Men sa Lik, yon ekriven ki ekri nan Bib la di sou pati istwa li rakonte sou lavi Jezi a: “Mwen te chèche konnen tout bagay avèk presizyon depi nan kòmansman.” — Lik 1:3.

 Gen kèk moun ki di istwa lavi Jezi yo rakonte nan Evanjil yo, sa kèk moun ki t ap viv nan menm epòk avè l te ekri yo, sa vle di Matye, Mak, Lik ak Jan, se istwa yo te chanje ozanviwon 4^yèm syèk la.

 Sepandan, yo te jwenn yon pati enpòtan anpil nan Evanjil Jan an nan Ejip nan okòmansman 20^yèm syèk la. Se li yo rele kounye a Papyrus Rylands 457 (P⁵²) yo konsève l nan yon bibliyotèk, ki nan vil Mannchestè nan peyi Angletè. E se ladan l li genyen pati yo mete pou Jan 18:31-33, 37, 38 nan kèk tradiksyon Bib ki gen jodi a.

 Se maniskri sa a ki la pi lontan nan tout maniskri ki gen Liv ki te ekri an grèk yo ki egziste jodi a. Anpil espesyalis kwè yo te ekri l ozanviwon ane 125 epòk nou an, sa vle di sèlman 25 an konsa apre yo te fin ekri Evanjil orijinal la. Pawòl ki nan maniskri sa a prèske egzakteman menm bagay ak pawòl ki nan lòt maniskri yo vin jwenn annapre yo.