1-2. Ongwaye Ovakriste avehe tji mave sokutjiwa ohunga nombendukiro yomeyuru?

OVANDU ovengi mbe karera Jehova nai ve nomaundjiro wokukahupa nga aruhe kombanda yehi. Posi yokutja otjivaro otjiṱiṱi tjOvakriste ovatwirisiwa ve nomaundjiro wokukahupa meyuru. Imba ovatwirisiwa ve vanga okutjiwa kutja ehupo rawo meyuru ma ri kakara vi. Nu hapo ongwaye imba mbe nomaundjiro wokukahupa kombanda yehi wina tji mave vanga okutjiwa ohunga nomaundjiro ngo? Matu kamuna kutja ombendukiro yokuyenda keyuru mai yeta ozondaya wina ku imba mbe nomaundjiro wokukahupa nga aruhe kombanda yehi. Kunao, nandarire kutja tu nomaundjiro okukahupa meyuru poo kombanda yehi, eṱe matu sokurihonga ohunga nombendukiro yomeyuru.

² Mukuru wa hinga tjiva wovahongewa va Jesus veserewondo etenga okutjanga ohunga nomaundjiro womeyuru. Omuapostele Johanes wa tja: “Nambano oweṱe ovanatje va Ndjambi, nu ingee kapeya raisiwa ongahukiro kutja matu kasana pi. Nungwari matu tjiwa kutja Eye tja munika eṱe matu sana ku Ye.” (1 Joh. 3:2) Ovakriste ovatwirisiwa kave tjiwa kutja mave kakara mongaro iṋe indu tji va pendurwa okuyenda keyuru notutu twombepo. Posi yokutja, owo ve tjiwa kutja mave kamuna Jehova indu tji va i keyuru. Ombeibela kai hungire oviṋa avihe ohunga nombendukiro yokukahupa meyuru, posi yokutja omuapostele Paulus wa yandja ondjivisiro onḓiṱi ohunga nombendukiro ndjo. Ovatwirisiwa mave kakara  puna Kristus indu tji “ma yandeke omauvara aehe omanavita na Ndjambi.” Nu iho matji kamburire mo ‘omunavita omusenina ngu sokuyandekwa, indji onḓiro.’ Korusenina, Jesus na imba mbu mave kahonapara puna ye mave riwisa kehi ya Jehova. (1 Kor. 15:24-28) Indwo tjiri ma ru rire oruveze rwondjoroka. *

3. Otja tji paraisiwa 1 Ovakorinte 15:30-32, ongamburiro Paulus ndja ri nayo mombendukiro ye mu vatera okutjita vi?

³ Ongamburiro Paulus ndja ri nayo mombendukiro ye mu vatera kutja ma tuurunge omauzeu pekepeke. (Lesa 1 Ovakorinte 15:30-32.) Eye wa raera ovakambure moKorinte na tja: “Ami aruhe mbi kara moumba wonḓiro.” Paulus wina wa tja: ‘Ami mba rwire novipuka ovindandi muno moEfesus.’ Mape ya aa hungire ohunga novandu mbaave rwisa ovipuka porupare rwomanyando moEfesus. (2 Kor. 1:8; 4:10; 11:23) Poo mape ya aa hungire ohunga nOvajuda mbaave mu pirukire novandu varwe mba ri tjimuna ‘ovipuka ovindandi.’ (Oviung. 19:26-34; 1 Kor. 16:9) Nandarire kutja Paulus wa muna omauzeu omanene, eye wa kayenda komurungu okukara noumune ouwa ohunga noruyaveze.—2 Kor. 4:16-18.

4. Omomuano uṋe omaundjiro wombendukiro mu ye yanḓiparisa Ovakriste ndino? (Tara kotjiperendero tjokombanda yokambo nga.)

⁴ Eṱe tu hupa moruveze mu mu tjitwa omaumba omengi. Ovakambure ovakwetu tjiva ve muna omaumba pekepeke. Tjiva va tura motuveze mu mu novita nu kave rimunu kutja ve ri mondjeverero. Momahi tjiva ovakarere va Jehova va tjaerwa okuzuvarisa nu owo ve kayenda komurungu okumukarera, nandarire kutja mape ya ave paterwa motjovakamburwa poo ave zepewa. Nandarire nao ovakambure avehe mbo ve kayenda komurungu okurikotamena ku Jehova nu owo ovihorera oviwa kweṱe. Owo kave tira mena rokutja ve tjiwa kutja Jehova we ve kwizikira oviṋa oviwa moruyaveze, nandarire kutja va pandjara omiinyo vyawo moruveze ndwi.

5. Oumune uṋe mbu mape ya au ngundiparisa ongamburiro yetu mombendukiro?

⁵ Paulus wa rakiza ovakambure ovakwao okuyepa oumune ovandu tjiva mbu vari nawo wokutja, “Ovakoke tji ve hi nokupendurwa, ‘ngatu rye nu ngatu nwe, orondu muhuka tjandje twa ṱu.’” Ovandu tjiva va ri noumune otjingewo nandarire komurungu wa Paulus. Eye mape ya aa hungurire komambo wa Jesaja 22:13, nge hungira ohunga nongaro yOvaisrael. Owo aave ripurire kozonḓero zawo oveni pendje nokukurisa orusuvero rwawo ku Mukuru. Ovaisrael va ri nongaro yokutja “mave yorokere ehupo ndino mena rokutja tjandje muhuka va koka.” Mena rongaro yawo ombi ndjo, otjiwaṋa tjOvaisrael tja pandjara oupanga ouwa kuna Mukuru.—2 Ekuruh. 36:15-20.

6. Ongamburiro yetu mombendukiro mai ṱunu vi komuano wetu wokutoorora omapanga?

⁶ Eṱe matu tjiwa kutja Jehova ma ka pendura ovaṱi. Kunao, matu sokutoorora omapanga wetu nongengezero. Ovakambure moKorinte aave sokukara kokure na imba mbe ha kambura mombendukiro. Hapo imbyo mavi tu hongo tjike ndino? Indu tji twa kara tjinene pu novandu mbe he ripurire ku imbi mbi mavi katjitwa moruyaveze nu mbe vanga okurya omuinyo uriri, ongaro yawo ombi ndjo mai tu zunḓa. Indu Omukriste tja kara pu nomundu otja ingo mape ya a utu okuhorera kongaro ndjo. Ovandu mbo mape ya ave mu popo okutjita oviṋa Mukuru mbya tonda. Kunao,  Paulus wa rakiza kutja, “Kotoreye ozondunge zeṋu ozosemba nu amu tjiti ko ouvi.”—1 Kor. 15:33, 34.

7. Otja 1 Ovakorinte 15:35-38, epuriro riṋe ovandu tjiva ndi mape ya va pura ohunga nombendukiro?

⁷ Lesa 1 Ovakorinte 15:35-38. Omundu ngwaa vanga kutja varwe ve kare nomakeyakeyero ohunga nombendukiro, mape ya wa pura kutja, “Hapo ovakoke mave pendurwa vi?” Onawa okuripura neziriro Paulus nda yandja mena rokutja ovandu ovengi ndino ve noumune pekepeke ohunga nokutja pe tjitwa tjike omundu tja ṱu. Posi yokutja, Ombeibela i honga tjike?

8. Omasasanekero yeṋe ngu maye tu vatere okuzuva nawa ombendukiro yokukahupa meyuru?

⁸ Indu omundu tja ṱu orutu rwe ru wora. Posi yokutja, kape notjiṋa tji matji tjaere Omuute wevaverwa okupendura omundu norutu ndwe mu pwire. (Gen. 1:1; 2:7) Paulus wa ungurisa omasasanekero okuraisa kutja kahepero ku Mukuru okukotora omundu norutu ndwa ri narwo. Ripura uriri ‘nokandwi’ kovikunwa. Indu okandwi ngo tji ka kunwa mehi ke uta okuhapa a ke rire omuti warwe. Omuti mbwa hapa mbwi wa panguka kokandwi okaṱiṱi ku ka kunwa. Paulus wa ungurisa omasasanekero ngo okuraisa kutja Omuute wetu ma yenene okuyandja orutu ‘punga ama vanga.’

9. Otutu tuṋe pekepeke tu tu hungirwa 1 Ovakorinte 15:39-41?

⁹ Lesa 1 Ovakorinte 15:39-41. Paulus wa raisa kutja Mukuru wa mema oviutwa notutu pekepeke. Otjotjihorera, otutu twozongombe, twozonḓera notwomahundju twa panguka. Tji mo tara keyuru mo munu ombangu pokati keyuva nomueze. Paulus wa tja: “Ozonyose ozeni nao aihe i noupwe wayo oini peke.” Nandarire kutja katu munu ombangu ndji ri pokati kozonyose nomeho wetu oveni, ovanongonone ve tu raera kutja ku nozonyose pekepeke tjiva ozonene, tjiva ozonḓiṱi,  ozoserandu, ozombapa na tjiva ozongara tjimuna eyuva. Paulus wina wa tja: “Pe notutu tweyuru notutu twehi.” Hapo eye a hee tjike? Eṱe tu notutu twonyama kombanda yehi, nungwari meyuru ku notutu twombepo tjimuna ovaengeli.

10. Imba mbu mave pendurwa okuyenda keyuru mave i notutu tuṋe?

¹⁰ Tara ku imbi Paulus mbya hungira okuzambo. Eye wa tja: “Otjinga ape ri nao nombendukiro yovaṱi: Orutu tji rwa pakwa, okutja rwa ṱu; nu tji rwa pendurwa karu uhara amaru ṱu.” Eṱe matu tjiwa kutja omundu tja ṱu orutu ru wora nu aru yaruka koruuma. (Gen. 3:19) Nu hapo mape ya vi kutja orutu “tji rwa pendurwa karu uhara amaru ṱu” rukwao? Paulus kaa hungire ohunga na imba mba pendurwa okukara kombanda yehi tjimuna imba mba pendurwa i Elia, Elisa na Jesus. Nungwari, Paulus aa hungirire kovandu mba mbu mave pendurwa okukahupa meyuru, okutja owo mba ‘worutu rwombepo.’—1 Kor. 15:42-44.   

11-12. Omarundurukiro yeṋe Jesus nga muna indu tja pendurwa, nu ovatwirisiwa ve muna vi omarundurukiro otjingewo?

¹¹ Indu Jesus tja ri kombanda yehi wari norutu rwonyama. Posi yokutja, indu tja pendurwa eye wa rira “ombepo, ndji yandja omuinyo” nu wa yaruka keyuru. Momuano otjingewo, Ovakriste ovatwirisiwa mave pendurwa notutu twombepo. Paulus wa tja: “Otja tjinga atwa zarere osaneno yomundu ngwa memenwe pehi, otjinga amatu zara osaneno yOmundu ngwi ngwa zira meyuru.”—1 Kor. 15:45-49.

¹² Motjihungiriro tje, Paulus wa uta okuhungira oviṋa ovinanḓengu ohunga nombendukiro. Otjiṋa otjinanḓengu okutjiwa kutja Jesus ka pendurirwe norutu rwonyama. Paulus wa tja: “Onyama nombinḓu kai nakusora okurumata ouhona wa Ndjambi.” (1 Kor. 15:50) Ovaapostele na varwe ovatwirisiwa kave nokupendurwa okuyenda keyuru notutu twombinḓu nonyama tu matu yenene okuwora. Hapo owo mave pendurwa ruṋe? Paulus  wa tja, owo mave pendurwa moruyaveze nungwari kai nokutjitwa tjimanga tji va zu nokuṱa. Indu Paulus tja tjanga omambo nge ri mOvakorinte tjandje tjiva wovahongewa “va ṱa,” tjimuna omuapostele Jakobus. (Oviung. 12:1, 2) Ovaapostele varwe novatwirisiwa kombunda ‘va kaṱa.’—1 Kor. 15:6.

13. Mape tjitwa tjike momeero wa Jesus?

¹³ Jesus na Paulus va hunganeka oruveze orunanḓengu ndu maru sokuya, oruveze ndwo omeero wa Kristus. Oruveze ndwo maku kara ovita, omanyinganyingiro wehi, omitjise noviṋa vyarwe ovivi mbi mavi tjitwa mouye auhe. Omaprofetero wOmbeibela nga ya yenenisiwa okuza mombura ndji 1914. Nu wina pe norupa rwarwe orunanḓengu ohunga nomayenenisiro ngo. Jesus wa tja ombuze ombwa ohunga nokutja ouhona wa Mukuru mau honapara, mai zuvarisiwa “mouye auhe i rire omahongononeno koviwaṋa avihe; nomaandero indino otji maye ya.” (Mat. 24:3, 7-14) Paulus wa hungirira “keyuva ndi Muhona ndi me ya” kutja wina Ovakriste ovatwirisiwa “mba ṱa” otji mave pendurwa okukahupa meyuru.—1 Tes. 4:14-16; 1 Kor. 15:23.

14. Ku tjitwa tjike kOvakriste ovatwirisiwa mbe ṱa moruveze romeero wa Kristus?

¹⁴ Ovatwirisiwa mbe ṱa moruveze ndwi ve pendurwa tjimanga okukahupa meyuru. Omambo nga Paulus onga tjanga 1 Ovakorinte 15:51, 52. Eye wa tja: “Eṱe atuhe katu nakuṱa, nungwari atuhe matu tjitukisiwa. Ihi matji tjitwa pohiva osenina tjimanga mombapaiziro yeho.” Omambo wa Paulus ngo ye yenenisiwa nai. Mombendukiro yawo ovangu va Kristus mba mave kara nondjoroka onene, nu mave “kakara aruhe puna Muhona.”—1 Tes. 4:17.

15. Otjiungura tjiṋe tji tji undja imba mbu mave tjitukisiwa “mombapaiziro yeho”?

 ¹⁵ Ombeibela i hungirira kotjiungura tja imba mbu mave tjitukisiwa “mombapaiziro yeho” tji mave kaungura meyuru. Jesus we ve raera kutja, “Auhe ngu ma toṋa na ṱakamisa imbi mbi mbi vanga nga komaandero, Ami me mu pe omasa nouvara kombanda yoviwaṋa ovinavisenginina. Eye me vi honaparere nokati kotjitenda, nu me vi hahaura tjimuna ovitjuma vyomunoko. Omasa nouvara tjingewo ngo Ami wina mba pewa i Tate.”(Omavan. 2:26-28) Owo mave kongorere Jesus mokuhonaparera oviwaṋa nokati kotjitenda.—Omavan. 19:11-15.

16. Omomuano uṋe ovandu ovengi mu mave toṋa onḓiro?

¹⁶ Oukahu kutja Ovakriste ovatwirisiwa kave nokukaṱa rukwao. (1 Kor. 15:54-57) Ombendukiro yawo mai tjiti kutja ve kakare norupa okuisapo omauvi aehe nge tjitwa kombanda yehi movita vya Armagedon. Ovakriste varwe omangete omengi ovarumendu novakazendu mave tuurunga ‘ondatumisire ondirise’ nu ave hiti mouye oupe. (Omavan. 7:14) Imba mba tuurunga okukahupa kombanda yehi mave munu omuano onḓiro tji mai kaisapewa. Indu ovandu mba ṱa rukuru tji mave pendurwa komuinyo. Tjiri indwo maru rire oruveze rwondjoroka tjinene. (Oviung. 24:15) Nu imba avehe mbe ri ovaṱakame ku Jehova mave tuurunga onḓiro ndja etwa i Adam. Owo mave yenene okuhupa nga aruhe.

17. 1 Ovakorinte 15:58 mari tu tunduuza okutjita tjike nai?

¹⁷ Omukriste auhe ngu nomuinyo nai ma sokukara nondangi komambo wa Paulus nga tjanga kovakambure moKorinte ohunga nombendukiro. Eṱe tu nomapu omawa okuyakura omambo wa Paulus mokukara norupa okuura “motjiungura tja Ndjambi.” (Lesa 1 Ovakorinte 15:58.) Indu aruhe tjitwa ungura oukukutu motjiungura ho eṱe matu kamuna oviṋa oviwa moruyaveze. Indwo maru rire oruveze rwondjoroka tjinene. Nu matu kamuna kutja oviungura mbi twa ungurira Muhona kavyari omungandjo.