1-2. Omuengeli wa raera ye kovakazendu mba ri peyendo ra Jesus, nu Jesus we ve rakiza tjike?

INDU tji ya ri 16 ku Nisan, 33 O.Z. Rukuru muhuka omunene ovakazendu tjiva mba ri ovaṱakame vaya keyendo ra Jesus kombunda yomayuva yetatu a vau momuinyo, owo aave vanga okuhwa orutu rwa Jesus ovyomoro omuwa nomaze wokutwirisa posi yokutja tji veya mbo owo va uruma tji va muna kutja eyendo riritjo. Omuengeli we ve raera kutja Jesus wa pendurwa movakoke, nu wa tja: “Eye me mu tengere po okuyenda koGalilea, nu oku mamu kemumuna!”—Mat. 28:1-7; Luk. 23:56; 24:10.

² Ovakazendu tji va za peyendo Jesus omuini we ri munikisa kuwo na tja: “Twendeye mu karaere ovangu vandje kutja ve yende koGalilea, nowo oku mave kendjimuna.” (Mat. 28:10) Otjiṋa otjitenga Jesus tja tjita kombunda yombendukiro ye, eye wa hakaena novahongewa ve nu we varaera oviṋa tjiva ovinanḓengu.

3-4. Ongwaye tji matu tja erakiza ndi ri mu Mateus 28:19, 20 ka ri yandjerwe kovaapostele uriri? (Tara kotjiperendero tjokombanda yokambo nga.)

³ Lesa Mateus 28:16-20. Indu Jesus tja hakaena novahongewa ve, eye we ve raera otjiungura otjinanḓengu tji mave sokutjita oruveze ndo nu iho otjiungura tji tu ungura ndino. Jesus wa tja: “Otji mwa sokuyenda koviwaṋa avihe ngamwa akuhe mu kaise po ovandu ovahongewa vandje . . . Nu ve hongeye okuṱakamisa oviṋa avihe mbi mbe mu raera.”

⁴ Jesus u vanga kutja ovemukongorere avehe ve zuvarise. Erakiza ndo kayandjere kovaapostele ve imbo 11 ovaṱakame uriri.  Ongwaye tji matu tja nao? Indu Jesus tja yandja eronga rokukaisapo ovandu ovahongewa, ovaapostele ka mba ri po aveyerike kondundu moGalilea. Hapo matu tjiwa vi? Zemburuka omambo omuengeli nga hungira kovakazendu, indu tja tja: ‘Eṋe oku mamu kemumuna’ moGalilea. Iho matji hee kutja ovakazendu ovaṱakame mbo wina opuvari pombangarero ndjo. Posi yokutja wina pa ri novandu varwe. Omuapostele Paulus wa tja, Jesus we “rimunikisa kovakambure, mba ri komeho yomasere yetano.” (1 Kor. 15:6) Eye we rimunikisira pi?

5. Matu rihongo tjike 1 Ovakorinte 15:6?

⁵ Morutuu orutenga rOvakorinte 15:6 Paulus aa hungirire kombongarero ndja ri mu Galilea ndja hungirwa mu Mateus ekondwa 28. Ongwaye tji matu tja nao? Mena rokutja ovahongewa ovengi va Jesus Kristus va ri ovature va Galilea. Kunao ya ri oupupu okuworonganena kondundu moGalilea ku notjimbumba tjovandu ovengi pendje nokuworonganena pondjuwo yomundu moJerusalem. Nu tjarwe, kombunda yombendukiro ye, Jesus wa hakaena pu novaapostele ve 11 ponganda yomundu moJerusalem komurungu wa nao. Ndovazu Jesus aa vanga kutja ovaapostele ve arire mba zuvarisa nokukaisapo ovandu ovahongewa, eye atja yenena okuveraera nao moJerusalem pendje nokuningira wo novandu varwe okukahakaenena moGalilea.—Luk. 24:33, 36.

6. Omomuano uṋe Mateus 28:20 mu ri raisa kutja erakiza rokukaisapo ovandu ovahongewa ma ri sokuṱakamisiwa ndino, nu ovandu ve ṱakamisa vi erakiza ndo?

⁶ Tara kepu rarwe enanḓengu. Erakiza ra Jesus ri kamburira mOvakriste avehe nungwari kawo mba mba hupire moruveze ndo. Matu tjiwa vi? Jesus wa mana nomambo nga: “Ami mbi ri puna eṋe omayuva aehe nga komaandero wouye.” (Mat. 28:20) Tjimuna Jesus tja heya ovandu ovengi ndino ve zuvarisa. Ovandu ape 300 000 ve papitisiwa ombura aihe otjOvahongonone va Jehova nu ve rira ovahongewa va Jesus Kristus, tjiri indjo ondjoroka onene.

7. Matu ka hungirira ku ye nongwaye?

⁷ Ovengi mbe rihonga Ombeibela ve toora omukambo wokupapitisiwa. Posi yokutja tjiva mbe rihonga Ombeibela puna eṱe ve tira okurira ovahongewa. Owo ve tjaterwa i yoviṋa mbi mave rihongo nungwari kave toorere komukambo wokupapitisiwa. Eṱe atuhe mbu tu novahongwa vOmbeibela tu vanga okuvevatera kutja ve ṱakamise imbi mbi ve rihongo, nu ve rire ovakongorere va Kristus. Orupa ndwi maru ka hungirira komuano mbu matu yenene okuvatera ovahongwa vetu okusuvera Jehova nokukurisa oupanga kuna ye. Ongwaye tji matu hepa okuhingira ohunga nepu ndo? Mena rokutja povikando tjiva mape ya atu hepa okutoorora kutja matu kayenda komurungu ku nomuhongwa wetu poo indee.

8. Ongwaye povikando tjiva tje rira ouzeu okuvatera ovahongwa vetu okusuvera Jehova?

⁸ Jehova u vanga kutja ovandu ve mu karere mena rokutja ve mu suvera. Kunao ondando yetu oyokuvatera ovahongwa vetu okutjiwa kutja Jehova u rikendera wo nokutja we ve suvera tjinene. Eṱe tu vanga okuvevatera okumuna Jehova otja ihe ngu ‘tjevera ozosewa, nu ngu yama ovahepundu.’ (Eps. 68:5) Indu ovahongwa vetu tji va munu kutja Mukuru tjiri we ve suvera, owo wina mave utu okumusuvera. Mape ya a rire ouzeu kovahongwa tjiva okumuna kutja Jehova oihe worusuvero mena rokutja ooihe kave ve raisire orusuvero. (2 Tim. 3:1, 3) Otja tji mo hongo omuhongwa woye hungirira kovikaṋena vya Jehova oviwa. Nu mu vatera okutjiwa kutja Mukuru worusuvero u vanga okumupa omuinyo waaruhe, neye u ri kamwaha okumuvatera. Ovikeṋa vyarwe mbi matu yenene okutjita?

9-10. Omambo yeṋe ngu maye sokuungurisiwa indu tji mo rihongo Ombeibela ku novandu, nu ongwaye tji mo sokuungurisa omambo ngo?

 ⁹ Ungurisa omambo nga “Ombeibela mai yenene okutuhonga tjike?” na indi “Matu riṱizire vi morusuvero rwa Mukuru?” Omambo ngo ye vatera omuhongwa okusuvera Jehova. Otjotjihorera, mekondwa 1 membo ndi Ombeibela mai yenene okutuhonga tjike muna omaziriro komapuriro nga: Mukuru hapo u nakonatja na eṱe poo omundu ngu hi nombinḓu komutima? Omauzeu ngu tu muna ye ṱuna vi ku Mukuru? na indi Ove mape ya o rire epanga raJehova? Hapo tjike nembo ndi Matu riṱizire vi morusuvero rwa Mukuru? Embo ndo ri vatera omuhongwa okuzuva nawa omirari vyOmbeibela, nokutja me vi ṱakamisa vi mehupo re, nu ma yenene vi okutumbuka popezu na Jehova. Nandarire kutja we rihonga omambo ngo kuna ovahongwa ovengi ove mo hepa okurirongera nawa ku nomuhongwa auhe kokutja u tjiwe imbi mbi ma hepa.

¹⁰ Hapo mo tjiti vi indu omuhongwa wOmbeibela tji ma vanga okutjiwa epu rarwe ndi he ri  moviungurisiwa vyetu vyokuhonga. Ove mape ya omuningire kutja ma kamune eziriro ndo membo rarwe nu eṋe amu kayenda komurungu okurihonga Ombeibela momambo yevari nge sokuungurisiwa.

11. Oruṋe tji matu sokukumba pomahongero wOmbeibela, nu matu vatere vi omuhongwa okumuna ounanḓengu wongumbiro?

¹¹ Uta nongumbiro. Ma rire nawa aruhe okupaturura nokupata omahongero wOmbeibela nongumbiro, kombunda yokurihonga ovivike oviṱiṱi indu eye tja yakura okurihonga Ombeibela. Eṱe matu sokuvatera omuhongwa okumuna kutja Ombepo Ondjapuke ondji mai yenene okutuvatera okuzuva nawa Embo ra Mukuru. Ovazuvarise tjiva ve kahurura kutja ongwaye tji tu kumba pomerihongero wOmbeibela, a mave ungurisa etjangwa ra Jakobus 1:5, ndi tja: “Mokati keṋu tji pe na ngu ma hepa ounongo, nga kumbe ku Ndjambi.” Okuzambo omuzuvarise u pura omuhongwa kutja, “Matu sokutjita vi kutja tu mune ounongo okuza ku Mukuru?” Omuhongwa mape ya ai tavere kutja tu sokukumba ku Mukuru.

12. Mo yenene vi okuvatera omuhongwa woye okukumba noupaturuke ku Jehova, otja kEpsalme 139:2-4?

¹² Honga omuhongwa woye okukumba. Mu kahururira kutja Jehova u vanga okuzuva ongumbiro ye okuza komutima tjiri. Nu mu raera kutja mongumbiro ye ma yenene okuraera Jehova oumune we, noviṋa vyarwe mbye hi na okuyenena okuraera komundu wa rwe. Nu mu raera kutja Jehova u tjiwa rukuru ouripura wetu oukoto. (Lesa Epsalme 139:2-4.) Eṱe matu yenene okutunduuza ovahongwa vetu okuningira ombatero ku Mukuru kokutja ve yenene okurundurura omeripura nozongaro zawo ozombi. Otjotjihorera, omuhongwa wOmbeibela mape ya u zemburuka omikandi Ovakriste mu ve ha sokukara norupa, posi yokutja u tjiwa kutja okutjita nao otjiṋa otjivi. Mu tunduuza okukumba ku Jehova okumuraera ongaro me ri nokuriyarikaṋa kutja ma suvere imbi Mukuru mbya suvera.—Eps. 97:10.

13. (a) Ongwaye tji matu sokuṋanga ovahongwa vetu okuza komautiro okuya kozombongarero zombongo? (b) Omomuano uṋe mu matu tjiti kutja ovahongwa vetu ave he ri munu ourike tji ve ya pEtuwo rOmerikotameneno?

¹³ Ṋanga omuhongwa woye wOmbeibela okuza komautiro okuya kozombongarero zombongo. Imbi omuhongwa mbi ma zuu na mbi ma munu pozombongarero zombongo mavi mu hingi okukarera Jehova nokukurisa oupanga we kuna ye. Mu raisira okavidio nga pEtuwo rOmerikotameneno pe tjitwa tjike? nu mu ṋanga mu ye pamwe kEtuwo rOmerikotameneno. Mu va tera kutja ma vaze pozombongarero zombongo tji mo yenene. Ma rire nawa okuṋanga ovazuvarise pekepeke okuyenda puna ove komuhongwa ngo. Momuano mbo omuhongwa woye ma yenene okutjiwa ovandu ovengi mombongo nu iho matji tjiti kutja ehe rimunu ourike tje ya pozombongarero zombongo.

14. Otjikeṋa tji matji vatere omuhongwa okukurisa oupanga we kuna Jehova?

¹⁴ Ondando ye tu oyokuvatera omuhongwa wetu kutja me kurise oupanga we kuna Jehova. (Ef. 4:13) Indu omundu tja yakura okurihonga Ombeibela puna eṱe u kara nonḓero yokuvanga yokutjiwa kutja Ombeibela mai mu vatere vi. Posi yokutja orusuvero rwe ku Jehova tji ma ru kurireko eye mape ya a utu okuripura kutja ma vatere vi varwe nandarire imba mbe ri mombongo. (Mat. 22:37-39) Indu tje ri ohepero, okeyakeya okuraera omuhongwa woye ohunga nokuyandja otjimariva tjouharupu tji tji vatera otjiungura tjetu tjOuhona.

15. Matu vatere vi omuhongwa wetu okutjita oviṋa ovisemba indu tjeri mouzeu?

¹⁵ Honga omuhongwa woye kutja ma sokutjita vi indu tje ri mouzeu. Otjotjihorera,  ngatu tje omuhongwa woye ngu ri omuzuvarise ngu hiya papitisiwa, we kuraere kutja eye wa tjindwa navi i omukambure mombongo. Pendje nokutoora omunda mu kahururira kutja Ombeibela ma itja vi? Eye ma yenene okumuisira poo okukahungira ku nomukambure ngo momuano omuwa nondando ‘yokumukotora’ poo okuhangana na ye. (Sasaneka Mateus 18:15.) Vatera omuhongwa woye okurirongerisa nawa imbi mbi ma kahungira. Mu raisira omuano wokuungurisa o-JW Library^® app, okambo komakonḓononeno kOvahongonone vaJehova, no-jw.org^® okurihonga omiano pekepeke vyokuzengurura omauzeu ngo. Indu eye tje rihongo okuzengurura ouzeu kuna varwe ngunda e hiya papitisiwa, eye mape ya a kara noupanga ouwa kuna varwe mombongo kombunda yombapitisimo ye.

16. Ongwaye tje ri nawa okuṋanga ovazuvarise varwe okuyenda kuna ove komuhongwa woye?

¹⁶ Ṋanga varwe mombongo poo omutarere worukondwa indu tjee kuvarura ombongo yeṋu, okuyenda puna ove komuhongwa woye wOmbeibela. Ongwaye? Okuweza ku imbi mbya hungirwa rukuru ovazuvarise varwe mape ya ave vatere omuhongwa woye momiano ove mbi u hi nokuyenena. Otjotjihorera, ngatu tje omuhongwa woye wa kondja potuingi okuisa okupepa omakaya, posi yokutja ouzeu okutjita nao. Ṋanga Omuhongonene ngwa kondja ovikando ovingi okuisa okupepa nu ngwa toṋa motjiṋa ho. Eye mape ya a yandja ondunge ndji mai vatere omuhongwa woye. Indu tji u hi nokuyenena okuhonga omuhongwa woye ngunda ape nomukambure ngu nondjiviro, mo yenene okumuningira kutja ma honge nu ove o puratene uriri. Indu tji wa ṋanga ovazuvarise varwe okuyenda kuna ove komuhongwa woye wOmbeibela eye ma yenene okurihongera kovingi ku wo. Zemburuka kutja ondando yetu oyokuvatera omuhongwa okukurisa oupanga we kuna Jehova.

17-18. Hapo mo sokutara ku ye indu tji mo tye kutja ngo ise okurihonga ku nomundu poo indee?

¹⁷ Indu omuhongwa wOmbeibela tje hi nokutjita omarundurukiro mehupo re, ove mo hepa okuripura omuini epuriro ndi, ‘Hapo me sokuisa okurihonga kuna ye?’ Ngunda ohi ya isa okurihonga puna ye ove mosokuripura ohunga nozongondjero zarwe nḓe tjita. Ovandu tjiva ve toora orure okutjita omarundurukiro ngu ma ye heperwapo pu varwe. Ripura omuini omapuriro nga: ‘Hapo omuhongwa wandje u tjita omarundurukiro otja kongaro me ri?’ ‘Hapo eye wa uta “okuṱakamisa,” poo okuungurisa oviṋa mbye rihongo mehupo re?’ (Mat. 28:20) Mape ya ape kambura orure omuhongwa okurira omuhongewa, posi yokutja eye ma sokutjita omarundurukiro mehupo re kouṱiṱiṱiṱi.

¹⁸ Hapo matu sokutjita vi indu omundu ngu twe rihonga pamwe oure woruve orure tje ha raisa kutja oviṋa mbye rihonga ovinanḓengu ku ye? Ngatu tare kotjihorera hi: Omuhongwa woye wa mana okurihonga embo ndi Ombeibela mai yenene okutuhonga tjike, nu mape ya wa  uta okurihonga embo ndi Matu riṱizire vi morusuvero rwa Mukuru, posi yokutja eye keyarora okuya kozombongarero zombongo nandarire okukara pomazemburukiro wonḓiro ya Jesus. Nu potuingi u paha ombitirapo yokuhinokuvanga okurihonga. Indu omuhongwa woye tje ri nao ove mo sokumuraera ouatjiri. *

19. Hapo ove mape ya otjavi komuhongwa ngu ha vara omerihongero we wOmbeibela nu mo hepa okutjita ye?

¹⁹ Ove mape ya opura omuhongwa woye epuriro ndi, ‘Otjikwaye tji tjiri otjizeu kove okurira Omuhongonone wa Jehova?’ Omuhongwa mape ya a ziri nai, ‘Ami mba suvera okurihonga Ombeibela posi yokutja hi mee rire Omuhongonone wa Jehova.’ Ndovazu eye ma tja nao kombunda yokurihonga orure onawa okuisa okurihonga kuna ye. Posi yokutja omuhongwa woye mape ya e kuraere kutja ongwaye tje ha yenene okutjita omurundurukiro. Otjotjihorera, eye mape ya a tira okuzuvarisa okuza kondjuwo nondjuwo. Indu tji wa tjiwa oumune we mbo mo yenene okumuvatera.

20. Oviungura 13:48 ma ri tu vatere vi okutjiwa kutja matu sokukayenda komurungu okurihonga ku nomundu poo indee?

²⁰ Otjihihamise kutja ovahongwa tjiva ve ri tji muna Ovaisrael moruveze rwa Esekiel. Jehova wa raera Esekiel ohunga nawo kutja, “Ku tjo oove otjiṋa uriri, okutja omuyorokise ngu imbura omaimburiro worusuvero amo nyanda otjiharpe. Otjo tji puratena komambo woye aehe, nu katji kara nonḓuviro kembo nangarire rimwe roye.” (Esek. 33:32) Mape ya a rire ouzeu okuraera omundu kutja moisa okurihonga kuna ye. Posi yokutja, “Omayuva wouye mbwi ye ri pokuyanda.” (1 Kor. 7:29) Kunao onawa okuhinokurihonga ku nomundu ngu hi nokutjita omarundurukiro, eṱe matu sokupaha omundu ngu ma raisa kutja eye u ‘nomutima omuwa okukamuna omuinyo wa aruhe.’—Lesa Oviungura 13:48, okuza komambo wokehi. *

21. Etjangwa rombura ndji 2020 ooriṋe, nu ma ri tu vatere okutjita tjike?

²¹ Etjangwa rombura ndji 2020 mari tu vatere okuripurira komuano mu matu yenene okurira ovazuvarise ovawa. Oro wina ri hungira ohunga nomambo omananḓengu Jesus nga hungira pombongarero ndja ri moGalilea, indu tja tja: “Otji mwa sokuyenda, mu kaise po ovandu ovahongewa vandje  . . . , amamu ve papitisa.”—Mat. 28:19.