1. Omena raye tji mo kara nondangi kovandu mbe raisa omuretima?

 EṰE atuhe tu nondangi kovandu mbe raisa omuretima. Omena raye tji matu tja nao? Tu nondengero ku imba mbe yenena okuundja otjiṋa nokuhinokupindika. Tu kara nondangi varwe tji ve nomuretima na eṱe indu tji twa tjiti ozondataiziro. Nu eṱe tu kara nondangi kovandu mbaave rihongo Ombeibela ku na eṱe komuretima mbu va raisa kweṱe indu tjaatu kondjo okurihonga, okuyakura, poo okuṱakamisa oviṋa Ombeibela mbi i honga. Kombanda yaavihe, eṱe tu kara nondangi ku Jehova Mukuru ngu kara nomuretima ku na eṱe.—Rom. 2:4.

2. Omozongaro zeṋe mu mape ya ai rire ouzeu okukara nomuretima?

² Nandarire kutja tu nondangi komuretima wavarwe, kaaruhe tje rira oupupu kweṱe okuraisa omuretima. Otjotjihorera, mape ya ai rire ouzeu kweṱe okuporimana indu tji matu undju moruteto orure, nu tjinenenene indu tji twa lata. Eṱe mape ya atu ṱomazenge indu varwe tji mave tu pindikisa. Nu povikando tjiva, mape ya ai rire ouzeu okuundja omakwizikiro wa Jehova wouye oupe. Hapo ove mo vanga okukara nomuretima? Morupa ndwi, matu kahungirira komuano mu matu yenene okuraisa omuretima nokutja ongwaye tje ri ounanḓengu okukara nomuretima. Eṱe wina matu kahungirira koviṋa mbi mavi yenene okutuvatera okukurisa omuretima.

3. Omundu ngu nomuretima u ritjinda momuano uṋe indu tja pindikisiwa?

³ Ngatu tare komiano vine mbi mavi yenene okuraisa kutja tu nomuretima. Otjitenga, omundu ngu nomuretima ka pindike tjimanga. Indu varwe tji va tjiti oviṋa mbi mavi mu pindikisa,  eye u porimana nu ke ve tjindi omuano owo mu mave mu tjindi. Eye wina ka tjindi varwe navi indu tje ri kehi yombameno. Embo ndi ‘omuretima’ ra tamunwa mOmbeibela otjikando otjitenga indu tji ya tja Jehova omundu ngu nounyaṋutima nomunatjari, ngu nomuretima poo ngu ha pindike tjimanga, nu ngwa tumba otjari nouṱakame.—Eks. 34:6.

4. Omomuano uṋe omundu ngu nomuretima me ritjinda indu tji ma hepa okuundja?

⁴ Otjitjavari, omundu ngu nomuretima u undja noupore. Indu otjiṋa tji matji toora orure nokuhinokuundjira ko, omundu otja ingo u kondja okuhinokupindika hakahana. (Mat. 18:26, 27) Pe nozongaro ozengi nḓu matu hepa okuundja noupore. Otjotjihorera, eṱe matu hepa okupuratena nomuretima indu varwe tji mave hungire nokuhinokuverya eraka. (Job 36:2) Eṱe mape ya atu hepa omuretima indu tji matu vatere ovahongwa vetu vOmbeibela okuzuva oviṋa Ombeibela mbi i honga, poo okuisa ozongaro ozombi.

5. Omomuano uṋe warwe mu matu raisa omuretima?

⁵ Otjitjatatu, omundu ngu nomuretima ka tjiti oviṋa nokuhinokuripura. Otjiperi kutja, povikando tjiva tu hepa okutjita oviṋa hakahana. Posi yokutja, indu omundu tje nomuretima okuyenenisa oviungura ovinanḓengu, eye ka hakahanene po okuuta poo okumana. Nungwari, eye u twa po oruveze ndwa yenene okurongerisa oviṋa mbi ma sokutjita. Eye u toora oruveze okuungura otjiungura ho nawa.

6. Omundu ngu nomuretima u ritjinda momuano uṋe indu tji ma munu omauzeu?

⁶ Otjitjaine, omundu ngu nomuretima u kondja okutjinda omauzeu nokuhinokuunauna. Momuano mbwi, omuretima u sasanekwa nonḓarorure. Otjiperi kutja, kanavi okuraera epanga ropopezu omuano mbu mo fula ohunga nouzeu mbu u na wo. Posi yokutja, omundu ngu nomuretima wina u ripura ohunga noviṋa oviwa mehupo re, nu u kondja pu ma yenene okukayenda komurungu okukarera Jehova nondjoroka. (Kol. 1:11) OtjOvakriste, eṱe  matu hepa okuraisa omuretima momiano avihe mbi. Omena raye? Ngatu tare komapu tjiva.

7. Otja ku Jakobus 5:7, 8, omena raye omuretima tji u ri omunanḓengu? (Wina tara kotjiperendero.)

⁷ Eṱe matu hepa omuretima kutja tu yamwe. Tjimuna ovakarere va Mukuru ovaṱakame vorukapitaveze, eṱe matu hepa okuundja nomuretima ku Mukuru okuyenenisa omakwizikiro we. (Hebr. 6:11, 12) Ombeibela i sasaneka ongaro yetu ku nomuṱuta. (Lesa Jakobus 5:7, 8.) Omuṱuta u ungura oukukutu okukuna nokutjatja ovikunwa vye, posi ya eye ka tjiwa kutja oruṋe tji mavi hapa. Ku nao, omuṱuta u undja nomuretima nu u kara nongamburiro kutja eye ma ri kovikunwa vye. Momuano tjingewo, eṱe tu ungura oukukutu okurira ovakongorere va Jesus nandarire kutja katu “nakutjiwa kutja oMuhona [wetu] me ya eyuva riṋe.” (Mat. 24:42) Eṱe tu undja nomuretima, nongamburiro kutja moruveze rwe Jehova ma yenenisa oviṋa avihe mbya kwizika. Indu tji twa isa okukara nomuretima, eṱe mape ya atu urwa okuundja nu atu utu okuisa Jehova kouṱiṱiṱiṱi. Eṱe wina matu utu okuyandja ombango koviṋa mbi matu munu kutja mavi tu pe ondjoroka. Posi yokutja, indu tji tu nomuretima, eṱe matu yenene okukara nonḓarorure nga komaandero natu yamwa.—Mika 7:7; Mat. 24:13.

8. Omuretima u tu vatera vi okutjinda varwe? (Ovakolose 3:12, 13)

⁸ Eṱe matu hepa omuretima kokutja tu kare noupanga ouwa ku na varwe. Owo u tu vatera okupuratena nawa indu varwe tji mave hungire. (Jak. 1:19) Omuretima wina u tjita kutja tu kare nohange ku na wo. Indu tji tu nomuretima, katu hakahanene po okuhungira otjiṋa otjivi tji tu ri kehi yombameno. Nu indu tji tu nomuretima, eṱe kamaatu hakahana okupindika tjimanga indu omundu umwe tje tu hihamisa. Pendje nokupindika, eṱe tu ‘tjindasana nokuisirasana.’—Lesa Ovakolose 3:12, 13.

9. Omuretima u tu vatera vi indu tji matu hepa okutjita ozondando? (Omiano 21:5)

⁹ Omuretima wina u yenena okutjita kutja tu tjite ozondando ozosemba. Pendje nokuhakahana, matu hepa okurihonga otja pu matu yenene ohunga nozondando nḓu tu na zo, nu okuzambo atu toorora kutja oiṋe ndji ri osemba. (Lesa Omiano 21:5.) Otjotjihorera, indu tji matu paha oviungura, eṱe mape ya atu vanga okuyakura oviungura ngamwa avihe mbi twa munu, nandarire kutja mavi tjiti kutja atu ha i kozombongarero poo atu ha kara noruveze motjiungura tjokuzuvarisa. Nungwari, indu tji tu nomuretima, eṱe matu yenene okutoora oruveze okuripura kutja oviungura mbi vi ri pi nu mavi kambura oruveze ndu ṱa pi, nokutja mavi ṱunu vi keṱunḓu retu na koupanga wetu ku na Jehova. Tji tu nomuretima, matu yepe okutjita ozondando ozombi.

10. Omomuano uṋe Omukriste mu ma yenene okukurisa omuretima?

¹⁰ Kumba kutja u kare nomuretima. Omuretima i tjimwe tjovihape vyombepo. (Gal. 5:22, 23) Ku nao, matu yenene okukumbira ombepo ondjapuke nokuningira ku Jehova kutja me tu vatere okukurisa otjikaṋena ho. Indu tji tu ri mongaro ndji mai roro omuretima wetu, eṱe matu ‘sokukara pokuningira’ ombepo ondjapuke kutja i yenene okutuvatera okukara nomuretima. (Luk. 11:9, 13, NWT) Eṱe wina matu yenene okuningira Jehova okutuvatera kutja tu mune oviṋa otja koumune we. Okuzambo kombunda yokukumba, eṱe matu hepa okutjita otja pu matu yenene okukara nomuretima eyuva arihe. Indu tji twa kumbu okukara nomuretima natu kayenda komurungu okuraisa omuretima, Jehova ma yenene  okutuvatera okukara nomuretima, nandarire kutja katwa ri ovandu mbaari nomuretima rutenga.

11-12. Omomuano uṋe Jehova ma raisa omuretima?

¹¹ Ripurira ko oukoto kovihorera vyOmbeibela. MOmbeibela mu novihorera ovingi vyovandu mba raisa omuretima. Indu tji matu ripurire ko oukoto kovihorera otja imbyo, matu yenene okurihonga omiano vyokuraisa omuretima. Ngunda atu ha tara kovihorera tjiva mbyo, ngatu tare kotjihorera otjisemba tja Jehova tjomuretima.

¹² Motjikunino tja Eden, Satan wa yamburura ena ra Jehova mokukondja okutjita kutja Eva ma keyakeye kutja Jehova kamunane omusemba nu ngu he norusuvero. Mokuhinokuhakahanena po okunyona omuyamburure ngo, Jehova wa raisa omuretima nomeritjaerero, mena rokutja eye aa tjiwa kutja mape kambura oruveze okuraisa kutja eye ongu ri omunane omusemba. Ngunda ama undju, eye wa tjinda omayambururiro wena re nonḓarorure. Kombanda yaavihe Jehova wa undja nomuretima kokutja ovandu ovengi ve kamune oruveze rwokukahupa nga aruhe. (2 Petr. 3:9, 15) Ku nao, ovandu ovengi va uta okumutjiwa. Indu tji twa yandja ombango komuano Jehova ma raisa omuretima, mai rire oupupu kweṱe okuundja oruveze rwe rwomaandero.

13. Omomuano uṋe Jesus ma horera komuretima wa Ihe? (Wina tara kotjiperendero.)

¹³ Jesus wa horera komuretima wa Ihe, nu wa raisa otjikaṋena ho indu tja ri kombanda yehi. Katja ri otjiṋa otjipupu ku Jesus aruhe okuraisa omuretima, nu tjinenenene kozonongo zomatwako nOvafarisei ovanatjavivi. (Joh. 8:25-27) Posi ya, tjimuna Ihe, Jesus wa ri nomuretima. Eye ke na pa hungirire indu tja yambururwa poo tja pindikisiwa. (1 Petr. 2:23) Nomuretima, Jesus wa tuurungire omauzeu  nokuhinokuunauna. Eṱe matu yenene okumuna kutja ongwaye Ombeibela tji i tja ngatu ‘ripure na ingwi ngwa zarere ovikaro vyovarunde.’ (Hebr. 12:2, 3) Nombatero ya Jehova, eṱe wina matu yenene okutuurunga omauzeu ayehe ngu matu munu nomuretima.

14. Matu rihongere ko tjike komuretima wa Abraham? (Ovaheberi 6:15) (Wina tara kotjiperendero.)

¹⁴ Hapo tjike indu omaundjiro wetu ohunga nomaandero wouye mbwi tji ha yenenisirwe? Ovengi vetu twa ri nomaundjiro wokutja omaandero maye ya tjimanga, nu nai tu rikenda kutja kamaatu hupu orure kutja tu ye mune. Otjikwaye tji matji tu vatere okukayenda komurungu okuundja nomuretima? Ngatu tare kotjihorera tja Abraham. Indu Abraham tja ri nozombura 75 nu tje hi na wa ri novanatje, Jehova we mu kwizikira kutja: “NAmi me ku tjiti u karire otjiwaṋa otjinene.” (Gen. 12:1-4) Hapo Abraham wa muna omakwizikiro ngo amaye yenenisiwa? Kako, ka munine omayenenisiro ayehe. Abraham tja za nokukonda Onḓonḓu Eufrat nokuundja ozombura 25, eye wa muna omuatje we Isak ama pandukwa. Nu kombunda yozombura 60, ovanatje vomuatje we, Esau na Jakob va pandukwa. (Lesa Ovaheberi 6:15.) Posi yokutja, Abraham ke na pa muna ozondekurona ze amaze rire otjiwaṋa otjinene nokukarumata Ehi Ekwizikwa. Nungwari, omurumendu omuṱakame ngo wa yorokera oupanga wopopezu ku nOmuute we. (Jak. 2:23) Nu indu Abraham tji ma kapendurwa, eye ma kakara nondjoroka okutjiwa kutja ongamburiro ye nomuretima vya eta ozondaya koviwaṋa avihe. (Gen. 22:18) Matu rihongere ko ye? Eṱe kamaatu munu omakwizikiro ayehe wa Jehova amaye yenenisiwa nai. Posi ya, indu tji tu nomuretima tjimuna Abraham, matu tjiwa kutja Jehova me tu sere ondaya nai, nu nandarire mouye oupe mbwa kwizika.—Mar. 10:29, 30.

15. Ovikwaye mbi matu yenene okutara ko indu tji matu tjiti omakonḓononeno wetu oveni wOmbeibela?

 ¹⁵ MOmbeibela mu novihorera vyarwe vyovandu mba raisa omuretima. (Jak. 5:10) Ma rire nawa indu tji mo tjiti omakonḓononeno ohunga novihorera otja imbyo. b Otjotjihorera, nandarire kutja David wa twirisiwa okurira ombara ya Israel ngunda e ri omuṱiṱi, eye aa sokuundja ozombura ozengi ngandu tja pewa ouvara. Simeon na Ana va karera Jehova nouṱakame ngunda amave undju omukwizikwa Messias. (Luk. 2:25, 36-38) Otja tji mo konḓonona omahungi otja ingo, paha omaziriro komapuriro ngu maye kongorere mba: Ovikwaye mbya vatera omundu ngwi okuraisa omuretima? Eye wa muna ouwa waye mena rokukara nomuretima? Me yenene vi okuhorera ku ye? Ove wina mo yenene okumuna mo ouwa indu tji mo rihongo ohunga na imba mbe ha raisire omuretima. (1 Sam. 13:8-14) Ove mape ya o pura kutja: ‘Ovikwaye mbya tjita kutja ave ha kara nomuretima? Ovikwaye ovivi mbya tjitwa ku wo mena rokutja kave raisire omuretima?’

16. Okukara nomuretima ku eta ouwa waye?

¹⁶ Ripurira kouwa mbu matu munu indu tji tu nomuretima. Indu tji tu nomutima, tu kara nondjoroka nohange. Okukara nomuretima ku tjita kutja tu kare nouveruke ouwa. Indu tji tu nomuretima ku na varwe, tu yorokera oupanga ouwa ku na wo. Nu ombwaneno mombongo i kurira ko. Indu omundu tji me tu pindikisa, natu ha hakahanene po okupindika, ku tjita kutja ouzeu mbwo au ha rire ounene. (Eps. 37:8; Omiano 14:29) Nu tjinenenene, indu tji tu nomuretima eṱe tu horera ku Tate wetu womeyuru nu tu tumbuka popezu na ye.

17. Matu sokurimanena okutjita tjike?

¹⁷ Omuretima tjiri otjikaṋena otjiwa nu tji tji tu etera ouwa. Katjiṋa otjipupu okukara nomuretima, posi ya nombatero ya Jehova matu yenene okukurisa otjikaṋena ho. Nu indu tji matu undju nomuretima ouye oupe, eṱe tu nongamburiro kutja “Muhona u tjevera avehe mbe nonḓuviro ku Ye, avehe mbe undja ombatero ye.” (Eps. 33:18) Atuhe ngatu rimanene okukayenda komurungu okukara nomuretima.