Hapo Mukuru u ri apehe?
Eziriro okuza mOmbeibela
Mukuru u yenena okumuna oviṋa avihe nu u yenena okutjita otjiṋa ngamwa apehe pavanga. (Omiano 15:3; Ovaheberi 4:13) Posi yokutja Ombeibela kai hongo kutja Mukuru u ri poṋa apehe moviṋa avihe. Nungwari, i honga kutja eye omundu nu u noruveze pe kara.
Omuano Mukuru me ri : Mukuru eye omundu wombepo. (Johanes 4:24) Eye kamunika kovandu. (Johanes 1:18) Ovirimunikise vya Mukuru mbi ri mOmbeibela aruhe vi raisa kutja eye u ri poruveze kaaṋi ndo. Eye keya rora okuraisiwa otjomundu ngu ri apehe.—Jesaja 6:1, 2; Omavandururiro 4:2, 3, 8.
Omaturiro wa Mukuru: Mukuru u tura kombanda meyuru, oro ndu ri oruveze ndwa panguka koviutwa kombanda yehi. Kombanda ngo, Mukuru u nomaturiro we “meyuru.” (1 Ozombara 8:30) Ombeibela i tamuna oruveze rumwe oviutwa vyeyuru maa vi ‘sokumunika komurungu wa Muhona,’ a pu mape raisa kutja Mukuru u noruveze pa tura.—Job 1:6.
Ndovazu Mukuru ke ri apehe, hapo eye ma yenene okurikendera kwami kourike wandje?
Ii. Mukuru u rikendera kovandu kourike wawo. Nandarire kutja wa tura meyuru, Mukuru u muna imba mbe vanga okutjita ombango ye kombanda yehi nu u ve vatera. (1 Ozombara 8:39; 2 Ekuruhungi 16:9) Tara komuano Jehova me rikendera ku imba mbe mukarera tjiri:
Tji mokumbu: Jehova u yenena okuzuvira ongumbiro yoye tjimanga.—2 Ekuruhungi 18:31.
Indu tji wa u momuinyo: “Muhona u ri popezu na imba mbe noruhoze, nu u yama imba mbe rihahiza.”—Epsalme 34:18.
Indu tji mohepa omuhunga: Jehova “me kuhongo nu me ku urikire ondjira,” okupitira mEmbo re Ombeibela.—Epsalme 32:8.
Omazuviro woposyo ohunga nokutja Mukuru u ri apehe
Omazuviro woposyo: Mukuru u ri apehe moviutwa.
Owatjiri: Mukuru ke ri apehe kombanda yehi poo moviutwa mbi tu yenena okumuna meyuru nehi. (1 Ozombara 8:27) Otjiperi kutja ozonyose noviutwa vi “serekarera ounene wa Ndjambi.” (Epsalme 19:1) Posi yokutja, Mukuru ke ri moviutwa vye tjimuna omuperende tje ha kara moviṋa mbya perende, nandarire kutja otjiperendero tji yenena okuturaera ovingi ohunga nomuperende. Momuano otjingewo, oviṋa mouye vi tu raera ohunga ‘novihamunika vya Ndjambi,’ tjimuna omasa we, ounongo norusuvero.—Ovaroma 1:20.
Omazuviro woposyo: Mukuru ma sokukura apehe kokutja ma tjiwe oviṋa avihe nokuraisa omasa we aehe.
Owatjiri: Ombepo ya Mukuru ondjapuke ongeri omasa we nge ungurisa. Nombepo ye ondjapuke, Mukuru u yenena okuungura otjiṋa ngamwa atjihe, ngamwa apehe, oruveze aruhe nokuhina okukara po omuini.—Epsalme 139:7.
Omazuviro woposyo: Epsalme 139:8 rihonga kutja Mukuru u ri apehe nu ri tja: “Nande rondo keyuru Ove tjandje oku u ri; nande kaṱara motjovakoke Ove tjandje omu u ri wina.”
Owatjiri: Etjangwa ndi ka ri nokuhungira poṋa Mukuru pe kara. Ma ri tu honga kutja ka pe noruveze ndu ri kokure na Mukuru okutuvatera.
a Jehova ena ra Mukuru otja tji ra raisiwa mOmbeibela.
Mo yenene okutara ku imbi wina
OMAZIRIRO KOMAPURIRO WOMBEIBELA
Ombepo ondjapuke otjikeṋa?
Mena repu esemba Ombeibela i tja ombepo ondjapuke “omake” wa Mukuru.
OHUNGA NA EṰE
Ningira omahongero wOmbeibela wotjari
Hungirira kepuriro rOmbeibela, poo rihonga ovingi ohunga nOvahongonone va Jehova.