Ombeibela ya tamuna ohunga nokatetu otjikando tjimwe uriri mu Levitikus 19:28, ndi tja: “Kamu nakuritjanga ko ozondja motutu tweṋu.” Mukuru wa yandja erakiza ndi kotjiwaṋa tjOvaisrael okuvehaṋa peke ku novandu mba ri ongondoroka na wo, mbaave ritjanga komikova vyawo omana womukuru wawo. (Deuteronomium 14:2) Nandarire kutja Ovakriste kave ri kehi yetwako ra Moses, owo mave sokuripura ohunga nokutja etwako ndo ri raisa ye ohunga noviṋa Mukuru mbya vanga.

Hapo Omukriste ma sokuritona okatetu?

 Omazeva wOmbeibela ngu maye kongorera mba maye tu vatere okuripurira kotjiṋa hi:

•   ‘Ovakazendu momuzaro wawo mave sokurira ovahirona.’ (1 Timoteus 2:9) Omurari mbwo mau kamburira mo ovakazendu novarumendu. Eṱe matu sokuraisa ondengero koumune wavarwe nu katu sokunanena ombango kweṱe oveni tjinene.

•   Ovandu tjiva ve ritona outetu okuraisa kutja orupa rwokambumba kaaṋi poo okuraisa kutja ve nousemba wokutjita ngamwa atjihe tji mave vanga korutu rwawo. Posi yokutja, Ombeibela i tunduuza Ovakriste kutja ngave, ‘tue po otutu twawo pombunguhiro jomuinjo nojoujapauke nojorutjato ruaMukuru, a rire oukarere ueṋu uozondunge.’ (Ovaroma 12:1, EEP) Ungurisa ‘ozondunge’ poo ounongo okutara kutja ongwaye tji mo vanga okatetu. Indu tje ri mena rokutja ovandu ovengi ve noutetu poo mo vanga okuraisa kutja oove worupa rwokambumba kaaṋi, zemburuka kutja ove mape ya o rundurura oumune ohunga nokuvanga okatetu ngunda oko ake karerera. Okukonḓonona ozonḓero zoye maku ku vatere kutja u toore omukambo omusemba.—Omiano 4:7.

•   “Omeripura wepatje ye eta ovihohe ovingi; nungwari ingwi ngu parapara tjinene ma kara nouhepe.” (Omiano 21:5) Ovandu potuingi ve hakahana okuritona okatetu, posi ya iho tji yenena okuṱuna kovandu varwe nu wina ku tjita kutja i rire ouzeu okumuna oviungura. Nu okuritona okatetu ke kosa ovimariva ovingi nu tji mo isa ko, u hihamwa. Ovakonḓonone nozongetjefa nḓe isa mo outetu ze raisa kutja ovandu mbe ritona outetu va kakara nomuhihamwatima.