Մոտեցեք Աստծուն

«Աղոթքներ Լսող»

1 ՏԱՐԵԳՐՈՒԹՅՈՒՆ 4։9, 10

ԵՀՈՎԱ ԱՍՏՎԱԾ իսկապե՞ս պատասխանում է իր նվիրված երկրպագուների աղոթքներին։ Գաբես անունով մի մարդու մասին Աստվածաշնչի համառոտ արձանագրությունը ցույց է տալիս, որ Եհովան իրոք «աղոթքներ Լսող» է (Սաղմոս 65։2)։ Որքան էլ որ տարօրինակ է, այս կարճ տեղեկությունը նշված է «1 Տարեգրություն» գրքում արձանագրված տոհմաբանության ցուցակում։ Քննենք 1 Տարեգրություն 4։9, 10 համարները։

Այն ամենը, ինչ գիտենք Գաբեսի մասին, ամփոփված է այս երկու համարներում։ 9-րդ համարի համաձայն՝ մայրը «նրան Գաբես անվանեց՝ ասելով. «Ցավով ունեցա նրան»» a։ Ինչո՞ւ նա այդպիսի անուն ընտրեց։ Մի՞թե նա արտասովոր ցավեր էր կրել ծննդաբերելիս։ Գուցե նա այրի էր և ողբում էր, որ ամուսինը իր կողքին չէ, որ ուրախանա իրենց երեխայի լույս աշխարհ գալու համար։ Աստվածաշունչը ոչինչ չի ասում։ Այդուհանդերձ, նրա մայրը մի օր իր տղայով հպարտանալու պատճառ էր ունենալու։ Ըստ ամենայնի, Գաբեսի եղբայրները արդար մարդիկ էին, սակայն նա «իր եղբայրներից ավելի պատվարժան» համարվեց։

Գաբեսը հաճախ էր աղոթում Աստծուն։ Մի անգամ նա իր աղոթքը սկսեց Աստծուց օրհնություններ խնդրելով։ Հետո երեք բան խնդրեց, ինչը ցույց էր տալիս, որ նա ամուր հավատ ուներ։

Առաջին՝ Գաբեսը աղաչեց Աստծուն՝ ասելով. «Իմ տարածքը մեծացրու» (համար 10)։ Նա պատվարժան մարդ էր և չէր ցանկանում ագահաբար տիրանալ ուրիշի ունեցվածքին։ Նրա անկեղծ խնդրանքը ագահության դրսևորում չէր. Գաբեսը ոչ թե տարածքներ էր ուզում ունենալ, այլ ավելի շատ հետաքրքրված էր մարդկանցով։ Հնարավոր է՝ նա ուզում էր ընդարձակել իր տարածքը, որտեղ ավելի շատ մարդիկ կկարողանային երկրպագել ճշմարիտ Աստծուն b։

Երկրորդ՝ Գաբեսը խնդրեց Աստծուն՝ ասելով. «Քո ձեռքն ինձ հետ լինի»։ Աստծու ձեռքը զորավոր է, և նա կարող է օգնել իր երկրպագուներին (1 Տարեգրություն 29։12)։ Այդ պատճառով իր սրտի ուզածը ստանալու համար Գաբեսը դիմեց Աստծուն, որի ձեռքը կարճ չէ նրանց համար, ովքեր հավատ են դրսևորում իր հանդեպ (Եսայիա 59։1)։

Երրորդ՝ Գաբեսը աղոթեց. «Պահպանիր ինձ աղետից, որ այն ինձ չվնասի»։ «Որ այն ինձ չվնասի» արտահայտությունը ցույց է տալիս, որ Գաբեսը աղոթում էր ոչ թե չարիքից խուսափելու, այլ դժվարությունները հաղթահարելու և ուրախությունը չկորցնելու համար։

Գաբեսի աղոթքից պարզ է, որ նրան մտահոգում էր ճշմարիտ երկրպագությունը։ Այդ աղոթքը ցույց է տալիս, որ նա հավատում ու վստահում էր աղոթքներ Լսողին։ Իսկ Եհովան պատասխանե՞ց նրա խնդրանքին։ Այս կարճ արձանագրությունը ավարտվում է հետևյալ խոսքերով. «Եվ Աստված կատարեց նրա խնդրանքը»։

Աղոթքներ Լսողը չի փոխվել։ Աստված հաճույքով լսում է իր երկրպագուների աղոթքը։ Ովքեր հավատում ու վստահում են Եհովային, կարող են համոզված լինել՝ ինչ էլ որ խնդրեն նրա կամքի համաձայն, կլսի նրանց (1 Հովհաննես 5։14)։

[Ծանոթագրություններ]