1, 2. Otjitjitwa tjiṋe otjihimise tji matji tu waneke mombura ndji 2018, nu omena raye? (Tara kotjiperendero pomautiro worupa ndwi.)

TJI YA tjiti 31 ku Marta 2018, ovandu omangete mouparanga wouye mave worongana pamwe potjitjitwa tji tji tjitwa rumwe mombura aihe. Komahitiro weyuva, Ovahongonone va Jehova novandu varwe ovengi mave worongana pamwe okuzemburuka onḓiro ya Kristus. Mombura aihe, omazemburukiro nga ootjitjitwa tjimwe otjihimise kombanda yEhi, tji tji tu waneka kumwe!

² Jehova na Jesus mave kara nondjoroka tji mave tarere ovandu omangete mouye auhe, amave i kotjitjitwa tjapeke hi oiri aihe nga komaandero weyuva ndo. Ombeibela ya hunganeka ohunga ‘notjimbumba otjinene tjovandu omundu tje hi nokusora okuvara. Owo va zire movanavisenginina avehe, na momihoko noviwaṋa avihe, na momaraka aehe.’ Owo aa ve ravaere kutja, “Ondjamo i za ku Ndjambi wetu ngwa haama kotjihavero tjouhona, na kOndjona!” (Omavan. 7:9, 10) Otjiṋa otjiwa kutja ombura aihe pOmariro Omayapuke, ovandu ovengi ve yozika Jehova na Jesus, mena roviṋa oviwa mbi ve ve tjitira!

3. Orupa ndwi maru kazira omapuriro yeṋe?

 ³ Pe nomapuriro warwe ngu maye kazirwa morupa ndwi. (1) Ami me yenene vi okurirongerisira Omariro Omayapuke kokutja mbi kamune mo ouwa? (2) Omomuhingo uṋe Omariro Omayapuke mu ye ṱuna kombwaneno yovakarere va Mukuru? (3) Ami me yenene vi okuyandja oruvara kombwaneno ndji? (4) Hapo mape ya ape kara Omariro Omayapuke omasenina? Tji peri nao, oruṋe?

4. Ongwaye tje ri otjiṋa otjinanḓengu ku eṱe okukara pOmariro Omayapuke aruhe tji matu yenene?

⁴ Ripura nouwa mbu mo munu tji wa kara pOmariro Omayapuke. Zemburuka kutja ozombongarero zombongo orupa rwomerikotameneno. Tjiri matu yenene okukara nongamburiro yokutja Jehova na Jesus ve zemburuka imba mbe tjita ozongondjero okukara pombongarero onanḓengu ndji ombura aihe. Nu matu vanga okuraisira Jehova na Jesus kutja matu kara pOmariro Omayapuke, kainatja kutja pe ya ye. Indu tji matu raisa movitjitwa vyetu kutja ozombongarero zomerikotameneno nḓa, ozonanḓengu tjinene ku eṱe, tu yandjera kutja Jehova ma ṱize omana wetu ‘membo romazemburukiro,’ poo “membo romuinyo.” Oro embo ndi nomana wa imba mbu mave kamuna omuinyo waaruhe.—Mal. 3:16; Omavan. 20:15.

5. Omariro Omayapuke ngunda aye hiye ya, matu yenene vi ‘okurirora oveni kutja tu nongamburiro’?

⁵ Matu yenene okutwapo oruveze rwokukumba nokukonḓonona oupanga wetu kuna Jehova momayuva wokomurungu wOmariro Omayapuke. (Lesa 2 Ovakorinte 13:5.) Matu yenene vi okutjita nao? ‘Matu sokurirora oveni kutja tu nomuinyo mongamburiro.’ Kutja tu yenene okutjita nao, matu sokuripura oveni kutja, ‘Hapo mbi kambura kutja owami orupa rotjira Jehova tja toorora kutja arire tji tja yenenisa ombango ye? Mbi kondja nomasa okuzuvarisa nokuhonga ovandu ohunga nombuze ombwa yOuhona? Ovitjitwa vyandje vi raisa kutja tjiri mbi kambura kutja nai tu hupa momayuva omasenina, nokutja omaandero wounane wa Satan ye ri popezu? Hapo mbi nongamburiro otjingeyo ndji mba ri na yo mu Jehova na Jesus, indu tji mbe riyandja ku Jehova Mukuru?’ (Mat. 24:14; 2 Tim. 3:1; Hebr. 3:14) Tji twe ripurire komaziriro womapuriro nga, maku tu vatere okurikonḓonona oveni.

6. (a) Ondjira iṋe aiyerike ndji mai tu twara komuinyo waaruhe? (b) Omunene wombongo umwe ee rirongerisa vi ombura aihe kOmariro Omayapuke, nove mo yenene vi okuhorera ku ye?

⁶ Matu sokulesa nokuripurira ko oukoto kOmatjangwa ngu maye hungire ohunga nOmariro Omayapuke. (Lesa Johanes 3:16; 17:3.) Ondjira aiyerike ndji twara komuinyo waaruhe i kamburira mo ‘okutjiwa’ Jehova ‘nokukambura mu’ Jesus, Omuna we omukwatwaerike. Indu tji mo rirongerisire Omariro Omayapuke, ongwaye tji u hina okukonḓonona oviṋa mbi mavi ku vatere okuya popezu na Jehova na Jesus? Ngatu tare kotjihorera tjomurumendu omukambure ngwa kara orure otjomunene wombongo kutja wa tjita vi. Ozombura ozengi eye aa wongo oumbo wOruhungu mbwaa u hungirire kOmariro Omayapuke norusuvero Jesus na Jehova ndu ve tu raisira. Movivike vyokomurungu wOmariro Omayapuke, eye aa lese omambo nga rukwao nokuripurira ko oukoto kounanḓengu womazemburukiro nga. Povikando tjiva, aa paha omambo warwe omape okuweza ku inga nga ri na wo rukuru. Omunene wombongo ngwi wa muna kutja okulesa rukwao omambo nga nokuripurira ko oukoto kOmalesero wOmbeibela ohunga nOmariro Omayapuke, aaku mu vatere okurihonga oviṋa ovipe ombura aihe. Otjiṋa otjinanḓengu tjinene, eye aa munu kutja orusuvero rwe ku Jehova na Jesus aa ru kurire ko ombura aihe. Omerihongero otja inga maye yenene okukuvatera okukurisa orusuvero rwoye  nokukara nondangi ku Jehova na Jesus, nu mape ya aye ku vatere okumuna ouwa mOmariro Omayapuke.

7. (a) Jesus wa kumba ohunga na tjike mongurova ondenga yOmariro Omayapuke? (b) Otjikwaye tji matji raisa kutja Jehova wa zira ongumbiro ya Jesus ndji?

⁷ Mongurova ondenga yOmariro Omayapuke, Jesus wa kumba kutja ovemukongorere ve kare mombwaneno, nokutja ve yorokere ombwaneno Jehova na ye ndji ve na yo. (Lesa Johanes 17:20, 21.) Jehova tjiri wa zira ongumbiro yOmuna we ndjo, nu nai ovandu omangete ve nongamburiro yokutja Jehova wa hinda Omuna we. Kape nombongarero yarwe pendje nOmariro Omayapuke ndji raisa ombwaneno Ovahongonone va Jehova ndji ve na yo. Meyuva ndo, ovandu voviwaṋa novivara pekepeke mouye auhe, ve worongana pamwe okuraisa kutja ve nongamburiro yokutja Jehova wa hinda Omuna we. Momahi tjiva, katjiṋa tji tji munika tjinene, poo tji tji varwa nonḓengu yokombanda, okumuna ovandu vomihoko pekepeke ava worongana pamwe komerikotameneno. Posi yokutja ombwaneno otjiṋa otjiwa ku Jehova na Jesus!

8. Ombuze iṋe Jehova ndja yandja ku Esekiel ohunga nombwaneno?

⁸ OtjOvahongonone va Jehova katu munu ko oukumise kombwaneno ndji tu na yo ndji. Jehova wa hunganeka ohunga nombwaneno ndji. Tara kombuze eye ndja yandja komuprofete Esekiel ohunga nokuhondjera outi uvari, okati ‘kOuhona wa Juda’ nokati ‘kOuhona wa Israel.’ (Lesa Esekiel 37:15-17.) Okambo kOruhungu ka Juli 2016 morupa ndwi “Omapuriro okuza kovalese” ka kahurura kutja: “Jehova wa yandja ombuze ku Esekiel yomakwizikiro wokutja otjiwaṋa tje matji yaruka kEhi Ekwizikwa nu matji kakara mombwaneno otjotjiwaṋa tjimwe. Omakwizikiro nga wina ya hunganeka kutja imba mbe karera Jehova momayuva omasenina, mave kara mombwaneno otjotjiwaṋa tjimwe.”

9. Omayenenisiro womakwizikiro wa Esekiel ye munika vi ombura aihe pOmariro Omayapuke?

⁹ Okuza komautiro wombura ndji 1919, Jehova rutenga wa ṱuna na waneke ovatwirisiwa, mba ri tjimuna okati ‘kOuhona wa Juda.’ Okuzambo ovandu ovengi mbe nomaundjiro wokukahupa kombanda yehi, nu mbe ri otja okati ‘kOuhona wa Israel,’ va wana ku novatwirisiwa, nu ovimbumba vivari mbi vya rira “orupanda rumwe.” (Joh. 10:16; Sak. 8:23) Jehova wa kwizika kutja ma waneke outi auyevari mbwi kumwe, na ungura po okati kemwe, nu a ṱiza meke re. (Esek. 37:19) Nai ovimbumba vivari mbi, vi karera mombwaneno kehi yomananeno wOmbara imwe, ngu ri Jesus Kristus. Esekiel wa kwizika ohunga na Jesus indu Mukuru tja tja “omukarere wandje David.” (Esek. 37:24, 25) Ombura aihe tji matu worongana pOmariro Omayapuke okuzemburuka onḓiro ya Kristus, tu muna ombwaneno yovimbumba vivari, ovatwirisiwa mbe ri kombanda yehi “nozonḓu zarwe,” mbya kwizikwa okupitira mu Esekiel! Posi yokutja auhe wetu ma sokutjita vi kutja ma yandje oruvara kombwaneno yovakarere va Mukuru?

10. Matu yenene vi okutunduuza ombwaneno mokati kovakarere va Mukuru?

¹⁰ Omuano umwe mu matu yenene okutunduuza ombwaneno yovakarere va Mukuru, omokurira overisusuparise. Indu Jesus tja ri kombanda yehi, wa raera ovahongewa ve kutja ve risusuparise. (Mat. 23:12) Indu tji u ri omurisusuparise, kamoo kara nombepo youye yokuritongamisa. Posi yokutja omerisusuparisiro maye ku vatere okukara nondengero ku imba mbe hongorera otjiungura mombongo, nu ombepo otja indji i eta ombwaneno mombongo. Kombanda yaavihe, okurisusuparisa ku yorokisa Mukuru, orondu eye “u pirukira overitongamise nungwari  imba overisusuparise e ve ṱire otjari.”—1 Petr. 5:5.

11. Indu tji matu ripurire komaheero womboroto nomavinu, ku tu vatera vi okukara nombwaneno?

¹¹ Omuano outjavari mu matu yenene okutunduuza ombwaneno, omokuripurira komaheero womboroto nomavinu nge ungurisiwa pOmariro Omayapuke. Matu sokutjita nao komurungu wongurova onanḓengu ndji, na mongurova ndjo. (1 Kor. 11:23-25) Omboroto i kuramena po orutu rwa Jesus ndwa punguhwa otjombunguhiro, nu omavinu ye kuramena po ombinḓu ye ndja tirahiwa. Posi yokutja tu hepa ovingi kombanda yokuzuva kutja omboroto poo omavinu ye kuramena po ye. Zemburuka kutja otjisuta tjonguturiro Kristus tja yandja otjombunguhiro, tji raisa orusuvero momiano vivari ovinene. Orwo orusuvero Jehova ndwa raisa mokuyandja Omuna we mena retu, norusuvero Jesus ndwa raisa mokuriyandjera okupunguhirwa omiinyo vyetu. Okuripurira korusuvero ndwi, maku sokutuhinga okuraisa orusuvero ku wo wina. Nu orusuvero auhe wetu ndwe na ro ku Jehova ru ri tjimuna ongoze ndji tu kuta nokutuwaneka kumwe.

12. Motjihorera ohunga nombara nokusuta ozondjo, Jesus wa raisa vi kutja Jehova u vanga kutja eṱe tu isire varwe?

¹² Omuano warwe outjatatu mu matu yenene okutunduuza ombwaneno, omokuisira varwe. Indu tji matu isire imba mbe tu tjiti navi, matu raisa kutja tu nondangi kondjesiro yomauvi wetu oveni ngu twa yenena okuisirwa motjimbe tjotjisuta tjonguturiro. Ngatu tare kotjisasanekero tja Jesus tjimwe tji tja tjangwa mu Mateus 18:23-34. Ripura omuini kutja, ‘Hapo otjisasanekero hi matji ndji hingi okutjita otja Jesus pa honga? Mbi raisa omuretima nu mbi ripurira kongaro yovakambure ovakwetu? Mbi kara kamwaha okuisira imba mbe ndji hihamisa?’ Otjiperi kutja ourunde tjiva ounene pu warwe, nu tjiva u rira ounene tjinene nga tje ri ouzeu ku eṱe ovandu ovahahomonena okuisira. Posi yokutja, otjisasanekero hi matji tu hongo ohunga na imbi Jehova mbye undjira ko ku eṱe. (Lesa Mateus 18:35.) Jesus wa raisa oukahu kutja Jehova kenee tu isire indu tji tu hina okuisira ovakambure ovakwetu, tjinangara pe nepu ewa ndi matu sokutjitira nao. Ihi tjiri otjiṋa tji matu sokuripurira ko nawa. Tji matu vanga okutjevera nokuṱiza ombwaneno yetu ndji tu na yo, matu sokuisira varwe otja Jesus pa honga.

13. Indu tji matu raisa kutja oweṱe ovatjite vohange, ku eta vi ombwaneno?

 ¹³ Indu tji matu isire varwe, tu raisa kutja oweṱe ovatjite vohange. Omuapostele Paulus we tu ronga nomambo nga: “Kondjeye okuṱakamisa oruwano ndu mu pewa i Ombepo ya Ndjambi. Nohange ndji za ku Ndjambi ngai mu waneke kumwe.” (Ef. 4:3) Moruveze rwOmariro Omayapuke nu tjinenenene mongurova yOmariro Omayapuke, ripura oukoto ohunga nokutja u tjinda vi varwe. Ripura omuini kutja, ‘Ami mbi raisa kutja owami omundu ngu mbi ha ṱiza ongore? Ami mbi tjiukwa otjomundu ngu mbi kondja okutunduuza ohange nombwaneno?’ Inga tjiri omapuriro omananḓengu ngu matu sokuripurira ko moruveze rwOmariro Omayapuke ombura aihe.

14. Matu yenene vi okuraisa kutja tu ‘zarasana norusuvero’?

¹⁴ Omuano outjaine mu matu yenene okutunduuza ombwaneno, omokuraisa orusuvero otja Jehova, Mukuru worusuvero. (1 Joh. 4:8) Eṱe katu nokuvanga okutja nai kovakambure ovakwetu: “Ami me sokuvesuvera, posi yokutja kave nakuhepa okutjata ku ami”! Okuripura nao kaku hitasana neronga ra Paulus ndi tja “zarasaneye norusuvero.” (Ef. 4:2) Eye katjere “zarasaneye” uriri. Posi yokutja eye wa weza kutja matu sokutjita nai “norusuvero.” Pe nombangu onene. Mombongo mu tu ri tu hakaena novandu pekepeke Jehova mba nanena ku ye. (Joh. 6:44) Mena rokutja Jehova we ve nanena ku ye, pe heya kutja eye u ve vara otjovandu mbe nonḓengu yokusuverwa. Nu hapo mape ya vi kutja auhe wetu ma pangure omukambure omukwao, otja omundu ngu hi nonḓengu yokusuverwa? Atu isa okuraisa orusuvero Jehova ndwe tu rakiza kutja ngatu raise!—1 Joh. 4:20, 21.

15. Eṱe matu tjiwa vi kutja maku kara Omariro Omayapuke omasenina?

¹⁵ Eyuva rimwe maku kara Omariro Omayapuke omasenina. Matu tjiwa vi? Morutuu rwe orutenga ndwa hinda kOvakorinte, Paulus wa tjanga kOvakriste ovatwirisiwa kutja mokuzemburuka onḓiro ya Jesus ombura aihe, owo ve “zuvarisa onḓiro ya Muhona nga Eye tji mee ya.” (1 Kor. 11:26) Omambo nga “tji mee ya,” ye heya ovitjitwa otjingevyo ‘vyomeero’ Jesus mbya tamuna momaprofetero we ohunga noruveze rwomaandero. Mokuhungirira kondatumisire ondirise ndji ri komurungu, Jesus wa tja: “Otjiraisiro tjOmuna wOmundu otji matji munika mevaverwa; nomihoko avihe mavi uru tji mave munu Omuna wOmundu ama yende movikamba vyeyuru nomasa omanene nouvara. Ohiva onene mai pose, nEye ma hindi ovaengeli ve komikuma poune wavyo vyehi, nowo ave kawonga otjiwaṋa tje otjitoororwa okuza kotjikoro tjimwe tjouye nga kotjikwao.” (Mat. 24:29-31) ‘Omawongero wotjiwaṋa tje otjitoororwa’ nga, ye heya oruveze ndwi Ovakriste ovatoororwa avehe mba sewa kombanda yehi, tji mave i keyuru. Ihi matji tjitwa pomautiro wondatumisire ondirise, posi yokutja ngunda ovita vya Armagedon avi hiya uta. Nu okuzambo imba 144 000 avehe mave kayandeka ozombara kombanda yehi puna Jesus. (Omavan. 17:12-14) Omariro Omayapuke ngu maye kara ko komurungu womawongero wovatwirisiwa okuyenda keyuru, maye rire omasenina, orondu oruveze ndwo tjandje Jesus ‘we ya.’

16. Ongwaye tji u nonḓero yokukara pOmariro Omayapuke wombura ndji?

¹⁶ Ngatu kondje kutja tu kare pOmariro Omayapuke momayuva 31 ku Marta 2018, kutja tu mune mo ouwa. Nu ngatu ningire Jehova, okutuvatera kutja tu yandje oruvara kombwaneno yovakarere ve! (Lesa Epsalme 133:1.) Tjiwa kutja eyuva rimwe Omariro Omayapuke ngu tu kara na wo, maye ya komaandero. Nu nai ngatu kondje nomasa okukara pOmariro nga, nokuvara ombwaneno ndji tu kara na yo pOmariro Omayapuke pondondo yokombanda.