Չելմսֆորդում Մեծ Բրիտանիայի մասնաճյուղի շինարարությունը նախատեսվում է ավարտին հասցնել 2019 թ. դեկտեմբերին։ Սակայն այս նախագիծը արդեն իսկ արժանացել է մասնագետների գնահատանքին, քանի որ Եհովայի վկաներին հաջողվել է վերականգնել տեղանքի գեղեցկությունը։

Երբ 2015 թ.-ին մեր եղբայրները գնեցին այս հողատարածքը, այն օգտագործվում էր որպես աղբանոց մեքենաների ջարդոնների և կենցաղային թափոնների համար։ Կամավորները հողից փորելով հանեցին և վերամշակեցին մեծ քանակությամբ աղբ, այդ թվում՝ հազարավոր անվադողեր, որոնցից մի քանիսը Երկրորդ համաշխարհային պատերազմի ժամանակներից էին մնացել։ Այնուհետև նրանք մաղեցին աղտոտված հողը, որպեսզի հեռացնեն աղբի նույնիսկ փոքր կտորները, որոնք ավելի ուշ վերամշակեցին կամ այլ կերպ օգտագործեցին։ Ապա նրանք մաքուր հողը օգտագործեցին շինհրապարակում։ 34 հեկտար (մոտ 85 ակր) տարածքը վերականգնելու համար 11 000-ից ավելի եղբայրներ ու քույրեր են աշխատել՝ տրամադրելով ավելի քան չորս միլիոն ժամ։

Համալիրի տարածքում լինելու են պարտեզներ, որտեղ աճելու են ինչպես այդ տեղանքին հատուկ, այնպես էլ այլ վայրերից բերված բույսեր։ Նոր Բեթելի տարածքը կգեղեցկացնեն նաև լճակները, ծաղկազարդ մարգագետիններն ու պտղատու այգին։ Բրիտանիայի մասնաճյուղի լանդշաֆտային ձևավորումը ոչ միայն գեղեցիկ է, այլև լավ մտածված. այն նպաստավոր միջավայր է ստեղծում կենդանիների ու թռչունների բնակության և անձրևաջրերի օգտագործման համար, ինչպես նաև նպաստում է հինավուրց ծառերի ու կանաչ ցանկապատերի պահպանմանը, այդ տեղանքին հատուկ բույսերի բազմացմանը և հարակից տարածքի բարեկարգմանը։

Եղբայր Փոլ Ռոջերսը, որը շինարարական նախագծի կոմիտեի անդամ է, ասաց. «Մեր գնած հողատարածքը տարիներ շարունակ ողբալի վիճակում է եղել։ Այն լրիվ վերափոխվեց շնորհիվ կամավորների մեծ բանակի, որը սկսեց մանրակրկիտ կերպով տեսակավորել աղբը և մաքրել տարածքը։ Դրան հաջորդեց լանդշաֆտի ձևավորումը, որի ժամանակ հաշվի առանք շրջակա տարածքի ռելիեֆի առանձնահատկությունները։ Այնուհետև հարյուրավոր նոր ծառեր, թփեր և այլ բույսեր տնկեցինք։ Այժմ այս տարածքին նայելիս ակամայից հիշում ենք Եզեկիել 36։35, 36 համարների խոսքերը. «Մարդիկ կասեն. «Այս երկիրը, որն ամայացած էր, Եդեմի պարտեզի պես է դարձել».... Այն ազգերը.... կիմանան, որ ես՝ Եհովաս եմ շինել քարուքանդ եղածը և ծառեր տնկել ամայի երկրում»»։