Wi, li konn chanje lide, nan sans li konn chanje fason l konsidere moun lè yo menm yo chanje fason yo aji. Pa egzanp, lè Bondye te voye yon mesaj jijman pou pèp Izrayèl tan lontan an, men sa l te di: “Petèt y ap koute w, y ap kase tèt tounen kite move chemen yo te pran an e m ap chanje lide konsènan malè mwen te prevwa lage sou yo akoz move bagay y ap fè yo.” — Jeremi 26:3.

 Gen anpil tradiksyon Labib ki di Bondye te “regrèt” kalamite li gen entansyon lage sou yo a, sa ki ka fè moun konprann Bondye te fè yon erè. Men, mo ebre yo te mete a ka vle di “chanje lide oswa chanje entansyon”. Men sa yon biblis ekri: “Lè yon moun chanje fason l aji sa fè Bondye chanje sa l te gen entansyon fè a.”

 Natirèlman, se pa paske Bondye kapab chanje lide ki fè l oblije chanje lide. Ann pran kèk sitiyasyon kote Bib la fè konnen Bondye pa t chanje lide:

•   Bondye pa t kite Balak fè L chanje lide pou L modi nasyon Izrayèl la. — Nonb 23:18-20.

•   Lè Sayil, wa Izrayèl la, te vin anrasinen nan fè sa ki mal, Bondye te rejte l antanke wa e L pa t chanje lide. — 1 Samyèl 15:28, 29.

•   Bondye pwomèt l ap fè Pitit Gason l lan prèt pou toutan, e l ap reyalize pwomès sa a. Li pap chanje lide. — Sòm 110:4.

 Wi, Labib fè konnen Bondye di: “Mwen se Jewova. Mwen pa chanje.” ​(Malachi 3:6). Menm jan an tou, Bib la di Bondye “pa chanje, kontrèman ak lonbray k ap chanje pozisyon”. (Jak 1:17.) Men, sa pa depaman ak sa Bib la di konsènan Bondye ki chanje lide. Lè yo di Bondye pa chanje, sa vle di pèsonalite l ansanm ak prensip lanmou ak jistis li genyen yo pa janm chanje (Detewonòm 32:4; 1 Jan 4:8). Poutan, li ka bay de lòd ki diferan nan de moman diferan pou menm sitiyasyon an. Pa egzanp, lè wa David te gen pou l al nan yon batay, Bondye te ba l yon lòd alòske yon lòt fwa, nan menm sitiyasyon an, Bondye te ba l yon lòd ki diferan. Men, toule de metòd yo te mache. — 2 Samyèl 5:18-25.

 Non, byenke li regrèt dèske pifò moun pa enterese nan li oswa yo rejte l. Men sa Bib la di pou l pale de kondisyon ki te genyen anvan Delij nan epòk Noye a: “Jewova te regrèt li te fè lèzòm met sou tè a, e li te tris.” ​(Jenèz 6:6). Nan vèsè sa a, mo “regrèt” la soti nan yon mo ebre ki vle di “chanje lide”. Bondye te chanje lide anrapò ak pifò moun ki t ap viv anvan Delij la paske yo te vin mechan (Jenèz 6:5, 11). Menmsi l te tris paske yo te chwazi fè sa k pa bon, li pa t chanje fason l te konsidere lèzòm an jeneral. Dayè, li te pèmèt gen moun ki chape nan Delij la lè l te sove Noye ak fanmi l. — Jenèz 8:21; 2 Pyè 2:5, 9.