Hapo wa lesa nawa oumbo wOruhungu mbwa za nokupitisiwa oupe? Ngatu tare kutja mo yenene okuzira omapuriro ngu maye kongorere mba:

Ombeibela i tu honga tjike ohunga nondjenda ya Mukuru kweṱe?

Indu otjiwaṋa tjOvaisrael tji tja ri kehi youkarere moEngipte, Mukuru wa ṱunwa i yomihihamo vyawo mbyo. (Eks. 3:7; Jes. 63:9) Eṱe twa ungurwa kosaneno ya Mukuru, nu tu notjari. Eye u notjari na eṱe nandarire kutja povikando tu muna kutja katu ya pwira orusuvero rwe.—wp18.3, omuk. 8-9.

Omahongero wa Jesus ya vatera vi ovandu okunakaura ongaro yombangu?

Ovajuda ovengi moruveze rwa Jesus va ri nombangu youmuhoko. Kristus wa raisa ounanḓengu womerisusuparisiro nu a nakaura ongaro yokuritongamisira oumuhoko. Eye wa ningira ovemukongorere okuvarasana otjovangu nomarumbi.—w18.06, omuk. 9-10.

Otjikwaye tji matu rihongere komuano Mukuru mbwe hina wa yandjera Moses okuhita mEhi rOruyano?

Moses wa ri noupanga oupame puna Jehova. (Deut. 34:10) Kuṱa komaandero wozombura 40 mokuti onguza, ovandu va unauna otjikando otjitjavari kutja kave nomeva. Mukuru wa raera Moses kutja ma hungire koruuwa. Nungwari, Moses wa tona oruuwa. Nu imbi mape ya vya tjita kutja Jehova aha munu ondjozikiro, orondu Moses ka kongorere omirari Vye poo ka yandjere ohiviro kotjihimise Mukuru tja tjiti. (Num. 20:6-12) Ihi matji sokutuhonga ounanḓengu wokukara nonḓuviro ku Jehova nokumupa ohiviro.—w18.07, omuk. 13-14.

Ongwaye tji ma rire navi okupangura ovandu otja kombunikiro yawo yokombanda?

Pe noviṋa vitatu mbi tjita kutja tu pangure ovandu otja kombunikiro yokombanda: omuhoko omundu ma za, outumbe, nozombura nḓe na zo. Ohepero eṱe okumuna ovandu otja Mukuru tje ve muna! (Oviung. 10:34, 35)—w18.08, omuk. 8-12.

Omomiano viṋe Ovakriste ovanene motjiwondo mu mave yenene okuvatera varwe?

Omukriste omunene motjiwondo nu ngwa pewa omerizirira warwe ngunda omusuverwa ku Mukuru nu ma yenene okuungura ovingi okuvatera varwe. Eye mape ya a zuvarisire imba mba kupasana novaṱena kwetu nu mbe he ri ovakambure, okuvatera imba mba yaruka ombunda mongamburiro, okuhonga varwe Ombeibela, nokuneneparisa otjiungura tje tjokuzuvarisa.—w18.09, omuk. 8-11.

Ovakriste ve noviungurisiwa viṋe mbi vi ri mOviungurisiwa vyetu vyOkuhonga?

Oukarata womahakaeneno nowomaṋangero. Oumbapira hambondatu mbwa tjangwa nawa noumbo wOruhungu no Awake! Nu wina mu noumbrosjure, nomambo warwe yevari ngu tu rihongera ko Ombeibela, nozovidio ine, nga ku indji Ongwaye tji mo sokurihonga Ombeibela?—w18.10, omuk. 16.

Ovakriste mave “randa,” vi ouatjiri otja tji ve raerwa mOmiano 23:23?

Eṱe katu sutu otjimariva okuranda ouatjiri. Posi yokutja, tu hepa oruveze nozongondjero kokutja tu tjiwe ouatjiri.—w18.11, omuk. 4.

Matu rihongere ko tjike komuano Hosea ma ṱiza omukazendu we, Gomer?

Gomer wa tjita oruvakiro povikando ovingi, nungwari Hosea we mu isira na kaenda komurungu okurira omurumendu we. Indu omukweṋu morukupo tja tjiti oruvakiro, ingwi ngu hi nondjo ma yenene okuisira omukwao. Indu ingwi ngu hi nondjo tja kara nomahakaeneno womonyama ku nomukwao ngwa tura ondjo, kape nokukara epu okuteyera orukupo rukwao.—w18.12, omuk. 13.