2024 թ. հոկտեմբերի 18-20-ը Չիլիի մայրաքաղաք Սանտյագոյի «Էլ Տրեբոլ» համաժողովների սրահում տեղի ունեցավ «Հռչակենք բարի լուրը» հատուկ համաժողովներից վերջինը։ Ծրագրին ներկա եղավ 9 140 հոգի։ 59 հոգի մկրտվեց։ Սա այս տարի Սանտյագոյում կայացած երկրորդ հատուկ համաժողովն էր և վերջինը այն 15 հատուկ համաժողովներից, որ կայացան ամբողջ աշխարհում 2024 թ. հունիսից օգոստոսը։

Հատուկ համաժողովների անցկացման յուրաքանչյուր քաղաքում ամբողջ աշխարհից հավատակիցներին դիմավորելու նախապատրաստական աշխատանքները ամիսներ առաջ էին սկսվել։ Չիլիում հազարավոր անձնազոհ կամավորներ տքնաջան աշխատել էին, որպեսզի ջերմ հյուրընկալություն ապահովեին 16 երկրներից ժամանող 2 397 պատվիրակների համար։ Խոսելով այն մասին, որ շատ կամավորներ օգնելու համար փոխել էին իրենց աշխատանքային գրաֆիկը և վերադասավորել առօրյա գործերը՝ մի քույր ասաց. «Այնպիսի զգացողություն չունեմ, թե զոհողություն եմ արել։ Ճիշտ է, միգուցե հոգնած եմ, բայց այնքան անմոռանալի հուշեր ունեմ և այնքան նոր ընկերներ եմ ձեռք բերել, որ դա աչքիս չի երևում»։

ԱՄՆ-ից մի եղբայր էլ, պատմելով Սանտյագոյի հատուկ համաժողովից ստացած իր տպավորությունների մասին, ասաց. «Այն պահից սկսած, երբ ժամանեցինք օդանավակայան, եղբայրներն ու քույրերը անմոռանալի սեր ցույց տվեցին մեր հանդեպ։ Բառերով չեմ կարող նկարագրել»։ Պերուից մի քույր էլ նշեց. «Առաջին անգամ էր, որ հատուկ համաժողովի էի մասնակցում։ Այն գերազանցեց իմ բոլոր սպասելիքները։ Այս համաժողովի միջոցով Եհովան քաջալերեց ինձ ու նոր ուժով լցրեց»։

Մեր ողջ եղբայրությունը անչափ շնորհակալ է Եհովային, որ նրա օրհնությամբ կայացան 2024 թ. «Հռչակենք բարի լուրը» հատուկ համաժողովները։ Ուրախ ենք, որ հնարավորություն եղավ փառք ու պատիվ բերել մեր Արարչի սուրբ անվանը (Սաղմոս 34։3)։

Ստորև ներկայացնում ենք լուսանկարներ, որոնք փոխանցում են այն սերը, ուրախությունն ու միասնությունը, որ տիրում էր 2024 թ.-ին կայացած «Հռչակենք բարի լուրը» խորագրով 15 հատուկ համաժողովների ժամանակ։