OVAKAZENDU vevari omitanda aave kayenda momivanda vyotjihuro hi Baguio, moPhilippines. Owo va muna okatemba komambo, posi yokutja kave i re ku ko. Omukazendu omukambure wena Helen, ngwa kuramene meṋe yokatemba ngo wa meṱameṱa ku wo. Ovakazendu mbo va kayenda komurungu nouyenda wawo, posi yokutja omuano Helen maa meṱameṱa kwe ve nana ombango.

Kombunda, ngunda ovakazendu mbo ave ri mombesi okuyenda konganda, owo va muna Etuwo rOmerikotameneno nda ri nozoleṱera ozonene nḓa jw.org. Owo va zemburuka kutja, ozoleṱera otjingezo ve ze munu kokatemba komambo komurungu wanao. Ovakazendu mbo va heruka nu ave i kEtuwo rOmerikotameneno. Imbo va kamuna kutja ozombongarero zombongo ze hita pongapi.

Ovakazendu mbo va ya kombongarero ndja kongorera ko. Nu hapo owo va muna uṋe indu tji va hita metuwo romerikotameneno? Ya ri Helen. Owo va hakahana okumuzemburuka, mena rokutja aa meṱameṱa indu tji ve mu muna pokatemba. Helen wa tja: “Indu tjaave wondjo okuya kwami mba urumine, ee munu kutja mutu mba tjiti otjiṋa otjivi.” Posi yokutja owo va raera Helen kutja pa kayenda ye.

Owo va ri nondjoroka okukara pombongarero yombongo nokuhakaena ku novakambure mombongo. Indu tji va muna varwe amave kohorora etuwo kombunda yombongarero, owo va ningira okuvatera. Omukazendu umwe ka kara moPhilippines rukwao, posi yokutja ingwi owarwe u kara pozombongarero zombongo, nu wa uta okurihonga Ombeibela. Oviṋa avihe mbi vya tjitwa mena rokutja omukazendu omukambure wa meṱameṱa.