Li chita atè a, tout kò l chaje ak yon seri gwo bouton k ap fè l mal anpil, soti nan po tèt li rive nan pye l. Eseye imajine tèt li ki bese, li koube kò l, li chita poukont li e li prèske pa gen fòs pou l pouse mouch k ap vole toutotou l. Li chita nan mitan sann dife pou l montre jan l tris, e sèl sa l ka fè, se grate kò l ak yon moso veso ann ajil. Pou jan yo te respekte mesye sa a, men kounye a, se meprize yo meprize l! Tout zanmi l te genyen yo, vwazen l ak fanmi l vire do ba li. Tout moun, menm timoun piti t ap pase l nan rizib. Li te menm panse Jewova, Bondye l la, te vire kont li tou, men se pa t sa vre. — Jòb 2:8; 19:18, 22.

 Moun sa a se Jòb. Men sa Bondye te di de Jòb: “Pa gen pèsonn tankou l sou tè a.” ​(Jòb 1:8). Plizyè syèk annapre, Jewova te toujou konsidere Jòb pami moun ki pi jis ki te viv sou tè a. — Ezekyèl 14:14, 20.

 Èske sa rive w deja kote bagay yo vin rèd pou ou e ou menm pèdi tout sa w te posede? Istwa Jòb la ka pote yon gwo rekonfò pou ou. Istwa sa a kapab ede w pou w pi byen konprann yon kalite tout sèvitè Bondye ki fidèl yo bezwen tou, anpalan de fidelite. Yon moun montre li fidèl ak Bondye toutbonvre lè li ret atache avè l yon fason ki pèmèt li kontinye fè volonte Bondye, menm lè bagay yo rèd pou li. Ann wè ki jan egzanp Jòb la ede n wè sa pi plis toujou.

 Sanble se kèk tan apre Jòb te mouri, Moyiz, sèvitè fidèl Bondye a, te vin ekri istwa sou lavi Jòb la. Pa mwayen lespri sen Bondye, Moyiz te rakonte nonsèlman evènman sou tè a ki te afekte lavi Jòb, men tou, kèk evènman ki te pase nan syèl la.

 Nan kòmansman istwa Jòb la, nou wè li t ap mennen yon bèl vi. Li te rich, tout moun te konnen l e yo te respekte l nan peyi Ouz, nan zòn kote l te rete a, petèt nan nò Arabi. Li te toujou pataje sa l genyen ak moun ki nan bezwen, e li te toujou pare pou l ede moun ki fèb yo. Jòb ak madanm li te gen dis pitit. Men, sa k te pi enpòtan an, Jòb te bay relasyon l genyen ak Jewova anpil valè. Menm jan ak zansèt li yo, anpalan de Abraram, Izarak, Jakòb ak Jozèf, Jòb te chofe pou fè kè Jewova kontan. E menm jan ak patriyach sa yo, Jòb te jwe wòl prèt pou fanmi l paske li te konn ofri sakrifis nan non pitit li yo. — Jòb 1:1-5; 31:16-22.

 Bridsoukou, ekriven an sispann dekri sa k ap pase sou tè a pou l dekri sa k t ap pase nan syèl la. Apèsi sa a fè n aprann kèk bagay Jòb pa t ka konnen. Pandan zanj fidèl Jewova yo te rasanble devan l, zanj rebèl yo rele Satan an antre nan mitan yo. Jewova te konnen aklè Satan te rayi Jòb, sèvitè fidèl li a, se sa k fè Jewova atire atansyon l sou fidelite Jòb ki te san parèy. Satan kanpe devan Jewova epi l di: “Èske se pou granmesi Jòb gen lakrentif pou Bondye? Èske w pa fè yon lantouray pou pwoteje ni li menm, ni fanmi l, ni tout sa l genyen?” Satan rayi moun ki rete fidèl ak Bondye. Lè moun fidèl sa yo montre yo gen yon gwo atachman konsa pou Jewova, yo pwouve aklè Satan se yon trèt ki pa renmen pèsonn. Se sa k fè Satan te deklare Jòb t ap sèvi Bondye sèlman pou enterè pèsonèl li. Satan te di si Jòb pèdi tout bagay, li t ap ret nan figi Jewova, li manke l dega! — Jòb 1:6-11.

 San Jòb pa t menm konn sa, Jewova te ba li gwo privilèj pou l pwouve Satan se yon mantè. Jewova te pèmèt Satan pran tout sa Jòb te genyen. Se sèl touye li pa t dwe touye l. Se konsa, Satan kòmanse fè Jòb tout mechanste l yo. Nan yon sèl jou, gen yon seri malè terib ki tonbe sou Jòb. Li vin aprann tout bèt li yo, tankou bèf, bourik, mouton ak chamo li yo, yo tout te mouri. Sa k pi rèd la, sèvitè l yo ki t ap veye bèt yo te mouri tou. Nan youn nan ka sa yo, yon sèvitè Jòb te fè l konnen: “Bondye fè dife sot nan syèl la.” Petèt, se te yon kout zèklè li te wè. Anvan menm Jòb reyalize kantite moun ki mouri yo ak kantite bagay li te pèdi ki fè l te vin pòv yon sèl kou a, yon bagay pi grav te rive l. Dis pitit li yo te rasanble ansanm lakay pi gran frè a, epi bridsoukou, gen yon gwo van ki frape kay la ki tonbe sou pitit li yo e ki touye yo tout! — Jòb 1:12-19.

 Sa difisil, pou n pa di enposib, pou n imajine jan Jòb te santi l nan moman sa a. Li chire rad ki te sou li yo, li koupe cheve nan tèt li e li lage kò l atè. Men konklizyon Jòb te tire: Se Bondye ki te ba l sa l te genyen yo e kounye a se Bondye ki te repran yo. An reyalite, Satan te byen ranje sitiyasyon an pou l fè Jòb kwè se Bondye ki te lakòz katastwòf sa yo. Malgre sa, Jòb pa t janm manke Bondye dega, jan Satan te pretann sa. Olye de sa, men sa Jòb te di: “Se pou yo kontinye fè louwanj pou non Jewova.” — Jòb 1:20-22.

 Piske Satan te fache anpil, li pa t bay vag. Li te retounen devan Jewova ankò pandan li te reyini ak zanj li yo. Jewova te fè lwanj ankò pou fidelite Jòb ki t ap andire anba atak Satan yo. Satan reponn: “Depi yon moun wè lanmò devan l, l ap bay tout sa l genyen pou l sove lavi l. Men, kounye a, fè yon chanjman, lonje men w, frape l jis nan zo, e san mank, l ap ret nan figi w li manke w dega.” Satan te gen asirans depi Jòb soufri anpil, li t ap manke Bondye dega. Jewova te vrèman gen konfyans Jòb t ap rete fidèl, se sa k fè li te pèmèt Satan fè Jòb vin malad, men l pa t dwe touye Jòb. — Jòb 2:1-6.

 Annapre, Jòb te kòmanse soufri jan nou te wè sa nan kòmansman atik la. Imajine jan madanm li te santi l. Li te gentan nan lapenn akoz lanmò dis pitit li yo ki mouri, e kounye a, li te oblije ret ap gade mari l k ap soufri anpil san l pa ka fè anyen pou li. Soufrans sa a te pouse l di: “Kòmsi, ou kontinye ret fidèl toujou? Sa k fè w pa manke Bondye dega, epi w mouri mouri w!” Nòmalman, se pa konsa madanm Jòb t ap reyaji. Se sa k fè, Jòb te di l li t ap pale tankou yon fanm sòt. Malgre sa, Jòb pa t janm pale Bondye mal. Li pa t peche ak bouch li. — Jòb 2:7-10.

 Èske w te konnen istwa tris sa a ki te rive toutbonvre, konsène w pèsonèlman? Èske w te remake akizasyon Satan an pa t konsène Jòb sèlman, men an reyalite, li konsène tout moun ki sou tè a. Men sa l te di: ‘Yon moun ap bay tout sa l genyen pou l sove lavi l.’ Oswa nou ka di, Satan panse li enposib pou nou ret fidèl nètale ak Jewova. Li pa sispann repete ou pa renmen Bondye toutbon, e kanmenm w ap vire do bay Bondye pou sove lavi w. Anfèt, Satan pretann ou egoyis menm jan avè l! E ou menm, èske w pa ta renmen demanti Satan? Se nou tout ki gen privilèj pou n fè sa (Pwovèb 27:11). Ann gade ki lòt eprèv Jòb t apral andire.

 Te gen twa mesye ki te konn Jòb, yo te aprann pwoblèm li te genyen yo e yo te vwayaje vin jwenn li pou ba l konsolasyon. Lè yo te pwoche kote l, yo pa t ka rekonèt li a distans. Po l t ap grate l poutèt doulè a e l te parèt nwa akoz maladi a. Jòb pa t sanble ditou ak moun li te ye anvan an. Twa mesye sa yo, anpalan de Elifaz, Bildad ak Sofa, t ap jemi byen fò akoz soufrans Jòb yo e yo t ap voye pousyè sou tèt yo. Yo chita atè bò kote Jòb san yo pa di yon mo. Yo fè yon semèn konsa chita atè a, lajounen kou lannuit, san yo pa di anyen. Lefètke yo pa t di anyen, sa pa vle di yo t ap chèche konsole Jòb, paske yo pa t menm eseye konprann sa k te rive a. Sèl sa yo te konstate, se sa tout moun te ka wè, Jòb t ap soufri anpil. — Jòb 2:11-13; 30:30.

 Finalman, Jòb te pran lapawòl. Li modi jou li te fèt la, sa ki montre nan ki pwen li t ap soufri. E li esplike rezon ki fè l santi l mizerab. Pou li menm, se Bondye ki te lakòz tout pwoblèm li yo (Jòb 3:1, 2, 23). Menm lè Jòb pa t pèdi lafwa, li te bezwen rekonfò. Men, lè moun ki te swadizan vin konsole l yo kòmanse pale, Jòb vin reyalize byen vit pito yo te rete san yo pa t di anyen. — Jòb 13:5.

 Elifaz, ki te petèt pi gran pami yo tout, kòmanse pale. Epi, youn apre lòt, de lòt mesye yo vin pale tou. Nan fason yo reflechi sou sa k pase a, nou kapab di yo ale nan menm sans ak Elifaz. Yo te fè yon seri deklarasyon konsènan Bondye, tankou li nan yon pozisyon ki wo, Bondye konn pini moun epi li konn rekonpanse moun ki jis. Pawòl sa yo te ka parèt ankourajan, men an reyalite se pawòl tout moun konn di. Men, depi lè mesye yo te kòmanse pale, yo pa t konsole Jòb vre. Elifaz fè yon lojik tou senp ak Jòb, li di si Bondye bon e se moun ki mechan li pini, donk, ki konklizyon yon moun ta dwe tire nan ka Jòb la? Èske sa pa t vle di Jòb te yon moun mechan, yon fason oswa yon lòt? — Jòb 4:1, 7, 8; 5:3-6.

 Sa pa etonan lefètke Jòb pa t aksepte rezònman sa a. Li di mesye yo aklè li pa dakò avèk yo (Jòb 6:25). Men, mesye sa yo ki te vle bay Jòb konsèy, te kontinye kwè Jòb te koupab yon fason oswa yon lòt, pou yo se kòmsi li te fè yon peche an kachèt e li te merite tout sa k t ap rive l yo. Elifaz akize Jòb kòm yon moun ki pran dwa ki pa pou li, ki mechan e ki pa gen okenn lakrentif pou Bondye (Jòb 15:4, 7-9, 20-24; 22:6-11). Sofa di Jòb pou l kite mechanste l ap fè yo e pou l sispann pran plezi nan fè sa ki mal (Jòb 11:2, 3, 14; 20:5, 12, 13). Men se Bildad ki di pawòl ki pi blesan an. Li deklare pitit Jòb yo dwe te peche yon fason oswa yon lòt, se sa k fè yo te merite mouri. — Jòb 8:4, 13.

 Mesye sa yo ki te nan erè te fè Jòb yon bagay ki pi mal. Nonsèlman yo te mete dout sou fidelite Jòb, men yo fè kwè yon moun pa menm bezwen eseye fidèl ak Bondye! Nan kòmansman pawòl Elifaz yo, li pale de yon eksperyans dwòl li te fè ak yon espri. Sa Elifaz te rive konprann nan eksperyans li te fè ak demon sa a kapab kraze lafwa yon moun. Li fè Jòb konnen Bondye “pa fè sèvitè l yo konfyans e li chèche defo lakay zanj li yo”. Selon rezònman sa a, pa gen pèsonn ki ka fè kè Bondye kontan. Pi devan, li te deklare fidelite Jòb pa gen enpòtans pou Bondye menm jan fidelite yon vètè pa gen enpòtans pou li. — Jòb 4:12-18; 15:15; 22:2, 3; 25:4-6.

 Èske sa deja rive w ou te chèche konsole yon moun ki santi l nan yon gwo lapenn? Sa pa fasil ditou. Men, nou ka aprann anpil nan men fo zanmi Jòb yo, sitou anrapò ak sa nou pa dwe di. Nan tout pawòl byen long mesye sa yo t ap di Jòb, yo te sèvi ak yon seri gwo mo, yo te fè fo rezònman, men yo pa t menm site non l pou montre yo te gen sousi pou li. Yo pa t wè nesesite pou yo trete Jòb ak jantiyès etandone li te kraze nèt, paske yo pa t menm wè sa. a Donk, si w gen yon moun pa w ki santi l tris, fè tout sa k posib pou w montre w janti avè l e pou montre w gen sousi pou li. Chèche ede moun nan gen plis lafwa ak kouraj, ede l mete konfyans li nan Jewova pou l pa bliye Jewova gen anpil bonte lakay li ak anpil mizèrikòd e li defann sa ki jis. Se sa menm Jòb t ap fè si l te nan plas konpayon l yo (Jòb 16:4, 5). Pou jan yo t ap chèche kraze fidelite Jòb, ki jan l te reyaji?

 Jòb te deja kraze depi yon bon ti tan lè twa mesye yo te vin pale avè l. Depi lè l te kòmanse pale avèk yo, li te admèt sa l t ap di yo te sanble pafwa ak “yon bann vye pawòl” e ak “pawòl yon moun ki sanzespwa” ​(Jòb 6:3, 26). Nou ka konprann poukisa. Pawòl li yo te montre gwosè tristès li te santi nan kè l. Pawòl li yo te montre tou a ki pwen li pa t konprann sa k t ap rive l yo. Sa k te rive l an reyalite, li te panse se Jewova ki te lakòz sitiyasyon ki t ap frape li menm ak fanmi l, paske bagay yo te parèt etranj. Gen anpil bagay enpòtan ki t ap pase Jòb pa t konprann, se sa k fè li te tire move konklizyon l yo.

 Antouka, Jòb se yon moun ki te gen yon lafwa solid e ki byen anrasinen. Lafwa l te parèt aklè pandan gwo diskisyon li te genyen ak mesye yo, e bèl pawòl verite li te di yo ankouraje nou menm jodi a. Li dekri kreyasyon Bondye a, yon fason okenn lòt moun pa t ap ka fè san èd Bondye. Pa egzanp, li deklare Jewova “fè tè a ret pandye san pa gen anyen ki kenbe l,” yon reyalite ki t ap vin klè pou syantifik yo plizyè syèk annapre (Jòb 26:7). b Lè Jòb te pale sou esperans li te genyen sou lavni, li te montre li gen yon konfyans total nan Bondye, menm jan ak lòt sèvitè Bondye nan tan lontan yo ki te gen menm lafwa sa a. Jòb te kwè si l te mouri, Bondye t ap sonje l, li t ap anvi wè l e pi devan, li t ap fè l retounen viv ankò. — Jòb 14:13-15; Ebre 11:17-19, 35.

 Men, ann retounen sou kesyon fidelite mesye yo t ap pale a. Elifaz ak de zanmi l yo te deklare fidelite lèzòm pa gen enpòtans pou Bondye. Èske Jòb te dakò ak move rezònman sa a? Pa ditou! Jòb te deklare fidelite se yon kalite enpòtan pou Bondye. Avèk konfyans li te gen nan Jewova, li di: “L ap wè m fidèl.” ​(Jòb 31:6). Pi devan, Jòb te vin reyalize, tout refleksyon fo zanmi l yo t ap fè yo, se akize yo t ap akize l kòmkwa li pa t fidèl. Sa te pouse Jòb di pawòl ki pi long li te di yo, sa ki t ap fè twa mesye yo pa t konn sa pou yo reponn ankò.

 Jòb te konprann li te dwe montre l fidèl nan tout sa l ap fè. Konsa, li esplike li se yon moun ki te montre l fidèl chak jou nan lavi l. Pa egzanp, li pa t lage kò l nan okenn idolatri, li te trete tout moun ak respè e ak jantiyès, li te montre l fidèl ak madanm li, e mete sou tout bagay sa yo, li te rete fidèl ak sèl vrè Dye a, Jewova. Konsa, Jòb te kapab di ak tout kè l: “Jiskaske m mouri, mwen pap sispann ret fidèl ak Bondye.” — Jòb 27:5; 31:1, 2, 9-11, 16-18, 26-28.

 Èske w wè kesyon fidelite a menm jan ak Jòb? Li fasil pou yon moun pale de fidelite, men Jòb te konprann pèsonn pa ka montre l fidèl nan pawòl sèlman, men l ap bezwen poze aksyon tou. Nou montre nou fidèl ak Bondye toutbon e ak tout kè n, lè n obeyi l e lè n fè sa ki dwat nan je l chak jou nan lavi n, menm lè nou devan sitiyasyon ki difisil. Si nou rive fè sa, sa klè n ap fè kè Jewova kontan e n ap fè Satan, ènmi l lan fache menm jan Jòb te reyisi fè sa. Se pi bon fason nou ka imite lafwa Jòb.

 Men, istwa Jòb la pa t fini la. Li te vin manke ekilib, se sa k fè li te tèlman ap defann tèt li, li bliye defann sa k te pi enpòtan an, anpalan de repitasyon Bondye. Li te bezwen korije fason l panse, pou l ka vin wè bagay yo jan Bondye wè yo. E li t ap soufri toujou akoz doulè ak tristès li te genyen, donk li te vrèman bezwen bonjan konsolasyon. Ki sa Bondye t apral fè pou moun fidèl sa a ki te montre li gen lafwa nan li a? Gen yon lòt atik nan menm seri atik sa a ki pral reponn kesyon sa yo.