Ombeibela i raisa oukahu kutja Jehova u tjiwa imbi mbi mavi katjitwa moruyaveze. (Jes. 45:21) Oyo kai kahurura epu arihe ohunga nomuano poo kutja oruṋe tji ma yenene okutjita nao. Poo nandarire kai kahurura kutja eye u toorora okutjiwa mbi ṱa pi. Ku nao, eṱe katu tjiwa oviṋa avihe ohunga na Jehova mbi ma katjita moruyaveze. Posi ya, pe noviṋa tjiva mbi matu tjiwa.

Jehova u yenena okutjita otjiṋa ngamwa tji ma vanga, posi ya oruveze rumwe u toorora okuhinokutjita. Nounongo we ouingi, Jehova u yenena okuhunganeka otjiṋa atjihe tji ma vanga. (Rom. 11:33) Posi ya, mena rokutja eye u nomeritjaerero, eye u yenena okutoorora okutjiwa imbi mbi mavi katjitwa moruyaveze.

Jehova u yenenisa ombango ye. Epu ndi mari tu vatere vi okutjiwa omuano Jehova me hunganeka oruyaveze? Jesaja 46:10 ri tja: “Okuza kombutiro Ami mba tjivisire oruveze ndu maru ya. Okuza korukuru Ami mba zuvarisira ko imbi mbi mavi katjitwa. Ami mba tja omeripuriro wandje kamaaye tataiza ko, nokutja Ami me yenenisa ngamwa atjihe tji mba vanga okutjita.”

Jehova u yenena okuhunganeka oruyaveze, mena rokutja eye u nomasa okutjita nao. Jehova ka hepa okutjiwa imbi mbi mavi katjitwa moruyaveze, tjimuna eṱe povikando tjiva tji tu yenena okutara komaandero womuvi okutjiwa imbi mbi mavi katjitwa. Jehova u yenena okutya kutja otjiṋa matji tjitwa moiri kaaṋi nu oruveze ndwo tji rwe ya eye u yenenisa otjiṋa ho.—Eks. 9:​5, 6; Mat. 24:36; Oviung. 17:31.

Ku nao, Ombeibela i ungurisa omambo tjimuna “okuṱuna,” ‘nokutya’ okuhungirira kovitjitwa tjiva Jehova mbi ma katjita moruyaveze. (2 Ozomb. 19:25; Jes. 46:11) Omambo nga ya za kembo rOtjiheberi ndi hee ya ‘omuungure wozonyungu.’ (Jer. 18:​2-4) Tjimuna omuungure wozonyungu onongo tje yenena okurunga omunoko na ungura po otjitjuma otjiwa, Jehova u yenena okutjita kutja ombango ye i yenenisiwe.—Ef. 1:11.

Jehova u yandjera ovandu okuritoororera oveni. Eye ka tye rukuru kutja ehupo romundu auhe mari kasana pi. Nu ka tjiti kutja ovandu vomitima omiwa ve tjite oviṋa mbi mavi ve twara kombandjarero. Eye u yandjera avehe okuritoororera omuano mbu mave vanga okuhupa, posi yokutja eye u ve honga omuano omusemba mu mave yenene okuhupa.

Tara kovihorera vivari. Otjihorera otjitenga matji kamburire mo ovature va Ninive. Jehova wa hunganeka kutja otjihuro matji yandekwa mena rourunde wawo. Posi yokutja, indu ovature mbo tji ve ritanaura, Jehova “wa muna kutja va isa ozondjira zawo ozombi, nopa vingururira omeripura we ne he ve vere otja pa tjere me ve vere.” (Jona 3:​1-10) Jehova wa rundurura oumune we ohunga na imbi mbya hunganeka mena rokutja ovandu va Ninive va tya okurundurura ongaro yawo, kombunda yaindu tji va zuva erakiza ra Jehova.

Otjihorera otjitjavari omaprofetero ohunga noutoṋi womurumendu wena Kirus, ngwa kakutura Ovajuda kouhuura ne ve rakiza kutja ve tungurure ondjuwo ya Jehova ondjapuke. (Jes. 44:26–45:4) Ombara Kirus wa Persie wa yenenisa omaprofetero ngo. (Esra 1:​1-4) Nungwari Kirus kaa ri omukarere wa Mukuru watjiri. Jehova wa ungurisa Kirus okuyenenisa omaprofetero ngo, posi yokutja ke na pe mu ṋiṋikiza kutja me rikotamene ku ye.—Omiano 21:1.

Imbi i vimwe vyovihorera, Jehova mbye ripurira ko indu tji ma hunganeke oruyaveze. Tjiri kape nomundu ngu ma yenene okuzuva omeripura novitjitwa vya Jehova avihe. (Jes. 55:​8, 9) Nungwari imbi mbi matu tjiwa ohunga na Jehova vi kurisa ongamburiro yetu yokutja eye aruhe u tjita imbi mbi ri ovisemba nu mavi kamburire mo imbi eye mbye hunganeka ohunga noruyaveze.