Շատեր կը վիճաբանին թէ չենք կրնար հոգեղէն ծիրին մասին բան մը գիտնալ, քանի որ հոնկէ մէկը չէ եկած որպէսզի մեզի պատմէ ատոր մասին։ Բայց ասիկա սխալ է, քանի որ Յիսուս Քրիստոս առաջ որ երկիր գար, երկինքն էր՝ հոգեղէն ծիրին մէջ։ Ան առաջին դարու կրօնական առաջնորդներուն բացէ ի բաց ըսաւ. «Ես երկնքէն իջայ՝ ո՛չ թէ իմ կամքս ընելու, հապա անոր կամքը՝ որ զիս ղրկեց»։ Ուրեմն, Յիսուս իր աչքով տեսածը կը պատմէր իր առաքեալներուն, երբ ըսաւ. «Իմ Հօրս տունը շատ բնակարաններ կան» (Յովհաննէս 6։38. 14։2)։

Անշուշտ, Յիսուսին Հայրը Աստուած է, որուն անունը Եհովա է, եւ Եհովային «տունը» երկինքին մէջ է (Սաղմոս 83։18)։ Ասոր համար, Եհովա Աստուած եւ Յիսուս Քրիստոս լաւագոյն կերպով կրնան նկարագրել այս աներեւոյթ աշխարհը։ Անոնք հաւատարիմ մարդոց հոյակապ տեսիլքներ ցուցնելով՝ շատ մը տեղեկութիւններ տուած են հոգեղէն ծիրին մասին։

Յաջորդ յօդուածը կը խօսի Սուրբ Գիրքին կարգ մը համարներուն մասին, որոնք կը նկարագրեն կարգ մը մարդոց տեսած տեսիլքները։ Մինչ այս տեսիլքները նկատի կ’առնես, միտքդ պահէ որ հոգեղէն ծիրը նիւթական չէ. չկան բաներ որ կրնանք շօշափել կամ տեսնել։ Աստուած մեզի հասկնալի կերպով բացատրեց թէ հոգեղէն ծիրը ինչպէ՛ս է, փոխանակ բացատրելու այնպիսի կերպով մը, որ միայն հոգեղէն արարածները կը հասկնան։ Այս տեսիլքները քեզի պիտի օգնեն որ հասկնաս ատոնց որ հոգեղէն ծիրին «շատ բնակարաններ»ուն մէջ կ’ապրին։