvo a parèt nan lang singalè.

Men sa youn nan frè ki te la lè Bib la te parèt la di: “Lè yo te ban m Tradiksyon monn nouvo a nan lang singalè, m te santi m gen Jewova, Gran Pwofesè nou an, anpil rekonesans. Tradiksyon sa a fasil pou moun li e pou moun konprann li, sa fè l fasil pou m wè ki jan pou m aplike sa m li a nan lavi m.”

Gen 7 121 pwoklamatè nan Srilanka e 4 839 ladan yo fè pati 63 kongregasyon ki pale singalè. Li klè, Jewova beni yo e nou konnen l ap kontinye beni yo nan efò y ap fè pou yo pale e pou yo anseye lòt moun “lang ki pwòp” la — Sofoni 3:9.