Omuatje omuzandu omutanda wena Will wa tja, “Ombeibela katjiṋa tji tji nana ombango yomundu indu tji u hi nokutjiwa omuano omusemba okuilesa.”

 Nu hapo mo vanga okutjiwa omuano mbu mau ku vatere okulesa Ombeibela yoye nondjoroka? Orupa ndwi maru yenene okukuvatera.

•  Tjita kutja oviṋa mbi mo lese u vi mune keho

•  Konḓonona

•  Ovakweṋu ve tja vi

 Yandja ombango ku imbi mbi mo lese. Mo yenene okuungurisa oviṋa mbi mavi kongorere kehi mba:

1.   Toorora ehungi rOmbeibela ndu mo vanga okukonḓonona. Mo yenene okupaha ehungi okuza ku rimwe rOmaevangeli, poo okuza komanyando wOmbeibela omalesewa nge ri ko-jw.org.

2.   Lesa ehungi. Mo yenene okulesa kove omuini poo ku nomapanga neṱunḓu roye. Omundu umwe ma yenene okulesa ehungi ngunda varwe amave rire ovanyande vehungi.

3.   Tara kutja mo yenene okuungurisa ondunge imwe poo zarwe nḓu mo pewa mba:

   •   Perenda oviperendero mbi mavi kahurura ehungi kaaṋi ndo. Poo perenda oviperendero mbi mavi serekarere ovitjitwa otja tji mavi kongorerasana. Kehi yoviperendoro mbyo tjanga kutja mape tjitwa ye.

   •   Indu tji mo lese ohunga nomundu ngwa ri omuṱakame, tjanga ovikaṋena novitjitwa vye nozondaya nḓa muna.

   •   Tjita kutja ehungi ndi mo lese ri rire ombuze. Tjita aayo mo hungire ombuze ndjo momiano pekepeke, nu “pura omapuriro” kovanyande mehungi ndo na varwe mbu mave tarere.

   •   Umwe wovandu mehungi tja tjiti ondataiziro, ripura kutja eye atja tjita vi. Otjotjihorera, ripura na indu Petrus tja paṱana Jesus. (Markus 14:66-72) Omomuano uṋe Petrus ma tja tuurunga omarorero ngo?

   •   Tji mo munu kutja u nounongo mbwa yenene tjanga ehungi rovitjitwa roye omuini nda zikamene kOmbeibela. Tjanga oviṋa ovandu mbi mave yenene okurihongera ko okuza kehi ndo.​—Ovaroma 15:4.

 Indu tji wa konḓonona nawa ove mo yenene okumuna oviṋa vyarwe ovinanḓengu mehungi ndo. Rumwe embo rimwe poo yevari ondi twa po ombangu mehungi rOmbeibela.

 Otjotjihorera, sasaneka Mateus 28:7 na Markus 16:7.

•    Omena raye Markus tja tja Jesus ma sokuhakaena ku novahongewa ve nu tjinene ku na “Petrus”?

•  Eziriro: Markus ka munine ovitjitwa mbi keho; nungwari ondjivisiro ndjo wa isa ku Petrus.

•  Otjiṋa otjinanḓengu: Ongwaye Petrus tja ri nohange okuzuva kutja Jesus ma vanga okumumuna rukwao? (Markus 14:66-72) Omomuano uṋe Jesus ma raisa kutja epanga ratjiri ku Petrus? Omomuano uṋe mu mo yenene okuhorera ku Jesus nu mo rire vi epanga ratjiri ku varwe?

 Indu tji mo konḓonona omatjangwa nawa na tji mo tjiti kutja oviṋa mbi mo lese u vi mune keho, Omalesero wOmbeibela ye uta okukupa ondjoroka