ESPLIKASYON SOU KÈK VÈSÈ
Jan 15:13 — “Pa gen pi bon jan pou ou moutre jan ou renmen zanmi ou”
“Pèsonn pa gen yon pi gwo lanmou pase yon moun ki bay lavi l pou zanmi l.” — Jan 15:13, Tradiksyon monn nouvo a.
“Pa gen pi bon jan pou ou moutre jan ou renmen zanmi ou pase lè ou bay lavi ou pou yo.” — Jan 15:13, Bib la.
Sa Jan 15:13 vle di
Jezi t ap ede disip li yo konprann lanmou youn gen pou lòt ta dwe tèlman fò youn ta dwe dispoze mouri pou lòt.
Anvan sa, li te di apot li yo: “Men kòmandman mwen bay: Se pou nou youn renmen lòt menm jan mwen renmen nou an.” (Jan 15:12). Ki kalite lanmou Jezi te gen pou disip li yo? Se te yon lanmou ki fè l pa wè tèt li sèlman e ki pouse l fè sakrifis pou lòt moun. Pandan sèvis li sou tè a, li te mete sa lòt moun bezwen ak sa ki enterese yo anvan enterè pa l. Li te geri moun, li te pale yo de Wayòm Bondye a a. Li te menm konn fè travay yo pa t bay valè pou l ede lòt moun (Matye 9:35; Lik 22:27; Jan 13:3-5). Men, nan Jan 15:13, Jezi t ap pale de yon pi gwo aksyon ki demontre lanmou. Anfèt, kèk èdtan sèlman apre l te di pawòl sa yo, li te demontre gwo lanmou sa a lè l te aksepte bay “lavi l kòm ranson pou libere anpil moun”. (Matye 20:28; 22:39.) Konsa, yon fason ki estrawòdinè, li te montre jan l te renmen lòt moun plis pase tèt li.
Jezi renmen tout moun. Men, li renmen moun ki suiv ansèyman l yo yon fason espesyal. Disip li yo te bon zanmi l paske yo te obeyi enstriksyon l yo epi yo te toujou avè l nan eprèv li yo (Lik 22:28; Jan 15:14, 15). Tout sa te fè li plis anvi bay lavi l pou yo.
Kretyen premye syèk yo te aplike ansèyman Jezi yo, yo te dispoze bay lavi yo youn pou lòt (1 Jan 3:16). Vrèmanvre, se lanmou Jezi te demontre a, lanmou ki fè yon moun pa wè tèt li sèlman an, ki t ap pèmèt yo rekonèt vrè kretyen yo. — Jan 13:34, 35.
Kontèks Jan 15:13
Se nan chapit 13 rive nan chapit 17 Evanjil Jan an nou jwenn dènye konsèy Jezi te bay disip li yo ak dènye priyè li te fè avèk yo kèk èdtan anvan li mouri. Nan chapit 15 lan, li te konpare disip li yo ak branch yon pye rezen k ap bay fwi pou l te ka ede yo konprann si yo vle montre yo se disip li yo dwe rete atache avè l. Li te ankouraje yo “kontinye bay anpil fwi”. (Jan 15:1-5, 8.) Yo rive bay anpil fwi lè yo aji yon fason ki montre yo gen lanmou ki fè yo pa wè tèt yo sèlman. Yo fè sa tou lè yo fè sakrifis pou lòt moun, sa gen ladan l preche mesaj Jezi te preche a, anpalan de “bon nouvèl Wayòm Bondye a.” — Lik 4:43; Jan 15:10, 17.
Gade videyo sa a ki tou kout pou w wè yon rezime sou liv Sòm nan.
a Wayòm Bondye a se yon gouvènman ki nan syèl la. Bondye te tabli Wayòm nan pou l ka dirije tè a epi reyalize objektif li (Dànyèl 2:44; Matye 6:9, 10). Pou nou jwenn plis enfòmasyon, gade atik “Ki sa Wayòm Bondye a ye?”
Lòt sijè ki enteresan
ANSÈYMAN FONDAMANTAL KI NAN BIB LA
Poukisa Jezi te mouri?
Bib la bay lanmò Jezi yon kokenn enpòtans. Èske lanmò l te gen yon objektif?
REPONS BIB LA BAY
Nan ki sans sakrifis Jezi a se yon “ranson pou anpil moun”?
Nan ki sans ranson an se pri yo peye pou rachte n anba peche?
REPONS BIB LA BAY
Ki jan Jezi sove nou?
Poukisa nou bezwen Jezi sipliye pou nou? Èske depi nou annik kwè nan Jezi n ap sove?
ESPLIKASYON SOU KÈK VÈSÈ
Esplikasyon sou Jan 3:16 — “Paske, Bondye tèlman renmen monn nan”
Ki jan Jewova Dye montre li renmen nou chak e li vle pou nou viv pou toutan?
SA BIB LA ANSEYE
Zouti pou etidye Labib
Chwazi tout sa k ap ede n etidye Bib la e k ap fè nou aprann yon fason ki ban nou kè kontan e ki ankouraje nou.
