«Թող տքնաջան աշխատի՝ իր ձեռքերով բարին գործելով, որպեսզի կարողանա տալ կարիքի մեջ եղողին» (ԵՓԵՍԱՑԻՆԵՐ 4։28)։

Մեր Արարիչը ուզում է՝ դրական տրամադրվածություն ունենանք աշխատանքի վերաբերյալ։ Ինչո՞ւ։ Տքնաջան աշխատող մարդը երջանիկ է, քանի որ կարող է հոգ տանել իր ընտանիքի համար։ Նաև գուցե կարողանա օգնել կարիքի մեջ եղողին։ Նա թանկ աշխատող կլինի իր գործատուի համար։ Լավ աշխատողին դժվար թե գործից ազատեն։ Սուրբ Գիրքն ասում է, որ տքնաջան աշխատանքի արդյունքը «Աստծու պարգևն է» (Ժողովող 3։13)։

«Վստահ ենք, որ մաքուր խիղճ ունենք, որովհետև ուզում ենք ամեն ինչում ազնվությամբ վարվել» (ԵԲՐԱՅԵՑԻՆԵՐ 13։18)։

Ազնիվ մարդը ինքնահարգանք ունի, վայելում է ներքին խաղաղություն և գլուխը հանգիստ բարձին է դնում։ Նա հարգանքի և վստահության է արժանանում ուրիշների կողմից։ Անազնիվ մարդիկ իրենք իրենց զրկում են լավ բաներից։ Նրանք գուցե սկսեն ապրել խղճի խայթով և այն մտավախությամբ, որ մի օր իրենց անազնիվ գործերը ջրի երես դուրս կգան։

«Ձեր կյանքում փողասիրությունը թող տեղ չունենա։ Բավարարվեք եղածով» (ԵԲՐԱՅԵՑԻՆԵՐ 13։5)։

Ինչ խոսք, փողն անհրաժեշտ է սնունդ և այլ կենսական բաներ գնելու համար։ Բայց փողասիրությունը չափազանց վտանգավոր է։ Դրա պատճառով մարդ գուցե իր ողջ ժամանակն ու էներգիան ծախսի ավելի շատ գումար վաստակելու վրա։ Փողի հետևից ընկնելը կարող է լարվածություն առաջացնել ընտանիքում, խլել այն ժամանակը, որ մարդ պետք է հատկացներ իր երեխաներին, և անգամ վնասել նրա առողջությունը (1 Տիմոթեոս 6։9, 10)։ Իսկ որ ավելի վատ է, փողասիրությունը կարող է դրդել մարդուն անազնվորեն վարվել։ Մի իմաստուն մարդ ասել է. «Իր գործերով հավատարիմ մարդը շատ օրհնություններ կստանա, բայց նա, ով շտապում է հարստություն ձեռք բերել, անմեղ չի մնա» (Առակներ 28։20)։

«Իմաստություն և խորհելու կարողություն պահպանիր» (ԱՌԱԿՆԵՐ 3։21)։

Լավ կրթությունը նպաստում է, որ բարեխիղճ մարդ և պատասխանատու ծնող լինենք։ Բայց աշխարհում տրվող կրթությունը բավարար չէ ապահովություն և մնայուն երջանկություն ունենալու համար։ Կյանքի բոլոր ոլորտներում հաջողակ լինելու համար մենք Աստծու տված կրթության կարիքն ունենք։ Աստծուն լսող մարդու մասին Սուրբ Գիրքն ասում է. «Ինչ էլ որ նա անի, կհաջողվի» (Սաղմոս 1։1–3)։