OVANDU

Ombeibela i tja: Muhona ‘ka ungurire [ehi] kutja ri kare ongaango, nungwari kutja ri rire poṋa povandu okutura mo.’ —JESAJA 45:18.

EHI

Ombeibela i tja: “Omuhoko umwe u za po, nu warwe au ya, nu ouye vari owo u karerera.” —OMUZUVARISE 1:4.

ETJANGWA NDI MARI HEE TJIKE?: Otja kOmbeibela, ehi kamaari nyonwa nu ovandu mave tura mu ro nga aruhe. Nu hapo, omaandero wouye maye hee tjike?

RIPURIRA KU IMBI: Ombeibela i sasaneka omaandero wouye mbwi ku na imbi mbya tjitwa momayuva wa Noa. Oruveze ndwo ehi ‘re urire nozondjito zoutwe.’ (Genesis 6:13) Posi ya, Noa wa ri omurumendu ngwa tjiti ousemba. Ku nao Mukuru wa yama Noa neṱunḓu re, nu wa yandeka ovarunde nomupupo. Ombeibela i tja nai ohunga noviṋa mbya tjitwa: “Nouye mbwi oukuru wa vandekerwe i omeva, inga omeva womupupo.” (2 Petrus 3:6) Ingo ongaari omaandero wouye. Nu hapo, ovikwaye mbya yandekwa? Kauye, nungwari ovandu ovarunde mba ri kombanda yehi. Ku nao, indu Ombeibela tji mai hungire ohunga nomaandero wouye, oyo kai hee omanyoneno wehi. Nungwari, oyo i heya omaandero wovandu ovarunde kombanda yehi noviṋa vyouye.

OMAUZEU NOURUNDE

Ombeibela i tja: “Mokaruveze okasupi omurunde tjandje ke tji po; tji mo mu paha poṋa pe kara, ko nakumumuna. Ovanandjenda mave rumata ehi, nu mave vyarere ohange onene.”—EPSALME 37:10, 11.

ETJANGWA NDI MARI HEE TJIKE?: Omupupo mbwa tjitwa momayuva wa Noa kau isapere ourunde oparukaze. Kombunda yomupupo, ovandu ovarunde aave tjiti kutja ehupo ri rire ezeu kovandu avehe. Moruveze orusupi, Mukuru ma yandeke ourunde. Tjimuna omutjange wEpsalme tja tja: “Omurunde tjandje ke tji po.” Ku nao, Mukuru ma isa po ourunde okupitira mOuhona we mbu ri ohoromende yomeyuru, ndji mai honaparere po ovandu kombanda yehi mbe nonḓuviro ku Mukuru.

RIPURIRA KU IMBI: Hapo imba mbe honaparera po ehi nai mave kara nohange okuriwisa kehi yOuhona wa Mukuru? Ombeibela i raisa kutja, owo kave nokutjita nao. Owo mave pirukire Ouhona wa Mukuru. (Epsalme 2:2) Okuzambo mape tjitwa tjike? Ouhona wa Mukuru mau pingene ozohoromende azehe zovandu nau “karerere nga aruhe.” (Daniel 2:44) Nu hapo ongwaye ouhonapare wovandu tji mau sokuyanda?

Ombeibela i tja: “Kape na umwe ngu yenena okuryamisa omikambo vye omuini.”—JEREMIA 10:23.

ETJANGWA NDI MARI HEE TJIKE?: Ovandu kave memenwe okurihonaparera po oveni. Owo kave ungura otjiungura otjiwa tjokuhonaparera po ovandu nokuzengurura omauzeu wawo.

RIPURIRA KU IMBI: Embo ndi Britannica Academic ri tja ozohoromende kaze yenene “okuzengurura ousyona, ozondjara, omitjise, omaumba tjimuna omanyinganingiro wehi, ovita noutwe.” Komurungu ri tja: “Omauzeu . . . ayehe nga kutja ye zengururwe, pe hepwa ohoromende imwe uriri ndji mai honaparere po ouye auhe.” Ku nao, nandarire kutja ozohoromende azehe zovandu ze rikutu kumwe, ozo kamaaze yenene okuzengurura omauzeu ngo mena rokutja owo ovandu mbe he ri ohomonena. Ouhona wa Mukuru auyerike ombu mau yenene okuzengurura omauzeu ayehe yovandu.

Otja kOmbeibela, omaandero wouye katjiṋa tji matji sokutiriwa i yovandu ovawa. Posi yokutja, otjiṋa tji matu sokuundja nonḓero mena rokutja Mukuru ma eta ouye oupe na nyono ouye mbwi oukuru.

Oviṋa avihe mbi mavi tjitwa ruṋe? Orupa ndu maru kongorere ko maru ziri epuriro ndo okuza mOmbeibela.