Jou ki te samdi 5 oktòb 2013 la, te gen 257 294 moun ki te suiv pwogram 129^yèm reyinyon ànyèl Watch Tower Bible and Tract Society of Pennsylvania a nan 21 peyi diferan, swa nan lokal kote evènman an te fèt la, swa pa mwayen Entènèt. Nan menm wikenn nan, gen lòt Temwen Jewova ki te suiv anrejistreman pwogram nan. An total, 1 413 676 moun te suiv reyinyon ànyèl la nan 31 peyi. Reyinyon ànyèl sa a se pi gwo rasanbleman Temwen Jewova yo te òganize, paske asistans lan te depase 1 327 704 moun ki te la nan yon lòt evènman espesyal yo te òganize nan vil Meksik ak nan Amerik santral jou ki te 28 avril 2013 la.

Depi nan ane 1920 yo, Temwen Jewova yo itilize telefòn ak anpil estasyon radyo pou moun nan lòt peyi kapab suiv pwogram asanble yo òganize yo. Kounye a, grasa Entènèt, menm moun k ap asiste evènman espesyal nan zòn ki byen lwen kapab tande epi wè sa k ap pase nan lokal y ap fè evènman espesyal sa yo swa an dirèk oubyen yon ti tan annapre. William, yon Temwen Jewova Ozetazini, te asiste yon kongrè ki te fèt nan Richmond, Vijini, an 1942, kote l te tande tout pwogram nan grasa yon rezo telefòn. Lè l ap konpare eksperyans li te fè nan epòk li a ak jan yo te fè reyinyon ànyèl la, men sa l di: “Ou ka pi byen pwofite pwogram nan lè w kapab wè sa k ap pase a. Pa gen okenn konparezon posib ant de eksperyans sa yo.”

Gen plizyè Temwen Jewova nan diferan filyal ki pase plizyè èdtan ap travay pou pèmèt moun pwofite pwogram nan sou Entènèt san pwoblèm. Nan wikenn aktivite espesyal la, plizyè teknisyen t ap jere aparèy enfòmatik yo nan kote yo kontwole aparèy yo nan Bwouklin, Nouyòk, e yo te travay lajounen kou lannuit pou 15 zòn ki gen lè diferan kapab pwofite pwogram nan. Men sa Ryan, yon frè ki t ap konekte diferan zòn ki t apral pwofite pwogram nan e ki t ap veye pou koneksyon an byen mache te di: “Nou te pase nuit san dòmi, men lè n wè valè moun ki te pwofite pwogram nan, sa te vrèman vo lapenn.”