Հարցումներ ընթերցողներէն

Եհովա Աբրահամի հետ իր ուխտը Ուրի՞ մէջ ըրաւ թէ՝ Խառանի մէջ։

Աբրահամի հետ Եհովայի ուխտին մասին առաջին անգամ կը կարդանք Ծննդոց 12։1-3–ի մէջ, ուր կ’ըսէ. «Տէրը ըսաւ Աբրամին. ‘Քու երկրէդ եւ քու ազգականներէդ ու քու հօրդ տունէն գնա՛ այն երկիրը, որ ես քեզի պիտի ցուցնեմ։ Քեզ մեծ ազգ պիտի ընեմ . . . ու երկրի բոլոր ազգերը քեզմով պիտի օրհնուին’»։ * Եհովա հաւանաբար Աբրահամի հետ այս ուխտը ըրաւ երբ ան Ուրի մէջ էր եւ զայն վերահաստատեց, երբ Աբրահամ Խառանի մէջ էր։

Առաջին դարուն, Ստեփանոս ակնարկութիւն ըրաւ թէ Եհովա պատուէր տուաւ Աբրահամի որ Քանան փոխադրուի։ Սենետրիոնին ուղղելով իր խօսքը, ան ըսաւ. «Փառաց Աստուածը մեր Հօրը Աբրահամին երեւցաւ, քանի որ Միջագետքի մէջ էր, դեռ Խառանի մէջ չբնակած եւ ըսաւ անոր. ‘Ելի՛ր քու երկրէդ եւ քու ազգականներէդ ու գնա՛ այն երկիրը, որ ես քեզի պիտի ցուցնեմ’»։ (Գործք 7։2, 3) Աբրահամ Ուրէն էր՝ եւ ինչպէս Ստեփանոս նշեց, հոն էր որ առաջին անգամ լսեց Քանան երթալու պատուէրը։ (Ծննդոց 15։7. Նէեմեայ 9։7) Ստեփանոս չյիշեց Աբրահամի հետ ըրած Աստուծոյ ուխտը, բայց Ծննդոց 12։1-3–ի մէջ այդ ուխտը կապուած է Քանան երթալու պատուէրին հետ։ Ուստի տրամաբանական է հաւատալ թէ Եհովա Աբրահամի հետ ուխտը Ուրի մէջ ըրաւ։

Բայց Ծննդոցի պատմութիւնը ուշադիր կերպով կարդալով կը հասկնանք որ Եհովա Աբրահամի հետ իր ուխտը կրկնեց Խառանի մէջ, ճիշդ ինչպէս որ բազմաթիւ առիթներով Քանանի մէջ զայն կրկնեց եւ անոր կարգ մը երեսակները ընդլայնեց։ (Ծննդոց 15։5. 17։1-5. 18։18. 22։16-18) Ծննդոց 11։31, 32–ի համաձայն, Աբրահամի հայրը՝ Թարա, Քանան երթալու համար Ուրէն մեկնեցաւ Աբրահամի, Սառայի ու Ղովտի հետ։ Անոնք Խառան եկան եւ հոն մնացին մինչեւ Թարայի մահը։ Աբրահամ Խառանի մէջ բաւական ժամանակ մնաց որ կրցաւ մեծ հարստութիւն ձեռք ձգել։ (Ծննդոց 12։5) Ժամանակ մը ետք, Աբրահամի եղբայրը՝ Նաքովրն ալ հոն փոխադրուեցաւ։

Թարայի մահուան մասին խօսելէ ետք, Աստուածաշունչը կը տեղեկագրէ Աբրահամի ըսած Եհովայի խօսքերը եւ կ’աւելցնէ. «Աբրամ գնաց ինչպէս Տէրը իրեն ըսեր էր»։ (Ծննդոց 12։4) Ուստի, Ծննդոց 11։31–12։4–ը այն զօրաւոր տպաւորութիւնը կու տայ թէ Եհովա Ծննդոց 12։1-3–ի մէջ արձանագրուած խօսքերը խօսեցաւ Թարայի մահէն ետք։ Եթէ այս է պարագան, Աբրահամ Խառանը ձգեց եւ ուղղուեցաւ դէպի Եհովայի նշանակած երկիրը, տակաւին նոր ստացած պատուէրին, ինչպէս նաեւ տարիներ առաջ Ուրի մէջ իր լսած պատուէրին համաձայն։

Ծննդոց 12։1–ի համաձայն, Եհովա պատուիրեց Աբրահամի. «Քու երկրէդ եւ քու ազգականներէդ ու քու հօրդ տունէն գնա՛»։ Ժամանակ մը, Աբրահամի «երկիր»ը Ուրն էր, եւ իր հօրը «տուն»ը հոն էր։ Բայց Աբրահամի հայրը Խառան փոխադրեց իր ընտանիքը, եւ Աբրահամ այդ վայրը իր երկիրը կոչեց։ Քանանի մէջ տարիներ ետք, երբ իր տան երէց ծառան ‘իր երկիրը ու իր ազգականներուն’ ղրկեց, Իսահակի համար կին մը գտնելու համար, ծառան «Նաքովրի քաղաքը գնաց» (Խառան՝ կամ մօտակայքը)։ (Ծննդոց 24։4, 10) Հոն ծառան, Աբրահամի ազգականներէն՝ Նաքովրի մեծ ընտանիքէն՝ Ռեբեկայի հանդիպեցաւ։—Ծննդոց 22։20-24. 24։15, 24, 29. 27։42, 43

Սենետրիոնին դիմաց իր արտասանած ճառին մէջ, Ստեփանոս՝ Աբրահամի մասին ըսաւ. «Անոր հօրը մեռնելէն յետոյ անկէ փոխադրեց զանիկա այս երկիրը, ուր դուք հիմա կը բնակիք»։ (Գործք 7։4) Ասիկա ցոյց կու տայ թէ Եհովա Աբրահամի հետ հաղորդակցութեան մէջ եկաւ Խառանի մէջ։ Տրամաբանական է հաւատալ թէ այդ առիթով Եհովա Աբրահամի հետ իր ըրած ուխտը կրկնեց, ըստ Ծննդոց 12։1-3–ի արձանագրութեան, քանի որ ուխտը ի զօրու եղաւ երբ Աբրահամ Քանան փոխադրուեցաւ։ Ուստի, բոլոր իրողութիւնները նկատի առնելը, այն եզրակացութեան կը հասցնէ մեզ թէ Եհովա Աբրահամի հետ իր ուխտը ըրաւ Ուրի մէջ եւ զայն վերահաստատեց Խառանի մէջ։

[Ստորանիշ]