Orupa ndu ri mu Deuteronomium 22:25-27 ka ru nokuyandja ombango komundu ngu nondjo, mena rokutja omurumendu wa ri nondjo rukuru. Nungwari etwako ndo aa ri raisa kutja omukazendu u nondjo poo indee. Tara korupa ndu maru kongorereko.

Omazeva nga kapita ya hungire ohunga nomurumendu ngwa tjere omusuko omuvarekwa “motjihuro.” Indu tja tjiti nao eye u nondjo yokukatuka orukupo mena rokutja omukazendu tja varekwa u varwa otjomukupwakazendu. Hapo tjike nomukazendu? Eye ka “kwire ombatero ngunda e ri motjihuro” poo okuura. Andakuzu eye wa tjita nao ovandu aa tja ve mu zuva nokumuvatera. Posi yokutja eye kaurire. Kunao, eye wa ri norupa mokukatuka orukupo nu aveyevari va ri nondjo.​—Deut. 22:23, 24.

Etwako ndo ra hungira epu rarwe. Nu ra tja: “Nungwari omurumendu tja tjerere omusuko ngwa varekwa mokuti, omurumendu erike nga rire ngwa ṱu; nu ku ingwi omusuko aku tjitwa otjiṋa, eye tjinga e ha tjitire ouvi wokuṱa. Otjiṋa otja ihi tja sana na ihi tjomurumendu ngwa zepa omukwao. Omurumendu wa tjerera omusuko omuvarekwa mokuti, nu nandarire kutja ingwi omusuko wa ura, kapa ri omundu ngwa sokumuvatera.”​—Deut. 22:25-27.

Mena ra nao, ovapangure va muna kutja omukazendu wa tjerewa. Omomuano uṋe? Pa munika tjimuna eye ‘wa ura, nungwari kapa ri omundu okumuvatera.’ Kunao eye ka munikire ondjo yokukatuka orukupo. Posi yokutja omurumendu wa ri nondjo yokutjera nokukatuka orukupo mena rokutja ‘wa tjera’ omusuko omuvarekwa.

Oukahu kutja omurumendu u nondjo yokutjera nokukatuka orukupo posi yokutja etwako ndo aa ri sokuraisa kutja omukazendu u nondjo poo indee. Eṱe tu nongamburiro kutja ovapangure aave “konḓonona” nu okuzambo ave tjiti ondando ndji mai zikamene komatwako Mukuru nga yandja kuwo povikando ovingi.—Deut. 13:14; 17:4; Eks. 20:14.