ORUPA RWOMAKONḒONONENO 2
“Ndjambi nge mu yarure koupe mourekoto womitima vyeṋu”
“Ndjambi nge mu yarure koupe mourekoto womitima vyeṋu. Indino otji mamu yenene okukara nondjiviro mombango yaNdjambi, okutja mu tjiwe kutja ihi tji tji ri otjiwa nEye me nonyuṋe, nu tji tja pwira Ye, otjikeṋa.”—ROM. 12:2.
EIMBURIRO 88 Ndji tjivisa ozondjira zoye
OMAPU KU MATU KATARA a
1-2. Matu sokukayenda komurungu okutjita vi kombunda yombapitisimo? Kahurura.
ONDJUWO yoye u kohorora ovikando vingapi? Ngahino wa kohorora nawa ngunda au hi ya tjindira mo. Posi ya hapo mape kara vi indu tji u hi nokuikohorora rukwao? Otja tji mo tjiwa, oyo mai hara oruuma nondova tjimanga. Ove mo hepa okukohorora ondjuwo yoye aruhe kokutja irire ongohoke.
2 Eṱe wina tu sokukayenda komurungu okuṱuna ouripura nongaro yetu. Otjiperi kutja ngunda atu hi ya papitisiwa, twa ungura oukukutu okutjita omarundurukiro nga ye heperwa po mehupo retu kokutja tu “rikohorore koviṋa avihe, mbi zunḓa orutu nomuinyo.” (2 Kor. 7:1) Posi ya nai matu hepa okukongorera eronga romuapostele Paulus ndi tja matu sokukayenda komurungu ‘okuyarurwa koupe.’ (Ef. 4:23) Ongwaye tji matu hepa okukayenda komurungu okurundurura ozongaro zetu? Mena rokutja ozongaro ozombi zouye mbwi maze yenene okutjita kutja tu rire ovahakohoke komurungu wa Jehova. Eṱe tu sokukayenda komurungu okukonḓonona omeripura, ongaro nozonḓero zetu indu tji matu vanga okurira ovakohoke komurungu wa Jehova.
KAYENDEYE KOMURUNGU ‘OKUYARURWA KOUPE MOUREKOTO WOMITIMA VYEṊU’
3. Okuyarurwa “koupe mourekoto womutima” ku heya tjike? (Ovaroma 12:2)
3 Matu sokutjita vi kutja tu yarurwe koupe mourekoto womitima vyetu pu mape hee okurundurura omuano mbu tu ripura? (Lesa Ovaroma 12:2.) Embo rOtjigrike nda torokwa kutja ‘okuyarurwa koupe mourekoto womutima’ mape ya ari torokwa kutja “okurundurura poo okuṱuna ouripura woye.” Iho katji hee kutja okutjita oviṋa tjiva oviwa kwa yenene. Nungwari twa sokurikonḓonona oveni mourekoto womitima vyetu, nokutjita omarundurukiro ngu maye heperwa po kutja tu kare nonḓuviro komirari vya Jehova otja pu matu yenene. Eṱe matu sokutjita nao aruhe nungwari katjikando tjimwe uriri.
Hapo ozondando zoye ohunga nomahongero noviungura mbi u toorora, vi raisa kutja u twa po Ouhona wa Mukuru poruveze orutenga? (Oparagrafa 4-5) c
4. Matu yenene okutjita vi kutja ouripura wetu au ha ṱunwa i youye ourunde mbwi?
4 Indu tji twa rire ohomonena otji matu yenene okuyorokisa Jehova aruhe mu avihe mbi matu tjiti. Posi yokutja, nai matu hepa okuungura oukukutu kutja tu yenene okuyenenisa ondando ndjo. MOvaroma 12:2, Paulus wa tja eṱe matu hepa okuyarurwa koupe mourekoto womitima vyetu kutja tu tjiwe imbi Mukuru mbi ma vanga kutja tu tjite. Pendje nokuyandjera ouye ourunde mbwi okutuhongorera po, eṱe rutenga matu sokurikonḓonona oveni okutjiwa kutja tu yandjera ouripura wa Mukuru okuṱuna kozondando nomikambo mbi matu toora poo indee.
5. Matu yenene vi okukonḓonona omuano mbu tu ripura ohunga neyuva ra Jehova ndi ri popezu? (Tara kotjiperendero.)
5 Tara kotjihorera. Jehova u vanga kutja tu ‘kare pokuundja indi Eyuva raNdjambi.’ (2 Petr. 3:12) Ripura omuini kutja, ‘Hapo omuano mbu mbi hupa u raisa kutja mbi tjiwa kutja omaandero wouye ourunde mbwi ye ri popezu? Hapo omikambo mbi mbi toora ohunga nomahongero wokombanda noviungura vi raisa kutja okukarera Jehova ootjiṋa otjinanḓengu mehupo randje? Hapo mbi nongamburiro kutja Jehova me ndji parura pu neṱunḓu randje poo mbi kara pokurikenda ohunga nomauini?’ Ripura nohange Jehova ndje kara na yo indu tji ma munu tji matu kondjo okuhupa otja kombango ye.—Mat. 6:25-27, 33; Fil. 4:12, 13.
6. Matu sokukayenda komurungu okutjita tjike?
6 Eṱe aruhe tu hepa okukonḓonona ouripura wetu nokutjita omarundurukiro ngamwa ngu maye heperwa po. Paulus wa tja nai kombongo yOvakorinte “riroreye oveni nu mu rikonḓonone oveni kutja mu nomuinyo mongamburiro!” (2 Kor. 13:5) Okukara “mongamburiro” ku kamburira mo ovingi pendje nokukara pozombongarero zombongo nokukara motjiungura tjokuzuvarisa povikando tjiva uriri. Okwo wina ku kamburira mo ouripura wetu, ozonḓero zetu nokutja ongwaye tji matu tjiti otjiṋa ho. Ku nao, tu hepa okuyarurwa koupe mourekoto womitima vyetu mokulesa Embo ra Mukuru, okurihonga okuripura otja eye tje ripura nokutjita avihe mbi mavi heperwa po okuyorokisa Jehova.—1 Kor. 2:14-16.
‘RIHWIKIKA OMUNDU OMUPE’
7. Otja kOvaefese 4:31, 32, ovikwaye vyarwe mbi matu hepa okutjita, nu ongwaye tji mape ya arire ouzeu okutjita nao?
7 Lesa Ovaefese 4:31, 32. Omarundurukiro warwe omananḓengu ngu matu sokutjita matu “sokurihwikika omundu omupe.” (Ef. 4:24) Matu sokuungura oukukutu okutjita nao. Nu wina matu sokuungura oukukutu okuisa ozongaro ozombi tjimuna omapindi nomazenge. Ongwaye tje ri ouzeu okutjita nao? Mena rokutja mape ya arire ouzeu okuisa ozongaro tjiva ozombi. Otjotjihorera, Ombeibela i tja ovandu tjiva ve “pindika tjimanga” nu ve “ṱomazenge.” (Omiano 29:22) Omundu ngu nozongaro ozombi otja inḓo ma sokukondja okurunduruka, nandarire kombunda yombapitisimo otja tji matu kamuna motjihorera tji matji kongorere ko.
8-9. Otjihorera tja Stephen matji raisa vi kutja tu hepa okukayenda komurungu okuhukura omundu omukuru?
8 Omurumendu omukambure wena Stephen wa ri nouzeu wokutjaera omazenge we. Eye wa tja: “Nandarire kombunda yombapitisimo, ami ee hepa okuungura oukukutu okuritjaera komazenge. Otjotjihorera, otjikando tjimwe ngunda ambi ri motjiungura tjokuzuvarisa, ami mba rambera omurumendu ngwa vaka oradio yandje mohauto. Otja tjee vaza popezu na ye, eye wa wisa pehi oradio na tupuka. Indu tji mba raera ovakwetu ohunga nomuano mu mba kotora oradio yandje, omunene wombongo we ndji pura kutja, ‘Stephen, hapo ove otjo tjita vi andakuzu wa kambura omurumendu ngo?’ Epuriro ndo ra tjita kutja mbi ripure nu re ndji vatera kutja mbi kayende komurungu okuungurira komazenge wandje.” b
9 Otjihorera tja Stephen matji tu raisire kutja matu yenene okuraisa ongaro ombi nokuhinokuundjira ko, nandarire kutja tu muna kutja twa ungurira ko. Iho tji tja tjitwa kove, o rihahiza nu o munu kutja oove omundu omuvi. Nandarire omuapostele Paulus wa tja: “Ami mbi vanga okutjita ouwa, nungwari ihi porwatjo tji mbi tjita owo mbwi ouvi.” (Rom. 7:21-23) Ovakriste avehe kahomonena nu ve kondja nozongaro ozombi nḓe kotoka tjimuna oruuma poo ondova tji i riwongera mondjuwo. Matu sokukayenda komurungu okuungura oukukutu kutja tu rire ovakohoke. Matu yenene vi okutjita nao?
10. Matu yenene vi okurwisa ozongaro ozombi? (1 Johanes 5:14, 15)
10 Raera Jehova mongumbiro ohunga nongaro ndji ri onḓeu kove okuyesa, au nongamburiro kutja eye me ku zuvire nu me ku vatere. (Lesa 1 Johanes 5:14, 15.) Jehova kamaa isa po ongaro ndjo momuano omuhimise, posi ya eye ma yenene okukupa omasa kutja o ha raisa otjikaṋena ho. (1 Petr. 5:10) Kondja okuungurira kozongumbiro zoye mokuhinokutjita oviṋa mbi mavi tjiti kutja irire ouzeu okuhukura omundu omukuru. Otjotjihorera, ṱakamisa kutja o ha tarere ozomuvi, ozoprograma zotiivii poo okulesa omahungi ngu maye tjiti kutja pe munike aayo onawa okukara nozongaro otja inḓo. Nu wina o yandjere ouripura woye okuripurira koviṋa ovivi.—Fil. 4:8; Kol. 3:2.
11. Omikambo viṋe mbi matu yenene okutoora kokutja tu kayende komurungu okurihwikika omundu omupe?
11 Nandarire kutja wa hukura omundu omukuru, ounanḓengu okuungurira ku ingwi omupe. Mo yenene vi okutjita nao? Indu tji mo rihongo ohunga novikaṋena vya Jehova, toora omukambo okuhorera ku ye. (Ef. 5:1, 2) Otjotjihorera, indu tji mo lese ehungi rOmbeibela ndi mari ṋunisa omuano Jehova me isira, ripura omuini kutja, ‘Hapo ami mbi isira varwe?’ Indu tji mo lese ohunga notjari Jehova tje raisa ku imba mbe nouhepe, ripura omuini kutja, ‘Hapo ami mbi ripurira kovakambure ovakwetu mbe nouhepe nu mbi toorera ko omikambo?’ Kayende komurungu okuyarurwa koupe mourekoto womutima woye mokurihwikika omundu omupe nu kara nomuretima indu tji mo tjiti nao.
12. Stephen wa muna vi omasa wOmbeibela wokurundurura ovandu?
12 Stephen ngwa tamunwa rukuru morupa ndwi wa muna kutja eye aa yenene okurihwikika omundu omupe kouṱiṱiṱiṱi. Eye wa tja: “Okuza kombapitisimo yandje, ami mba kara mozongaro ozengi nḓaaze tjiti kutja mbi pindike. Mbe rihonga okuza po povandu mbe kondja okundjipindikisa, poo mbi kondja okurundurura ongaro ndjo momiano vyarwe. Ovandu ovengi nandarire omukazendu wandje, ve ndji tanga komuano mbu mba tjinda ozongaro nḓo. Ami nandarire hi kambura kutja mba yenena okutjita omarundurukiro ngo. Nu hi ritanga omuini komarundurukiro ngu mba tjita, nungwari mbi nongamburiro kutja Ombeibela i nomasa wokurundurura omundu.”
KAYENDE KOMURUNGU OKURWISA OZONḒUMA OZOMBI
13. Ovikwaye mbi mavi tu vatere okurwisa ozonḓuma ozombi? (Ovagalate 5:16)
13 Lesa Ovagalate 5:16. Jehova u tu pa ombepo ye ondjapuke okutuvatera okutjita imbi mbi ri ovisemba. Indu tji matu konḓonona Embo ra Mukuru tu yandjera ombepo ye okutuvatera. Eṱe wina tu muna ombepo ondjapuke indu tji twa kara pozombongarero zombongo. Pozombongarero nḓo, tu yenena okukara pu novakambure ovakwetu mbe kondja nomasa okutjita imbi mbi ri ovisemba nu iho tji tu yanḓiparisa. (Hebr. 10:24, 25; 13:7) Indu tji matu kumbu ku Jehova nokuriheka kutja me tu vatere noungundipare kaaṋi, eye me tu pe ombepo ye ondjapuke kutja i tu pe omasa okukayenda komurungu okurwa. Oviṋa mbyo mape ya avi ha tjiti kutja ozonḓuma ze zapo, posi ya mavi tu vatere kutja atu ha kovisa ozonḓuma nḓo. Otja kOvagalate 5:16, imba mbe ryanga mombepo kave ‘kovisa ozonḓuma zongaro youndu.’
14. Ongwaye tje ri ounahepero okukayenda komurungu okukara nouripura ouwa?
14 Indu tji twa utu okutjita oviṋa mbi mavi tu vatere okukara noupanga ouwa ku na Jehova, ounahepero okukayenda komurungu okutjita nao nokukara nouripura ouwa. Omena raye? Mena rokutja umwe wovanavita na eṱe u kayenda komurungu okuturwisa. Omunavita ngo, omarorero wokutjita imbi mbi he ri ovisemba. Nandarire kombunda yombapitisimo mape ya atu nanukirwa i yoviṋa mbi tu ha sere okutjita, mbi mavi kamburire mo okundopola, okunwa omeva wamururu okukapitisa etota poo okutarera oviperendero vyakamuzu. (Ef. 5:3, 4) Omurumendu omukambure omutanda wa tja: “Otjiṋa tjimwe otjizeu tji mbi kondja na tjo, okunanukirwa i yovarumendu ovakwetu. Ami ee ripura kutja mba koza ozonḓuma nḓo, posi ya ngamba opu zeri.” Ovikwaye mbi mavi yenene okukuvatera indu ozonḓuma ozombi tji ze nomasa?
Indu tji mo kondjo nozonḓuma ozombi, o rihahiza. Varwe va kondja nozonḓuma otjingezo nu va yenena okutuurunga. (Oparagrafa 15-16)
15. Ongwaye tje ri otjiṋa otjitunduuze okutjiwa kutja ozonḓuma ozombi omarorero “nge ya kovandu” avehe? (Tara kotjiperendero.)
15 Indu tji u rwa nozonḓuma ozonḓeu tjinene, tjiwa kutja kaove erike. Ombeibela i tja: “Omarorero ngamwa aehe ngu mwa muna owo nga hapo nge ya kovandu.” (1 Kor. 10:13a) Omatorokero warwe ya tja: “Kape nomarorero ngu wa muna nge ha tjiukwa i yovandu.” Omambo ngo ya tjangerwe kovakazendu novarumendu Ovakriste mba turire mOkorinte. Tjiva rukuru va ri ovakatuke votukupo nokunanukirwa i yovarumendu poo ovakazendu ovakwao, nokuṱa i yomeva wamururu. (1 Kor. 6:9-11) Hapo mo ripura kutja owo tji va za nokupapitisiwa, kave karere nozonḓuma ozombi? Kako katjiperi. Owo avehe va ri Ovakriste ovatwirisiwa, posi ya kava ri ohomonena. Otjingaperi kutja owo povikando tjiva aave kondjo nozonḓuma ozombi. Iho matji sokututunduuza. Omena raye? Mena rokutja matji raisa kutja pe nomundu ngwa tuurunga ozonḓuma ozombi ove nḓu u rwa na zo. Ku nao, “rireye ovazikame mongamburiro. . . . Amu zembi kutja mouye auhe ovakambure ovakweṋu ve tjinda omahihamisiro tjingewo.”—1 Petr. 5:9.
16. Oumba uṋe mbu matu sokunakaura, nu omena raye?
16 Nakaura oumba wokuripura kutja kape nomundu ngu ma yenene okuzuva ouzeu mbu u na wo. Okuripura nao maku tjiti kutja u mune kutja ko nokuyenena okuvaterwa mongaro mu u ri, nokutja ko nokuyenena okutuurunga ozonḓuma ozombi nḓo. Ombeibela i hungira omuano warwe. Oyo i tja: “Ndjambi Eye omuṱakame nEye ke nakumutarera amamu rorwa okukapita omasa weṋu. Nomarorero tji ye ya, Eye me mu pe omasa, kokutja mu yenene okupirukira omarorero nga.” (1 Kor. 10:13b) Ku nao, nandarire kutja ozonḓuma ozombi nḓu tu na zo ze nomasa, matu yenene okurira ovaṱakame ku Jehova. Nombatero ya Jehova matu yenene okuritjaera okutjita oviṋa ovivi.
17. Nandarire kutja eṱe katu nokuyenena okutjita kutja atu ha kara nozonḓuma ozombi, matu yenene okutjita tjike?
17 Mena rokutja kaweṱe ohomonena, eṱe kamaatu yenene okutjita kutja atu ha kara nozonḓuma ozombi. Posi yokutja, indu tji tu nozonḓuma ozombi matu yenene okuzenakaura tjimanga tjimuna Josef tja tjita indu tja tupuka hakahana okuzapo pomukazendu wa Potifar. (Gen. 39:12) Ove ko nokuhepa okukovisa ozonḓuma ozombi.
KAYENDE KOMURUNGU OKUUNGURA OUKUKUTU
18-19. Omapuriro yeṋe ngu matu yenene okuripura oveni otja tji matu kondjo okuyarura ourekoto womitima vyetu koupe?
18 Okuyarurwa koupe mourekoto womitima vyetu ku heya kutja tu sokukondja kutja omeripura wetu novitjitwa vyetu vi yorokise Jehova. Ku nao, eṱe matu sokurikonḓonona oveni nokuripura kutja, ‘Hapo omuano mbu mbi ritjinda u raisa kutja mbi tjiwa kutja omaandero ye ri popezu? Ami mbi kayenda komurungu okurihwikika omundu omupe? Ami mbi yandjera ombepo ya Jehova okundjihongorera po mehupo randje, kokutja mbi yenene okunakaura ozonḓuma zongaro youndu?’
19 Otja tji mo rikonḓonona omuini, kara nohange mu imbi mbi wa yenena okutjita, nungwari o yandja ombango tjinene koungundipare woye. Indu tji mo munu kutja mo hepa okutjita omarundurukiro, o rihahiza. Nungwari kongorera ondunge ndji ri mOvafilipi 3:16, ndji mai tja: “Ngatu ṱakamise uri imbwi omuhunga mbu twa toora nga mba.” Indu tji wa tjiti nao, kara nongamburiro kutja Jehova ma sere ondaya kozongondjero zoye nḓu u tjita zokuyarurwa koupe mourekoto womutima woye.
EIMBURIRO 36 Matu tjevere omitima vyetu
a Omuapostele Paulus wa kahurura kutja ounahepero kovakambure ovakwao kutja ave ha yandjere ouye ourunde mbwi okuzunḓa omeripura novitjitwa vyawo. Indji ondunge ombwa ku eṱe ndino wina. Eṱe tu sokutjita kutja ozongaro ozombi zouye mbwi aze he tu ṱunu oparukaze. Kutja tu yenene okutjita nao, matu sokukayenda komurungu okurundurura ouripura wetu indu tji twa munu kutja kau nokuhitasana ku nombango ya Mukuru. Morupa ndwi, matu katara kutja matu yenene vi okutjita nao.
b Tara korupa ndwi “Ehupo randje ra ri evi” mokambo kOruhungu, 1 ku Juli, 2015.
c OMAKAHURURIRO WOTJIPERENDERO: Omurumendu omukambure omutanda me ripura ohunga nokutja ma i komahongero wokombanda poo ma rire omukandjira woruveze aruhe.
