1. Ovakarere va Jehova ve raisa ongaro iṋe ombwa?

 RUKURU, Ombeibela ya hunganeka kutja ovakarere va Mukuru ‘mave ya ku ye’, poo mave riyandjere oveni motjiungura tja Jehova kehi yomuhunga mbu mave pewa i yOmuna we. (Eps. 110:3) Omaprofetero ngo ndino ye yenenisiwa. Ombura aihe Ovakarere va Jehova ovapyuke ve ungura ozoiri omangete motjiungura tjokuzuvarisa. Owo kave sutwa okuungura otjiungura hi, nungwari owo ve tji ungura mena rokutja ve vanga okutjita nao. Owo wina ve twa po oruveze okuvatera ovakambure ovakwao okumuna oviṋa mbi mave hepa, nokuvetunduuza nokuvevatera okukurisa ongamburiro yawo mu Jehova. Ovanene vombongo novavatere vombongo ve ungurisa oruveze rwawo oruingi okurirongerisira otupa twombongarero nokuvarura ovakambure ovakwao okuvetunduuza. Otjikwaye tji tji hinga ovakarere va Jehova okuungura oviungura avihe mbi? Omena rokutja owo va suvera Jehova nu va suvera ovandu varwe.—Mat. 22:37-39.

2. Otja kOvaroma 15:1-3, Jesus wa raisa otjihorera tjiṋe?

² Jesus wa raisa otjihorera otjiwa mena rokutja eye ee ripurire ku imbi ovandu varwe mbyaave hepa komurungu wokuripurira ku ye omuini. Eṱe tu kondja pu matu yenene okuhorera ku ye. (Lesa Ovaroma 15:1-3.) Imba mbe horera ku ye ve muna ouwa. Jesus wa tja: “Mokuyandja mu nenyando tjinene pokupewa.”—Oviung. 20:35.

3. Matu katara ku ye morupa ndwi?

³ Morupa ndwi, matu katara koviṋa tjiva Jesus mbya tjita  okuvatera varwe, nu matu katara kutja omomuano uṋe mu matu yenene okuhorera ku ye. Nu wina matu katara kutja matu yenene vi okukurisa onḓero yetu yokuvatera varwe.

4. Jesus wa twa vi ozonḓero za varwe komurungu wa inḓa oze omuini?

⁴ Jesus aa vatere varwe nandarire indu tja urirwe. Ripura nongaro Jesus ndja raisa indu ovandu ovengi tji ve ya ku ye kondundu popezu na Kapernaum. Jesus wa kumba ouṱuku auhe. Eye mape ya wa urirwe tjinene, posi yokutja tja muna otjimbumba tjovandu na munu imba ovasyona novavere, eye wa ṱondjenda na wo. Eye wa verukisa ovavere na yandja ehungi rapeke ndi tjiukwa otjOmazuvarisiro wOkondundu.—Luk. 6:12-20

5. Oviuru vyomaṱunḓu vi horera vi ku Jesus mokuraisa orusuvero, nandarire kutja vya urwa?

⁵ Omuano oviuru vyeṱunḓu mu vi horera ku Jesus. Ripura notjihorera hi, ihe weya ponganda nu wa urwa mena roviungura ovizeu mbya uhara ama ungura. Nu mape ya atja vanga kutja ave ha kara nomerikotameneno weṱunḓu ongurova ndjo, posi yokutja eye a kumbu ku Jehova okumupa omasa kutja ve ungure omerikotameneno weṱunḓu. Jehova a ziri ongumbiro ye nave kara nomerikotameneno weṱunḓu otja tji ve tjita aruhe. Ongurova ndjo, ovanatje ve rihongo otjiṋa otjinahepero, kutja okurikotamena ku Jehova ootjiṋa otjinanḓengu tjinenenene kovanene vawo.

6. Yandja otjihorera Jesus ma ungurisa oruveze rwe okuvatera varwe.

⁶ Jesus aa yenene okuvatera varwe nandarire indu tjaa hepa oruveze okukara erike. Ripura uriri kutja Jesus wa hihamwa pu pe ṱa pi indu epanga re Johanes Omupapitise tja zepewa. Jesus mape ya wa ri noruhoze tjinene. Ombeibela i tja: “Jesus tja zuvire ihi tji tja tjitirwe ku Johanes arire tja zu po mbo motjiyaha na i koṋa ka kakara erike.” (Mat. 14:10-13) Eṱe matu zuu kutja ongwaye eye tjaa vanga okukara ku ye omuini. Ovandu ovengi tji ve noruhoze ve vanga okukara ku wo oveni. Posi yokutja, Jesus kaa yenene okukara erike. Otjimbumba tjovandu tja tenga okuvaza poruveze ndo ngunda Jesus e hi ya vaza. Jesus wa tjita vi? Eye we ripura nouhepe wotjimbumba ho “nEye we ve ṱira ondjenda.”  Jesus wa muna kutja owo aave hepa ombatero nomahuhumiṋino okuza ku Mukuru. Ku nao, eye wa uta okuvevatera. Moruveze rwokuvehonga oviṋa oviṱiṱi uriri, ‘eye wa uta okuvehonga oviṋa ovingi.’—Mar. 6:31-34; Luk. 9:10, 11.

7-8. Yandja otjihorera tji matji raisa kutja ovanene vombongo vorusuvero, mave yenene vi okuhorera ku Jesus indu tji pe nomundu ngu ma hepa ombatero mombongo.

⁷ Omuano ovanene vombongo vorusuvero mu ve horera ku Jesus. Eṱe tu nondangi tjinene koviungura ovanene vombongo mbi ve tu ungurira. Ovakambure ovengi mombongo kave tjiwa oviungura avihe ovingi ovanene vombongo mbi ve ungura. Otjotjihorera, tji pe nomukambure ngwa vere nu ngu ma hepa omapangero watjimanga, ouṋepo wOkomiti yOmapangero u hakahana okukavatera ovakambure ovakwao. Nu tjinene oviṋa otja imbyo vi tjitwa mokati kouṱuku. Nungwari mena rorusuvero ndu ve na ro kovakambure ovakwao mbe ri mouzeu, ovanene vombongo nomaṱunḓu wawo ve ripurira kouhepe wovakambure ovakwao pendje nokuripurira ku wo oveni.

⁸ Ovanene vombongo wina ve vatera okutunga omatuwo womerikotameneno notuveze twarwe, nu wina ve vatera indu tji kwa tjitwa omaumba. Nowo ve ungurisa oruveze rwawo okuhonga, okutunduuza nokutuvatera. Tjiri matu sokutanga ovarumendu ovakambure mba nomaṱunḓu wawo. Jehova nge ve sere ondaya kombepo yawo yomeriyandjerero. Otjiperi kutja tjimuna ovandu avehe, ovanene vombongo ve hepa okuungurisa oruveze rwawo nawa. Owo kave sokuungurisa oruveze rwawo aruhe moviungura vyombongo nga tji ve hi noruveze okuyandja ombango kovihepwa vyeṱunḓu rawo.

9. Otja kOvafilipi 2:4, 5, Ovakriste avehe mave sokukondja okukara nongaro iṋe?

⁹ Lesa Ovafilipi 2:4, 5. Otjiperi kutja eṱe atuhe kaweṱe ovanene vombongo, posi yokutja atuhe matu yenene okuhorera kombepo ya Jesus yomeriyandjerero. Ombeibela i tja eye wa “kambura ongaro yomukarere.” (Fil. 2:7) Ripurira ku imbi mbi matu yenene okurihonga okuza kezeva ndo. Omukarere omusemba aruhe u kondja okuyorokisa omutima womuhona we. Mena rokutja oweṱe ovakarere va Jehova nu tu karera ovakambure ovakwetu, tu vanga okuyorokisa Jehova novakambure ovakwetu. Ove mo yenene okutjita nao mokutara koviṋa tjiva mbi mavi kongorere mba.

10. Omapuriro yeṋe ngu matu yenene okuripura oveni?

¹⁰ Ripurira kongaro ndji u raisa. Ripura omuini omapuriro tjimuna nga: ‘Hapo mbi kara nonḓero okuungurisa oruveze nomasa wandje okuvatera varwe? Otjotjihorera, ami etje tjita vi indu tji mba ningirwa okukavarura omurumendu omukambure omunene motjiwondo ngu kara monganda yovakurundu, poo okutwaerera omukazendu omukambure omunene motjiwondo kozombongarero zombongo? Indu tji mape hepa ovandu okukohorora oruveze pu mape kara omaworonganeno wotukondwa poo okuṱuna etuwo romerikotameneno, hapo ami mbi hakahana okuriyandjera okuvatera?’ Indu tji twe riyandja ku Jehova, eṱe twe mu kwizikira kutja matu ungurisa oviṋa avihe mbi tu navyo okumukarera. Eye u vanga kutja tu ungurise oruveze rwetu, omasa wetu noviṋa mbi tu navyo okuvatera varwe. Ku nao, eye u kara nondjoroka indu tji matu vatere varwe. Indu tji wa munu kutja mo hepa okutjita omarundurukiro, ove mo yenene okutjita vi?

11. Ongumbiro mai yenene okutuvatera vi okukara nombepo yomeriyandjerero?

¹¹ Kumba ku Jehova okuza komutima. Ngatu tje ove mo munu kutja mo hepa okutjita omarundurukiro mongaro yoye kutja u yenene okuvatera varwe, posi ya ko nonḓero okutjita nao. Tji pe ri nao, kumba ku Jehova okuza komutima. Kara nouatjiri. Raera Jehova kutja u noumune uṋe, nu mu ningira kutja me ku pe “ombango nomasorero okuyenenisa ondyero ye.”—Fil. 2:13.

12. Ovarumendu ovakambure omitanda mba papitisiwa mave yenene okuvatera vi mombongo mu ve ri?

¹² Tji u ri omurumendu omukambure omutanda ngwa papitisiwa, ningira Jehova me ku vatere kutja u kare nonḓero yokuvatera varwe mombongo. Momahi tjiva, mu novanene vombongo ovengi okukapita ovavatere vombongo, novengi vaimba mbe ri ovavatere vombongo kamitanda. Otja otjira tja Jehova pu matji kurire ko, matu hepa ovarumendu ovakambure omitanda ovengi, okuvatera ovanene vombongo kutja ve vatere ovakambure ovakwao mombongo. Indu tji mo riyandjere okuungurira Jehova momuano auhe mu mo hepwa mo kara nondjoroka. Omena raye? Mena rokutja ove mo tjiti oviṋa mbi tjata ku Jehova. Mo kara nena ewa nu mo kara nondjoroka ndji za mokuvatera varwe.

13-14. Ovikwaye mbi matu yenene okutjita, okuvatera ovakambure ovakwetu? (Tara kotjiperendero tjokombanda yokambo nga.)

¹³ Yandja ombango kouhepe wavarwe. Omuapostele Paulus wa raera Ovakriste mba turire moJudea kutja: “Amu zembi okutjita ouwa nokuvaterasana, orondu ozombunguhiro otja inḓa ze tjata ku Ndjambi.” (Hebr. 13:16) Ingo ya ri omaronga nge ve vatera. Ousupi kombunda yokuhindirwa orutuu ndwi, Ovakriste moJudea aave hepa okuisa ozonganda zawo, nozongetjefa zawo, novazamumwe  vawo mbe ha ri Ovakriste nu aave ‘sokutaurira kozondundu.’ (Mat. 24:16) Otjiperi kutja oruveze ndwo ya ri ounanḓengu tjinene ku wo okuvaterasana. Andakuzu komurungu wanao va ṱakamisa eronga ra Paulus ohunga nokuhaṋasana oviṋa mbi ve na vyo ku na varwe, atja i rira oupupu ku wo okuiririra omuano omupe wokuhupa.

¹⁴ Kaaruhe ovakambure ovakwetu tji mape ya ave tu raere oviṋa mbi mave hepa. Otjotjihorera, ngatu tje omurumendu omukambure wa zepaisa omukazendu we. Hapo omurumendu omukambure ngwi, ma hepa ombatero yokuzikirwa ovikurya, otjitoore poo oviungura vyoponganda? Eye mape ya kamaa ningire ombatero mena rokutja ke nakuvanga okutupa ouzeu. Posi yokutja eye mape ya a kara nondangi tjinene, indu tji twe mu vatere nandarire ngunda e hi ya ningira ombatero ku eṱe. Atu munu kutja pe nomundu warwe ngu me mu vatere, poo kutja eye aruhe ma yenene okuturaera oviṋa mbi ma hepa. Ripura omuini kutja: ‘Andakuzu mbi ri mongaro otja indjo, etje vanga okuvaterwa na iye?’

15. Ovikwaye mbi matu sokutjita indu tji matu vanga okuvatera varwe?

¹⁵ Tjita kutja i rire oupupu ku varwe okuningira ombatero kove. Ove mape ya motjiwa ovakambure mombongo yeṋu mba suvera okuvatera varwe. Owo kave tjiti kutja eṱe tu mune kutja matu ve pe ouzeu. Tu tjiwa kutja ve kara kamwaha okutuvatera indu tji matu hepa ombatero, neṱe tu vanga okuhorera ku wo. Omunene wombongo wena Alan wozombura 45, u vanga kutja i rire oupupu ku varwe okuya ku ye indu tji ve nouzeu. Alan wa tja nai ohunga notjihorera tja Jesus: “Nandarire kutja Jesus wa ri omundu ngwa ri noviungura ovingi, ovandu ovanene novaṱiṱi ve mu suverere, nu ya ri oupupu ku wo okuningira  ombatero ku ye. Owo aave tjiwa kutja eye u rikendera ku wo. Ami tjiri mbi vanga okuhorera ku Jesus nokutja i rire oupupu kovandu varwe okuya ku ami. Nu wina mbi vanga okutjiukwa otjomundu ngu norusuvero nu ngu rikendera ku varwe.”

16. Okuṱakamisa omurari mbu ri mEpsalme 119:59, 60 maku tu vatere vi okuhorera kotjihorera tja Jesus nawa?

¹⁶ Eṱe katu sokurihahiza indu tji tu hi nakuyenena okuhorera kotjihorera tja Jesus nawa. (Jak. 3:2) Omundu ngu me rihongo okuperenda kamaa yenene okuperenda nawa okukapita ingwi ngu me mu hongo. Posi ya otja tji me rihongere kozondataiziro ze, nokukondja okuhorera komumuhonge otja pu ma yenene, omuhongwa ma yenene okurira omuperende omuwa. Momuhingo otjingewo, indu tji twa ṱakamisa imbi mbi matu rihongo indu tji matu konḓonona Ombeibela nokukondja okuungurira koungundipare wetu, eṱe matu yenene okukongorera Jesus nawa.—Lesa Epsalme 119:59, 60.

17-18. Otja tji matu kondjo okuhorera kotjihorera tja Jesus tjokuraisa ombepo yomeriyandjerero, ouwa waye mbu matu munu?

¹⁷ Eṱe tji tu raisa ombepo yomeriyandjerero, varwe ve yenena okuhorera ku eṱe. Omunene wombongo umwe wena Tim wa tja: “Eṱe tu novarumendu ovakambure omitanda mba zikwa otjovavatere vombongo. Notjiṋa tjimwe tji tje ve vatera okuvaza pondondo ndjo, ya ri mena rokutja va muna varwe mba ri nombepo yomeriyandjerero. Nowo aave vanga okuhorera ku wo. Ombepo yomeriyandjerero yovarumendu ovakambure omitanda mbo, i vatera ombongo tjinene nu wina i vatera ovanene vombongo.”

¹⁸ Ovandu ovengi mouye ndino ve raisa ombepo yokuripurira ku wo oveni. Posi yokutja Ovakarere va Jehova kave ri nao oparukaze. Eṱe twa ṱunwa i yotjihorera tja Jesus tjokuraisa ombepo yomeriyandjerero, nu twe rimanene okuhorera ku ye. Otjiperi kutja eṱe kamaatu yenene okuhorera ku Jesus nokuhina okutjita ozondataiziro, posi yokutja matu yenene okukondja ‘okuyata mozondambo ze.’ (1 Petr. 2:21) Otja tji matu kondjo pu matu yenene okuhorera kotjihorera tja Jesus, eṱe matu kara nohange mena rokutja matu yorokisa Jehova.