Ouye oupe u ri popezu
Mukuru wa mema ehi kutja ovandu ovasemba ve ture mu ro nga aruhe. (Epsalme 37:29) Eye wa twa mo ovandu ovatenga Adam na Eva, motjikunino otjiwa tja Eden ne ve pe omerizirira pamwe nozondekurona ze okukuna nokutjevera ehi.—Genesis 1:28; 2:15.
Ehi ndino kaparadisa otja Mukuru pa vangere. Posi ya, Mukuru ke ya rundurura ondando ye. Hapo eye ma yenenisa vi ondando ye? Otja tji pa raisiwa motupa tu twa kapita, Mukuru ke nokunyona ehi. Nungwari ma yandjere ovandu ovaṱakame okuhupa mu ro. Indu Mukuru tja yenenisa omakwizikiro we, maku kara ozongaro nḓa sana pi kombanda yehi?
Ohoromende ndji mai honaparere po ouye auhe
Indu ohoromende ya Mukuru yomeyuru tji ya utu okuhonaparera po ovandu avehe, ehi mari rire oruveze rwondjoroka ovandu mu mave tura pamwe mohange nokuungura oviungura oviwa. Mukuru wa zika Jesus Kristus okuhonaparera po ehi. Ndino ovahonapare ovengi kave nakonatja novandu. Posi ya Jesus u rikendera kovandu. Eye ma honaparere po norusuvero nu ma rire Ombara ombwa ndji raisa otjari nousemba.—Jesaja 11:4.
Ombwaneno mouye auhe
Ovandu mbu mave katura kombanda yehi kave nokuhaṋewa i yomaraka poo ozombazu. Ovandu mave wana otjotjiwaṋa tjimwe. (Omavandururiro 7:9, 10) Ovandu avehe mbu mave katura kombanda yehi, mave suvere Mukuru novararanganda vawo. Nowo mave ungura pamwe mohange okuyenenisa ondando ya Mukuru yokutjevera ehi.—Epsalme 115:16.
Ombwaneno pu noviutwa vyehi
Indu Ouhona wa Mukuru tji wa utu okuhonapara kombanda yehi, Mukuru ma kara nouvara kombanda yomuinyo weyuru. (Epsalme 24:1, 2) Indu Jesus tja porisa otjivepo otjinamasa eye wa raisa kutja ma katjita ye nomasa nga pewa i Mukuru. (Markus 4:39, 41) Kehi youhonapare wa Kristus, katu nokuhepa okutira omaumba tjimuna omanyinganyingiro wehi. Ouhona wa Mukuru mau yarura po ombwaneno ndja ri po, pokati kovipuka novandu.—Hosea 2:18.
Ouveruke ouwa novikurya ovingi
Ovandu avehe mave kara nouveruke ouwa. Kape nomundu ngu ma vere, okukurupa poo ngu ma ṱu. (Jesaja 35:5, 6) Ovandu mave kayorokera omaturiro omawa nomakohoke tjimuna tji ya ri motjikunino tja Eden. Mouye oupe, ehi mari kara novikurya ovingi nu ovandu avehe mave kara novikurya mbya yenene. (Genesis 2:9) Tjimuna otjiwaṋa tja Israel otjikuru, ovandu avehe moParadisa mave kara “novingi okurya.”—Levitikus 26:4, 5.
Ohange nondjeverero yatjiri
Kehi yohoromende ya Mukuru, ovandu avehe mouye mave kara mohange nu mave tjindasana norusuvero nousemba. Kape nokukara ovita novanane mbe ungurisa ouvara wawo momuano omuvi novandu avehe mave kara na imbi mbi mave hepa. Ombeibela ya kwizika kutja “auhe ma haama mohange kehi yomuvite na kehi yomukuyu we, nokuhinarive me mu handuza.”—Mika 4:3, 4.
Ozondjuwo ozombwa noviungura ovitjate
Eṱunḓu arihe mari kara nopoṋa okukara nokuhina okutira kutja mave rambwa, noviungura avihe mbi mave ungura mavi kara nondoṋeno. Ombeibela i tja, imba mbu mave katura mouye oupe ‘oviungura, mbi mave ungura, mave munu mo ondoṋeno.’—Jesaja 65:21-23.
Omahongero omasemba
Ombeibela ya kwizika kutja “ehi mari ura nondjiviro yaMuhona.” (Jesaja 11:9) Ovandu mbu mave katura kehi yOuhona wa Mukuru mave rihongere okuza kounongo wOmuute wawo Jehova, noviṋa oviwa mbya ungura. Owo kave nokuungurisa ondjiviro ndjo okuungura ovizepe poo okuhihamisa ovandu varwe. (Jesaja 2:4) Nungwari owo mave rihongo okutura mohange nokutja omomuano uṋe mu mave tjevere ehi.—Epsalme 37:11.
Omuinyo mbu hi nomaandero
Mukuru wa rongerisa ehi kutja tu yenene okuyorokera ehupo eyuva arihe. Eye u vanga kutja ovandu ve hupe nga aruhe kombanda yehi. (Epsalme 37:29; Jesaja 45:18) Kutja ma yenenise ondando ye ndji, Mukuru “ma nyono onḓiro nga ko nga aruhe!” (Jesaja 25:8) Ombeibela i kwizika kutja ‘onḓiro kai tji nakukara po rukwao; noruhoze nomaririro, nomuhihamo kavi tji nakukara po rukwao.’ (Omavandururiro 21:4) Mukuru ma yandja omuinyo waaruhe ku imba mba tuurunga omanyoneno wouye ourunde mbwi, na imba mba ṱa, mbu ma kapendura mouye oupe.—Johanes 5:28, 29; Oviungura 24:15.
Omangete wovandu nai ve rirongerisa rukuru okukahupa kehi yOuhona wa Mukuru mbu ri popezu. Nandarire kutja kava homonena, owo ve kondja okurira ovandu mbu mave yakurwa i Mukuru mouye we oupe. Omomuano uṋe? Omokurihonga ohunga na Jehova Mukuru na Jesus Kristus ngwa hindwa i Ye.—Johanes 17:3.
Rihonga ovingi ohunga nomuano mu mo yenene okutuurunga omaandero wouye mbwi nokukahupa mouye oupe mbu mau ya. Yakura omerihongero wOmbeibela wotjari okuza kOvahongonone va Jehova amo ungurisa embo ndi Yorokera ehupo nga aruhe.
Mo yenene okutara ku imbi wina
ORUHUNGU
Ouhona wa Mukuru mau yenenisa ye?
Jesus aa tjiwa kutja Ouhona wa Mukuru oohoromende aiyerike ndji mai yenene okuisapo omauzeu kombanda yehi. Otjikeṋa Ouhona mbo mbu wa yenenisa mbi mavi kurisa ongamburiro yetu?
