OUMUNE WOVANDU

Ovandu ovengi ve muna kutja okundopola tji kwa yandjerwa kotjiveta, oro ehore ndi hi noumba. Nu ohoromende i yandja otjimariva komiano tjiva vyokundopola mbi ri kotjiveta kutja i mune mo otjitjamurongo okuvatera na tjo ovature vehi ndo.

OMBEIBELA MAI TJA

Kape nopoṋa pu pa tamunwa mOmbeibela ohunga nokundopola. Posi ya oyo i yandja omirari mbi tu vatera okutjiwa kutja Mukuru u fula vi ohunga nokundopola.

Okundopola ku ku ri okutaara ovimariva mbya zu kovandu varwe, ku vetasana otjiuru ku nerakiza rOmbeibela ndi tja: “Ritjevereye koukorokope ngamwa auhe.” (Lukas 12:15) Ovandu mbe ndopola ve hingwa i yomunenetima. Ozonganda mu mu nomanyando ngo, ze tjivisa okutaara otjimariva otjingi ngunda aze hi nouatjiri auhe wokutja omundu mape ya a ha taara, mena rokutja ve tjiwa kutja ovandu ve vanga okutumba ku ku tjita kutja ovanyande ve yandje ovimariva ovingi mozonganda nḓo. Pendje nokuvatera kutja omundu a ha kara nomunenetima, okundopola ku tjita kutja ma kare nonḓero yokumuna ovimariva oupupu.

Omundu ngu ndopola u ripurira ku ye omuini, nu eye u ripurira kokutaara ovimariva ovanyande varwe mbi va pandjara. Nungwari Ombeibela i tja: “Ape ha kara omundu ngu me ripahere ombwiro ye porwayo, nungwari auhe nga pahe ombwiro yomukwao.” (1 Ovakorinte 10:24) Nu rimwe rOmatwako omurongo ri tja: “Ko nokunanukira ko . . . ngamwa atjihe omukweṋu tje na tjo.” (Eksodus 20:17) Omundu ngu ndopola u ripurira kokutaara, ku nao eye undjira ko kutja varwe ve pandjare ovimariva vyawo kokutja eye ma munine po ovimariva ovingi.

Ombeibela wina i tu rakiza kutja atu ha munu kutja ouṋingandu u za momasa omahimise. MoIsrael otjikuru, pa ri na tjiva mbe hi na va ri nongamburiro mu Mukuru nu mba uta okukarera “oomukuru vovisenginina vouṋingandu.” Hapo Mukuru aa yakura omerikotameneno ‘koomukuru vovisenginina vouṋingandu?’ Kako, eye we ve raera kutja: “Eṋe mwa tjita ouvi namu ritoororere okutjita imbi Ami mu mbi hi nonyuṋe.”—Jesaja 65:11, 12.

Otjingaperi, kutja motupa tjiva mouye ovimariva mbya zu mokundopola ku kwa yandjerwa kotjiveta vi ungurisiwa okusuta omahongero, okukurisa ongorongova mehi ndo nokuungurisiwa moviṋa vyarwe vyotjiwaṋa. Posi ya, omaungurisiro wovimariva mbi kau rundurura omuano wokutja ovimariva mbi vya zu movitjitwa mbi tjita kutja ovandu ve kare nomunenetima, ve ripurire ku wo oveni nu u tunduuza ouripura wokumuna otjiṋa oupupu.

“Ko nokunanukira ko . . . ngamwa atjihe omukweṋu tje na tjo.”—Eksodus 20:17.

OMBEIBELA MAI TJA

Ombeibela i rakiza kutja “ovandu imba mbe vanga okutumba ve wira momarorero na mongwehe yozonḓuma ozengi zouyova nozonḓepe, nḓe ve ṱomwinisa monyoneno na mombandjarero.” (1 Timoteus 6:9) Okundopola ku tjita kutja omundu ma kare nomunenetima, nu omunenetima poo oukorokope ounaumba tjinene. Ku nao Ombeibela ya tamuna ‘oukorokope’ mokati kovikaṋena vyarwe mbi tu ha sere okukara na vyo.—Ovaefese 5:3.

Okundopola ku tjita kutja omundu ma suvere ovimariva, mena rokutja u yandja ombango kokutjita ovimariva tjimanga. Ombeibela i tja okusuvera ovimariva “omuze wourunde ngamwa auhe.” Nu oyo wina i tja imba mba suvera ovimariva “ve rietera omihihamo omizeu momitima.”—1 Timoteus 6:10.

Omunenetima u tjita kutja omundu a ha kowa movimariva mbye na vyo, nu iho tji tjita kutja a ha kara nondjoroka yatjiri. “Ingwi ngwa suvera ovimariva kamaa munu ovimariva mbya yenene; nu ingwi ngwa suvera outumbe kamaa munu ovihohe mbya yenene.”—Omuzuvarise 5:10.

Omangete omengi wovandu mbe nanukirwa i yokundopola ve kerimuna mongwehe yokundopola, nu i rira ouzeu ku wo okuisa okundopola. Ouzeu mbwo u ri mouye auhe. Nu moAmerica atjiyerike pe novandu ovengi mbe muna ouzeu okuisa okundopola, otja komakonḓononeno.

Embo romiano ri tja: “Outumbe mbu munika oupupu, korusenina kau nakukaserwa ondaya.” (Omiano 20:21) Okundopola kwa tjita kutja ovandu ve kare nozondjo nu nandarire ve mbangorote, nu kwa tjita kutja ovengi ve pandjare oviungura, otukupo, nomapanga wawo. Okuṱakamisa omirari vyOmbeibela maku yenene okuvatera omundu koumba mbu za mokundopola mbu ṱuna kehupo nondjoroka ye.

“Ovandu imba mbe vanga okutumba ve wira momarorero na mongwehe yozonḓuma ozengi zouyova nozonḓepe, nḓe ve ṱomwinisa monyoneno na mombandjarero.”​—1 Timoteus 6:9.