Otupa tu twa kapita twa raisa kutja Mukuru ma kayandeka ouye ourunde mbwi nomauzeu ayehe. Matu yenene okukara nongamburiro kutja imbi mavi tjitwa. Omena ratjike? Mena rokutja Embo ra Mukuru Ombeibela ya kwizika kutja:

‘Ouye na imbi avihe mbi ri mu wo, vi yanda.’—1 JOHANES 2:17.

Tu nongamburiro kutja mape kara na imba mbu mave hupu mena rokutja ezeva ndo komurungu ri tja:

“Nungwari ingwi ngu ma tjiti ombango yaNdjambi, eye ma karerere nga aruhe.”

Ku nao, indu tji matu vanga okuhupa matu hepa okutjita ombango ya Mukuru. Kutja tu tjiwe kutja ombango ya Mukuru oiṋe, rutenga matu hepa okumutjiwa.

Jesus wa tja: “Nomuinyo waaruhe okwo ngwi okutja owo ve tjiwe Ove, ngu u ri Ndjambi watjiri.” (Johanes 17:3) Matu hepa ‘okutjiwa’ Mukuru kutja tu hupe nga aruhe. Ihi matji hee kutja kaku ya yenena okukambura mu Mukuru poo okutjiwa oviṋa oviṱiṱi ohunga na ye. Matu hepa okurira omapanga we. Indu tji matu vanga kutja oupanga wetu u kurire ko, matu hepa okutwa po oruveze okukara pu na omapanga wetu. Oupanga wetu ku na Mukuru wina mau sokukara nao. Ngatu tare kutja ouatjiri mbu ri mOmbeibela mau tu vatere vi okukurisa oupanga wetu ku na Mukuru.

Tu hepa ovikurya kutja tu hupe. Posi ya Jesus wa tja: “Omundu ka hupu momboroto porwayo, nungwari u hupisiwa i embo arihe Ndjambi ndi ma hungire.”—Mateus 4:4.

Ndino omambo wa Jehova matu ye vaza mOmbeibela. Otja tji mo rihongo Embo re, mo rihongo oviṋa Mukuru mbya tjita morukapitaveze, oviṋa mbye tjita nai na mbi ma katjita moruyaveze.

Ovikwaye mbi mo yenene okutjita indu tji mo vanga okukara nonḓuviro ku Mukuru nandarire kutja ouzeu okuisa oviṋa ovivi mbi u tjita? Indu tji wa tjiwa Mukuru nawa maku yenene okukuvatera.

Tara kotjihorera tjomukazendu omukambure wena Sakura, ngwa hupu ehupo roukorondu. Indu tja uta okurihonga Ombeibela, eye we rihonga ohunga nerakiza ra Mukuru ndi tja: “Iseye otuvakiro!” (1 Ovakorinte 6:18) Sakura wa kumba ku Mukuru okumupa omasa nu wa yenena okuisa oviṋa ovivi mbya tjiti. Posi yokutja ngamba u kayenda komurungu okupirukira omarorero. Eye wa tja: “Indu tji mbi nomeripura omavi mbi raera Jehova omeripura wandje ayehe mongumbiro, mena rokutja me tjiwa kutja himee yenene okurwisa otjiṋa hi nomasa wandje omuini. Ongumbiro ya tjita kutja mbi tumbuke popezu na Jehova.” Tjimuna Sakura ovandu ovengi ve uta okutjiwa Mukuru. Eye u ve pa omasa kutja ve yenene okuhupa momuano mbu mau yorokisa omutima we nokutja ve yenene okutjita omarundurukiro mehupo rawo.—Ovafilipi 4:13.

Otja tji mo utu okutjiwa Mukuru ove ‘otjimotjiukwa’ i Mukuru otja epanga re esuverwa. (Ovagalate 4:9; Epsalme 25:14) Ku nao mo yenene okukahupa mouye oupe wa Mukuru. Nu hapo ouye oupe mau sana pi? Orupa ndu maru kongorere ko maru ziri epuriro ndo.