Owatjiri owombwi wokutja, ezeva ndo kari hee nao. Ezeva ndo ri hungira ohunga nomundu ngu muna omauzeu pekepeke, posi yokutja a tuurunga omauzeu ngo.

Ngatu tare kezeva 15 na indi ndi mari kongorere kezeva 16 rOmiano ekondwa 24, ngu maye tja: “Murunde, o natere momaturiro womusemba, o nyono ondjuwo ye. Nandarire kutja omusemba ma u potuingi, eye ma sekama rukwao; nungwari ovarunde mave putara moviwonga. O yoroka, omunavita na ove tja u, nu o nyanda omutima eye tja putara.”—Omiano 24:15-17.

Ovandu tjiva ve muna kutja ezeva 16 ri hungira ohunga nomundu ngwa tjiti ouvi, posi yokutja e ritanaura nu a kara noupanga ouwa kuna Mukuru rukwao. Otjotjihorera, ovanane vozongamburiro vevari okuza koEngland va tjanga kutja, ovazuvarise va rukuru na nai va kahurura ezeva ndo momuano mbwo. Owo wina va tja omambo ngo maye hee kutja,“omundu omuwa ma yenene okutjita ouvi ounene, posi yokutja a kayenda komurungu okusuvera Mukuru nokuyakurwa i ye mena rokutja we ritanaura.” Omundu ngu tjita oviṋa ovivi mape ya a tjaterwa i yomakahururiro ngo. Nu a munu kutja ma yenene okutjita nao povikando ovingi nu Mukuru aruhe e mu isire.

Posi yokutja ezeva 16 ka ri hee nao.

Omambo nga “ma u” na “tja u” nge ri mezeva 16 no 17 mOtjiheberi ye ungurisiwa momiano pekepeke. Otjotjihorera, otjinamuinyo tja wire pehi, omundu wa u okuza komututu wondjuwo poo ondwi ya wire mehi. (Deut. 22:4, 8; Amos 9:9) Posi yokutja embo ndo ri yenena okukara nomaheero warwe, tjimuna inga: “Muhona u ṱika omundu mondjira ndje sokutwara, nu u yama ingwi Eye me nonyuṋe. Eye tja putara, ke nokuwa, Muhona tjinga ama ṱiza eke re.”—Eps. 37:23, 24; Omiano 11:5; 13:17; 17:20.

Ngatu tare komambo nga hungirwa i Professor Edward H. Plumptre. Eye wa tja: “Embo ndi [“okuwa”] mOtjiheberi ka ri ungurisiwa indu omundu tja tjiti ouvi.” Nu omukonḓonone warwe wa kahurura ezeva 16 momuano mbwi. Eye wa tja: “Okutjinda ovakarere va Mukuru momuano omuvi okuungurira ombandjarero, mena rokutja owo aruhe mave tuurunga, posi yokutja ovandu mbe ha puratene ku Jehova kamaave yenene.”

Kunao, avihe mbi mavi raisa kutja Omiano 24:16 kari hungire ohunga na indu tji twa “u” mokutjita oviṋa ovivi, nungwari ri hungira ohunga nokumuna omauzeu poo omatokero povikando pekepeke. Mouye ourunde mbwi omukarere wa Mukuru ma yenene okumuna omauzeu pekepeke tjimuna okuhinouveruke ouwa. Eye mape ya a tatumisiwa i yohoromende mena rongamburiro ye. Posi yokutja, u kara nongamburiro kutja Mukuru u ri puna ye nu me mu vatere okutjinda omauzeu ngo. Ripura uriri, ohunga nomuano oviṋa potuingi mu vi kayenda nawa kovakarere va Mukuru. Omena raye? Mena rokutja tu nongamburiro kutja “Muhona u vatera avehe mbe ri moumba, nu u yeura avehe mba wa.”—Eps. 41:1-3; 145:14-19.

“Omusemba” katjaterwa indu ovandu varwe tji mave munu omauzeu. Posi yokutja, u yanḓiparisiwa mena rokutja u tjiwa kutja “imba mbe nondira ku Ndjambi ve kara nawa, tjinga ave nonḓuviro ku Ndjambi.”—Omuzuv. 8:11-13; Job 31:3-6; Eps. 27:5, 6.