“Oure wozombura 19 ee undju otjiṋa hi!” Hapo omukambure omukwetu ingwi aa undju tjike? Aa undju Etestamente epe ro-New World Translation meraka re rOtjibengali. Ovandu ovengi ve raisa ongaro ndjo indu o-New World Translation tji ya pitisiwa momaraka wawo. Hapo ove wa rora okuripura kutja ku kamburira moye okuyenena okutoroka nokupitisa Ozombeibela nḓa?

 Otjitenga, Okomiti Otjange yOrutu Orunane i zikamisa otjimbumba tjovatoroke. Ku kambura orure nḓu ta pi okutoroka Ombeibela? Nicholas Ahladis ngu ungura morupa romatorokero moWarwick, tja New York, wa kahurura kutja, “Ku kamburira mo oviṋa ovingi tjimuna ovatoroke ve nga pi pu ma yenene okuungura otjiungura hi, eraka ezeu pu pi ta pi, ovalese mave tjiwa ombazu yoruveze rOmbeibela poo indee, nokutja eraka ra panguka okuza korukondwa rumwe nga ku rwarwe. Ku kambura ombura imwe poo ozombura ndatu ovatoroke okumana okutoroka Omatjangwa wOtjigrike uriri, ku kambura ozombura ine poo kombanda yanao okumana okutoroka Ombeibela aihe, nu ku kambura ozombura ozengi tjinene okuyenena okumana okutoroka Ombeibela meraka rotjikume.

 Katu hepa otjimbumba tjovatoroke okutoroka Ombeibela uriri, posiya wina tu hepa otjimbumba tjovalese okuza kotukondwa pekepeke poo komahi warwe okutara omatorokero wetu nu ve tjita nao nokuhina okusutwa. Owo ve vatera ovatoroke okupitisa Ombeibela ongahu nu ndji mai yenene okuzuvakwa nawa. Omurumendu omukambure ngu rongerisa ovatoroke okutoroka Ombeibela moSouth Africa wa tja: “Ovatoroke ve tjiwa kutja ve nomerizirira omanene ku Jehova na ku imba mbu mave kalesa Embo re.”

 Ombeibela ndji tji ya manuka okutorokwa i hepa okuprindwa nokukakaterisiwa kumwe. Okutjita nao ovaprinde ve ungurisa “oviṋa” omurongo mbi: Ombapira, oinka, erapi ndi kakatera kotjipapeko, otjikakaterise, okarapi ku ke hindisiwa motjipapeko, otjipapeko otjingerei, ozongoze nḓe twa me wa mOmbeibela, okarapi ku ke kakaterisa ozombapira kumwe, okarapi ku ke ṱiza otjipeko, nokarapi karwe ku ke vatera okuṱiza Ombeibela kumwe. Mo 2019 ozondola zAmerika zokombanda yomakete 20 za ungurisiwa okuranda oviungurisiwa mbi. Nu mombura ndjo ovakambure ovakwetu mbe ungura motjiungura tjokuprinda ozOmbeibela va ungura ozoiri zokombanda 300 000 okuprinda nokupitisa Ozombeibela.

 Ongwaye tji tu ungurisa oruveze novimariva ovingi koviungura mbi? Joel Blue worupa rwomaprindiro wouye auhe wa tja: “Ombeibela eembo enahepero momambo aehe ngu tu pitisa, kunao tu vanga kutja ombunikiro yaro i yandje ondjozikiro ku Mukuru na kombuze ndji tu zuvarisa.”

 Nu wina tu pitisa O-New World Translation kovandu mbe hepa ombatero yapeke. Otjotjihorera Ombeibela ndji O-New World Translation yovapoṱu ya torokwa momaraka omurongo. Okuungura Ombeibela yOvapoṱu ku kambura ape ozoiri hambondatu, nu omambo ngo ye kambura oruveze rozomita 2.3. Wina tu pitisa ozOmbeibela nḓa ungurwa notjipapeko tjombapira ku imba mbe ri motjovakamburwa.

 Ombeibela ndji o-New World Translation i ṱuna kehupo rovalese. Tara kombongo yeraka rOtjikiluba motjirongo tja Tombe, moDemocratic Republic of the Congo. OTombe tji ri ozokilomita 1 700 kokure notjihuro ohongora. Ovahongonone va Jehova va ri nOmbeibela imwe uriri meraka ekuru rOtjikiluba. Ovarumendu ovakambure aave yandjasana Ombeibela imwe ndji, indu tji mave rirongerisa kozombongarero zombongo. Posiya okuza ku Auguste 2018 o-New World Translation ya pitisiwa meraka rOtjikiluba, nu omundu auhe mombongo wa yenena okumuna Ombeibela ndji.

 Omukazendu omukambure ngu hungira eraka rOtjindoitji ohunga no-New World Translation meraka re wa tja: “Ami hi u hara ame tja me vanga okukalesa Ombeibela, posiya mbi tja oruṋe tji me yenene okulesa ovingi?” Omurumendu umwe motjovakamburwa wa tjanga nai: “Ami mba pewa Ombeibela ndji o-New World Translation nu yarundurura omuinyo wandje. Mokulesa Ombeibela ndji nai mbi zuva nawa Embo ra Mukuru. Ami mbi vanga okutjiwa ovingi ohunga nOvahongonone va Jehova nokutja me yenene okurira vi umwe wawo.”

 Avehe mbe lesa o-New World Translation ve nondangi koviyandjewa vyouharupu mbi vatera omapitisiro wOmbeibela ndji. Oviyandjewa vyouharupu mbi yandjewa kOviungura vyOuye auhe, vi yandjewa okupitira morungovi ndwi donate.dan124.com. Okuhepa tjinene kouharupu weṋu.