“Mamu sokukara katumba, tjinga amu hi nakutjiwa indi eyuva na indji oiri oviṋa mbi tji mavi tjitwa.”—MATEUS 25:13.

“Ṱakamiseye, kareye katumba, orondu eṋe kamu nakutjiwa kutja omayuva ngo maye ya ruṋe.”—MARKUS 13:33.

Kape nomundu kombanda yehi ngu ma tjiwa kutja ouye mau yanda ruṋe. Posi yokutja, Mukuru porwe ongu ma tjiwa ‘eyuva ndo noiri.’ (Mateus 24:36) Hapo mape hee kutja kape nomuano wokutjiwa kutja omaandero maye ya ruṋe? Katji pe ri. Jesus wa raera ovahongewa ve okutara kovitjitwa tjiva mbi mavi raisa kutja omaandero ye ri popezu.

Jesus wa hungirira kovitjitwa mbi mavi tjitwa kuṱa ‘komaandero wouye mbwi’ nu wa tja: “Otjiwaṋa tjimwe matji sekamene otjiwaṋa otjikwao, nouhona umwe au rwisa ouhona oukwao. Nu koṋa akuhe maku kara ondjara nomanyinganyingiro wehi.” (Mateus 24:3, 7) Eye wina wa tja mape kara ‘omitjise momahi pekepeke.’ (Lukas 21:11) Hapo omaprofetero Jesus nga hunganeka, u ye muna?

Ndino, ovandu ve muna omauzeu mena rovita, ondjara, omanyinganyingiro wehi nomitjise pekepeke. Mombura ndji 2004, pa tjitwa omanyinganyingiro wehi omanene mokuvare kwa India nga zepa ovandu ape 225 000. Mozombura ndatu, omutjise mbwi okorona wa zepa ovandu omangete 6.9 mouye auhe. Jesus wa tja, ovitjitwa mbi vi raisa kutja omaandero wouye mbwi u ri popezu.

Ombeibela i tja, oruveze ndwo ngunda omaandero wouye aye hi ye ya, ye isanewa kutja ‘omayuva omasenina.’ (2 Petrus 3:3, 4) 2 Timoteus 3:1-5 ri tja momayuva omasenina ovandu mave nakaura ongaro yomeritjindiro ombwa. (Lesa okawongo nga “ Oruveze ngunda omaandero wouye aye hi ye ya.”) Hapo ndino u muna ovandu mbe ripurira ku wo oveni, ovakorokope, mbe tjita outwe nu mbe ha raisasana orusuvero? Oviṋa mbi wina vi raisa kutja tu hupa kuṱa komaandero wouye mbwi.

Omayuva omasenina maye kara orure ndu ṱeki pi? Otja kOmbeibela kwa sewa ‘oruveze orusupi uriri.’ Okuzambo, Mukuru ma nyono “imba mbe nyona ehi.”—Omavandururiro 11:15-18.

Mukuru wa twa po rukuru eyuva noiri mu ma yandeke ouye ourunde mbwi. (Mateus 24:36) Posi ya, pe nombuze ombwa yokutja Mukuru ka vanga “omundu nangarire umwe a yandekwe.” (2 Petrus 3:9) Eye u tu pa oruveze okurihonga ohunga nombango ye nokukara nonḓuviro ku ye. Omena raye? Mena rokutja, Eye u vanga kutja tu tuurunge omaandero wouye mbwi nokuhupa mouye oupe indu ehi tji ra rire oparadisa.

Mukuru we ritoororera otjimbumba tjovandu ongondoroka nouye okuhonga ovandu kutja mave yenene vi okurira orupa rOuhona we mouye oupe. Jesus wa tja ombuze ombwa yOuhona mai zuvarisiwa “mouye auhe.” (Mateus 24:14) Mombura ndji 2019, Ovahongonone va Jehova mouye auhe, va ungura ozoiri nḓe ri kombanda yomatau yevari motjiungura tjokuzuvarisa okuhonga ovandu ombuze yOmbeibela yomaundjiro. Jesus wa tja, omazuvarisiro ngo maye tjitwa mouye auhe ngunda omaandero aye hi ye ya.

Ouhonapare wovandu u ri pokuyanda. Posi ya, ombuze ombwa oyo ndji yokutja, ove mo yenene okutuurunga omaandero wouye mbwi nokurira orupa rwOparadisa Mukuru ndja kwizika. Orupa ndu maru kongorere ko maru kahungirira komuano mu mo yenene okuhupa mouye oupe mbwo.