Hapo Mukuru omungendu?
Ovandu ovengi ve tja ve kambura mu Mukuru. Posi yokutja tji we ve pura kutja Mukuru omungendu, mo munu omaziriro pekepeke. Kovandu tjiva, Mukuru omupangure ngu hi notjari, nu ngu vanga okuvera ovandu uriri kouvi mbu ve tjita. Ku varwe, eye omundu omunarusuvero ngu isira kainatja kutja twa tjiti tjike. Posi yokutja varwe ngunda ve kambura kutja Mukuru u ri kokure tjinene nu ke nonḓero mweṱe. Ovengi tji va zuu oviṋa mbya panguka tjinene nai ohunga na Mukuru, ve muna kutja kamaave yenene okutjiwa kutja Mukuru tjiri omungendu.
Hapo otjiṋa otjinanḓengu okutjiwa kutja Mukuru omungendu? Ii, otjiṋa otjinanḓengu tjinene. Okutjiwa Mukuru nawa ku yenene okuyandja omuhunga kehupo roye. (Oviungura 17:26-28) Otja pu mo tumbuka popezu na Mukuru, eye opu me ku suvere nokukuvatera. (Jakobus 4:8) Okutjiwa Mukuru nawa ku twara komuinyo waaruhe.—Johanes 17:3.
Mo yenene vi okutjiwa Mukuru nawa? Ripura nomundu ngu u tjiwa nawa, tjimuna epanga roye roposengo. Hapo oupanga weṋu wa uta vi? Mape ya wa tjiwa ena re, ovikaro vye, oviṋa mbya suvera, noviṋa mbye ha vanga, oviṋa mbya tjita na mbye tanda okutjita, na varwe. We rihonga ohunga na ye, nu imbi ooviṋa mbye ku nanena ku ye.
Momuano otjingewo, matu yenene okutjiwa Mukuru mokuripurira komapuriro ngu maye kongorere mba:
Okambo nga make yandja omaziriro wOmbeibela komapuriro ngo. Otupa mokambo nga katu nokukuvatera okurihonga ohunga na Mukuru uriri, nungwari wina matu raisa kutja ouwa waye mbu mo munu tji wa rire epanga re.
