Depi byen lontan syantifik k ap etidye zannimo yo wè zuit yo rele pekou a kapab kole byen di sou wòch nan lanmè, sou sipò waf yo ak sou bato yo. Gen moun ki di lakòl pekou yo pi bon lontan pase nenpòt lakòl lèzòm fè. Sa pa gen lontan depi syantifik yo dekouvri sa k fè pekou yo ka kole byen di sou bagay ki anba dlo.

 Fè yon ti reflechi: Selon plizyè etid, anvan zuit yo rele pekou a chwazi yon kote pou l kole, li byen egzamine plizyè kote. Yon fwa pekou a jwenn kote l vle kole a, sanble li bay de kalite likid. Premye likid la tankou yon luil ki fè dlo pa ka rete kote li vle kole a. Anplis de sa, likid sa a prepare kote a pou pekou a mete yon dezyèm likid ki rele fosfopwoteyin, yon likid ki gen pwoteyin ak yon asid ki gen fosfò ladan l.

 Lè de likid sa yo met ansanm, yo fè yon plak byen di e menm bakteri pa ka manje l. Lefètke plak sa a di konsa, sa bon anpil pou pekou a paske l ap ret kole kote sa a pou tout rès vi l.

 Fason pekou a fè pwòp lakòl li pi konplike lontan pase sa syantifik yo te panse. Men sa youn nan gwoup moun ki te dekouvri fason ti zuit sa a fè lakòl la te di: “Se yon fason entèlijan e ki estrawòdinè lanati fè pou l fè yon lakòl ki ka kole sou yon bagay ki anba dlo!” Dekouvèt sa yo ka ede moun k ap fè rechèch yo fè lakòl pou yo itilize anba dlo ak lakòl ki fèt ak pwodui natirèl yo ka itilize nan aparèy elektwonik e nan operasyon kote doktè ap ranplase pati kò yon moun ak pati kò yon lòt moun.

 Ki sa w panse? Èske lakòl zuit yo rele pekou a egziste grasa evolisyon? Oswa se fè yo te fè l?