Otja korapota imwe ape ohinga yovandu mba konḓononwa okuza pozombura 15 nga 19 va kara norupa momahakaeneno womonyama nge ungurisa otjinyo. Omutjange wembo ndi Oral Sex Is the New Goodnight Kiss wena Sharlene Azam wa tja: “Indu tji wa hungire pu nomitanda [ohunga nomaungurisiro wotjinyo momahakaeneno womonyama] owo ve ku raera kutja imbyo oviṋa uriri. Ku nao owo ve muna kutja ingo kamahakaeneno womonyama.”

•  Ove u noumune uṋe?

•  Ouatjiri oouṋe?

•  Ongwaye tje ri ohepero?

 Hapo ove mo tja ii poo kako komapuriro ngu maye kongorere mba?

1.   Hapo omuatje omukazona mape ya a rire otjingundi mena romaungurisiro wotjinyo momahakaeneno womonyama?

   1.   Ii

   2.   Kako

2.   Hapo omaungurisiro wotjinyo momahakaeneno womonyama mape ya aye eta omitjise?

   1.   Ii

   2.   Kako

3.   Hapo okuungurisa otjinyo omahakaeneno womonyama?

   1.   Ii

   2.   Kako

 Sasaneka omaziriro woye ku na inga ngu maye kongorere mba.

1.   Hapo omuatje omukazona mape ya a rire otjingundi mena romaungurisiro wotjinyo momahakaeneno womonyama?

    Eziriro: Kako. Indo epu rimwe ovandu ovengi ndi ve ripura kutja okutjita nao kaku novikongorereko ovivi mbi ku yeta, posi ya imbwo kauatjiri.

2.   Hapo omaungurisiro wotjinyo momahakaeneno womonyama mape ya aye eta omitjise?

    Eziriro: Ii. Omundu ngu ungurisa otjinyo momahakaeneno womonyama u yenena okumuna omutjise wehuri, ozomburusese nḓe pita korutu rwourumendu poo rwoukazendu, otjikamwaha, ozosurute nḓe pita korutu rwourumendu poo rwoukazendu, ehinga, novitjwava.

3.   Hapo okuungurisa otjinyo omahakaeneno womonyama?

    Eziriro: Ii. Omahakaeneno ngamwa ngu maye kamburire mo okutuṋa koviṋepo vyomundu warwe, tjimuna omahakaeneno womonyama pokati kovandu vevari, omaungurisiro wotjinyo koviṋepo vyourumendu novyoukazendu, okutundukasana kotutu twokongotwe, nokuṱuna koviṋepo vyourumendu poo vyoukazendu, avihe mbi omahakaeneno womonyama.

 Tara komazeva tjiva nge ri mOmbeibela ngu maye ku vatere okuzuva nawa kutja Mukuru u noumune uṋe ohunga nomaungurisiro wotjinyo momahakaeneno womonyama.

 Ombeibela i tja: “Ndjambi u vanga kutja mu . . . ritjaere oparukaze koruvakiro.”—1 Ovatesalonika 4:3.

 Embo ndi “oruvakiro” meraka orini ku ra torokwa ri kamburira mo omaungurisiro ayehe nge tjitwa pendje norukupo, tjimuna omahakaeneno womonyama pokati kovandu vevari, omaungurisiro wotjinyo koviṋepo vyourumendu poo vyoukazendu, okutundukasana kotutu twokongotwe, nokuṱuna koviṋepo vyourumendu poo vyoukazendu. Omundu ngu tjita oruvakiro u ṱuna koupanga we ku na Mukuru nu u kara novikongorereko vyarwe ovivi.—1 Petrus 3:12.

 Ombeibela i tja: “Omundu ngu vakira eye u tjita ouvi korutu rwe omuini.”—1 Ovakorinte 6:18.

 Omundu mape ya a vere nu a zunḓa oupanga we ku na Mukuru indu tja ungurisa otjinyo momahakaeneno womonyama. Nu wina, aye tjiti kutja omundu ma kare nomeripura omavi. Embo ndi Talking Sex With Your Kids ra tja: “Ovandu mbe kara nomahakaeneno womonyama komurungu worukupo povikando tjiva ve kara nomuhihamwatima, poo okufula kutja omundu ingo warwe ke nokuripurira ku wo. Nu otjiṋa hi matji yenene okutjitwa momahakaeneno womonyama ngamwa ayehe. Omahakaeneno womonyama ngamwa ayehe ye novikongorereko.”

 Ombeibela i tja: “OwAmi Muhona Ndjambi woye, ngu mbi vanga okukuhonga ihi tji tji ri ombatero kove.”—Jesaja 48:17.

 Hapo u muna kutja omarakiza wa Mukuru ohunga nomahakaeneno wonyama tjiri ye ku yetera ouwa? Poo u muna kutja ye ku ṋiṋikiza? Okukuvatera okuzira omapuriro ngo, ripura ohunga nondjira pu pe tupuka ozohauto ozengi mu mu nomaropota, noviraisiro vyondjira. Hapo ove mo munu kutja omaropota noviraisiro vyondjira mbyo mavi ku ṋiṋikiza poo mavi ku tjevere? Hapo mape tjitwa tjike indu ove novahinge varwe tji mu hi nokukongorera oviraisiro mbyo?

 Omirari vya Mukuru wina vi ri nao. Indu tji u hi nokuvikongorera, ove mo kunu imbi mbi mo kondo. (Ovagalate 6:7) Embo ndi Sex Smart ra tja: “Indu tji wa isa oviṋa mbi u kambura mo, nu o utu okukara norupa moviṋa mbi mavi tjiti kutja o ha fula nawa, iho tji wisa onḓengu yoye.” Nungwari indu tji mo hupu otja komirari vya Mukuru, mo kara nongaro ombwa yomeritjindiro. Nu tjinenenene, ove mo kara nomeritjiviro omawa womomutima.—1 Petrus 3:16.