Omariro wOpaska omasenina wa Jesus ya ri omananḓengu. Mena rokutja wa ri pokuzepewa, eye we rirongerisa okurya omariro wOpaska puna ovaapostele ve nokutjiukisa Omariro Omayapuke wa Muhona. Kunao, eye wa hinda Petrus na Johanes okukarongerisa etuwo mu mave karira mo Opaska. (Luk 22:7-13; tara kotjiperendero tjokombanda.) Ihi matji tu zemburukisa ounanḓengu wokurirongerisa kOmariro Omayapuke nge ri momayuva nga 27 ku Marta. Otjingaperi kutja ombongo ya tjita rukuru ondyero yokutja ouṋe ngu ma kayandja ehungi, ouṋe ngu ma karongerisa omboroto nomavinu noviṋa vyarwe otja imbyo. Hapo eṱe oveni matu rirongerisa vi kOmariro Omayapuke?

Rongerisa omutima woye. Lesa nokuripura oukoto komalesero wOmbeibela wOmariro Omayapuke. Mo yenene okumuna ongongorasaneno yomalesero wOmbeibela ngo mokambo nga Konḓonona omatjangwa eyuva arihe. Nu mokambo kokukonḓonona Embo ra Mukuru orupa 16 mu nongorasaneno yondjivisiro onyingi. (Lesa okambo komakonḓononeno kEhupo notjiungura tjetu tjokuzuvarisa ka April 2020.) Omaṱunḓu maye yenene okumuna ondjivisiro ohunga notjisuta tjonguturiro momerikotameneno wawo weṱunḓu mokuungurisa o-Watch Tower Publications Index poo Okambo komakonḓononeno kOvahongonone vaJehova.

Ṋanga varwe. Kara norupa okuura mokuhandjaura oumbapira womaṋangero. Ripura novandu mbu mo yenene okuṋanga, tjimuna ovandu mbu mo sokukavarura rukwao, ovahongwa wOmbeibela ovakuru, ovatjiwasane, novazamumwe. Ovanene vombongo mave sokuṋanga imba mba yaruka ombunda mongamburiro. Zemburuka kutja indu omundu tje ha kara momaturiro weṋu, mo yenene okupaha kutja Omariro Omayapuke ma ye kara pi momaturiro we, mokunḓereka omambo nga OHUNGA NA EṰE nge ri komukuma wokomautiro morungovi ndwi jw.org, okuzambo nḓereka omambo nga “Omazemburukiro wonḓiro yaJesus.”

Ovikeṋa vyarwe mbi mo yenene okutjita okurirongerisa kOmariro Omayapuke?