Mena rokutja twa za momundu omutenga Adam, atuhe oweṱe ovazamumwe. Nandarire kutja ovazamumwe ve sokuraisasana orusuvero nondengero, ndino ouzeu okumuna orusuvero otja indwo. Iho katjiṋa Mukuru wetu worusuvero tje zera.

“Suvera omukweṋu otja tji mo risuvere omuini.”—LEVITIKUS 19:18.

“Suvereye ovanavita na eṋe.”—MATEUS 5:44.

Tara komuano Mukuru me kahurura orusuvero mo 1 Ovakorinte 13:4-7:

“Orusuvero ru nomuretima, ru nounyaṋutima.”

Ripura kutja: Hapo ove u kara noumune uṋe indu varwe tji mave raisa omuretima notjari kove na indu tjive hi nokupindika tjimanga tji wa tataiza?

“Orusuvero karu neruru.”

Ripura kutja: Hapo ove u kara noumune uṋe indu varwe tji ve ku hakera moviṋa mbi u ha tjiti poo tji ve neruru na ove?

Orusuvero “karu ripahere ombwiro yarwo.”

Ripura kutja: Hapo ove u kara noumune uṋe indu varwe tji mave puratene koumune woye nokuhinokuṱaṱera koumune wawo uriri?

Orusuvero “karu zemburuka ouvi.”

Ripura kutja: Mukuru u ri kamwaha okuisira ovandu mbe ritanaura komauvi wawo. “Eye kamaa kara pokutuverera omauvi wetu, nu kamaa panḓere pomazenge we.” (Epsalme 103:9) Eṱe tu kara nondangi indu omundu ngu twa pindikisa tje tu isire. Kunao matu sokurira ovapaturuke okuisira varwe tji ve tu pindikisa.—Epsalme 86:5.

Orusuvero “karu nyandere ouhasemba.”

Ripura kutja: Indu tji pe notjiṋa otjivi tji tja tjitwa kweṱe, eṱe ka tu vanga kutja varwe ve tu nyekerere. Kunao ka tu nyekerere varwe tji veri mouzeu, nandarire kutja ve tu tjinda navi.

Kutja tu yorokere ozondaya za Mukuru, eṱe matu sokusuvera varwe nokuhinokutara kozombura, komuhoko, poo kozongamburiro zawo. Omuano umwe mu matu yenene okuraisa orusuvero ndwo omokuvatera imba mbe nouhepe.