1. Ovikwaye mbya runduruka momahi tjiva mozombura nḓa?

OURE wozombura ozengi, ovandu ovengi mouye va ri orupa rozongamburiro kaaṋi. Posiya mozombura nḓa pa tjitwa omarundurukiro yapeke. Ovandu ovengi kave ri orupa rozongamburiro kaaṋi rukwao. Mouatjiri, ovandu ovengi momahi tjiva, ve tja kave ve ri orupa rozongamburiro kaaṋi. *—Mat. 24:12.

2. Ongwaye ovandu ovengi tji ve hi nongamburiro kaaṋi?

² Ongwaye ovandu ovengi tji ve hi nongamburiro kaaṋi? Ovandu tjiva mape ya ve yandja ombango okuyorokera oviṋa vyouye poo komauzeu wawo. (Luk. 8:14) Nu tjiva kave kambura mu Mukuru. Varwe ve kambura mu Mukuru posiya ve ripura kutja okukara ongamburiro kaaṋi oviṋa mbya vi tjitwa rukuru, kamaa ku ve vatere, nu ka ku hitasana nounongo wovimemwa nomaumune wovandu. Owo mape ya ave zuu momapanga, ozomiṱiri poo oviṋa mbi handjaura ombuze, okutunduuza omahongero wokutja oviṋa kavi memenwe, posiya owo kave zuu omapu omasemba wokukambura mu Mukuru. Varwe ve yaukisiwa i yovanane vozongamburiro mba suvera ovimariva nomaunane. Motuveze tjiva ozohoromende kaze yandjere ovitjitwa tjiva vyozongamburiro.

3. Ondando yorupa ndwi oya tjike?

³ Jesus wetu rakiza kutja tu ‘yende koviwaṋa avihe ngamwa akuhe tu kaise po ovandu ovahongewa ve.’ (Mat. 28:19) Hapo matu vatere vi ovandu mbe hi nongamburiro kaaṋi poo mbe ha kambura mu Mukuru, okusuvera Mukuru nokurira ovahongewa va Kristus? Matu sokuzembura kutja ongaro omundu ndji ma raisa  kombuze yetu, mape ya ai tjitwa i yopoṋa pe kurira. Otjotjihorera, ovandu mba za ko Asia mape ya ave puratene kweṱe indu tji matu ve zuvarisire pendje na imba mba za ko Europe. Ongwaye tji matu tja nao? Ovandu ovengi moEurope, ve tjiwa oviṋa tjiva mOmbeibela nu va zuva kutja Mukuru ongwa ungura oviṋa avihe. Posi yokutja ovandu ovengi moAsia, ve nondjiviro onḓiṱi uriri poo kave tjiwa otjiṋa ohunga nOmbeibela nu mape ya kave kambura kutja ku nOmuute. Ondando yorupa ndwi oyokuvatera ovandu avehe mbu tu hakaena motjiungura tjokuzuvaisa, nandarire kutja va za pi poo ve kambura mu ye.

4. Ongwaye tji matu sokukara noumune ouwa?

⁴ Kara noumune ouwa. Ombura aihe, pe kara novandu mbe hi nongamburiro kaaṋi mbe rira Ovahongonone va Jehova. Ovandu ovengi aave ritjindi momuano omuwa nu aave yaukisiwa i yovizeze vyozongamburiro. Varwe va ri nomeritjindiro omavi nu ovengi va ri nozongaro ozombi nḓa ve sokunakaura. Nombatero ya Jehova, matu yenene okumuna “imba mba toororerwa omuinyo waaruhe.”—Oviung. 13:48; 1 Tim. 2:3, 4.

5. Potuingi ovikwaye mbi tjita kutja ovandu ve yakure ombuze yetu nawa?

⁵ Raisa ombepo ombwa, nu hungira nongengezero. Potuingi, ovandu ovengi ve yakura ombuze yetu mena romuano mbu twe i yandja, nu ka tjinene koviṋa mbi twa hungire. Owo ve tjaterwa indu tji matu raisa ombepo ombwa, nokuhungira nongengezero nokuraisa kutja tu nonḓero mu wo tjiri. Eṱe katu ve ṋiṋikiza kutja ve puratene kweṱe. Nungwari, eṱe tu kondja okuzuva nawa oumune wawo ohunga nozongamburiro. Otjotjihorera, ovandu tjiva kave vanga okuhungira ohunga nozongamburiro ku nomundu ngu ve hi nokutjiwa. Varwe ve muna kutja ovikaro ovivi okupura omundu kutja u noumune uṋe ohunga na Mukuru. Nu varwe ve ṱohoṋi okumunikwa amave lese Ombeibela, nu tjinenenene pu nOvahongonone va Jehova. Kombanda yaavihe mbi, eṱe tu kondja okuzuva nawa oumune wawo.—2 Tim. 2:24.

6. Omuapostele Paulus aa rundurura vi ongaro ye, nu eṱe matu yenene vi okuhorera kuye?

⁶ Hapo eṱe matu yenene okutjita vi indu tji twa munu kutja omundu ke nokuvanga kutja tu ungurisa omambo nga “Ombeibela,” “oviutwa,” “Mukuru,” poo “ongamburiro”? Eṱe matu yenene okuhorera komuapostele Paulus nu atu yenene okurundurura omuano mbu matu hungire kuna wo. Paulus tja hungire ku nOvajuda, eye aa ungurisa Omatjangwa. Nungwari, eye tja hungire ku novanane votjihuro Ovagrike, eye kena pa raisa kutja ma ungurisa Omatjangwa. (Oviung. 17:2, 3, 22-31) Matu horere vi kotjihorera tja Paulus? Tji wa hakaene ku nomundu ngu ha yakura Ombeibela, ma rire nawa tji u hi nokuraisa omatjangwa okuza kOmbeibela indu tji mo hungire kuna ye. Indu tji wa munu kutja omundu ma ṱohoṋi okulesa Ombeibela puna ove, kondja okuungurisa omiano vyarwe tji mo mu raisire omatjangwa, tjimuna okuungurisa ongoze.

7. Matu sokutjita tjike kutja tu horere kotjihorera tja Paulus tji tji ri 1 Ovakorinte 9:20-23?

⁷ Kondja okuzuva nawa nu puratena. Eṱe matu sokukondja okuzuva nawa kutja ongwaye ovandu mbu matu hakaene tji ve noumune mbo. (Omiano 20:5) Tara rukwao kotjihorera tja Paulus. Eye we kurira mokati kOvajuda. Eye wa rundurura omuano maa zuvarisa kovandu mbe ha ri Ovajuda, mena rokutja aa tjiwa kutja owo aave tjiwa oviṋa oviṱiṱi uriri poo kaave tjiwa otjiṋa ohunga na Jehova nOmatjangwa. Eṱe mape ya atu tjiti omakonḓononeno poo atu pura ovandu mombongo yetu mbu mave tjiwa nawa ovandu momaturiro wetu kutja tu yenene okuzuva nawa ongaro noumune wawo.—Lesa 1 Ovakorinte 9:20-23.

8. Omomuano uṋe umwe mu matu sokuuta ehungi ohunga nOmbeibela?

 ⁸ Ondando yetu oyokupaha imba mbe “vanga.” (Mat. 10:11) Kutja tu toṋe, matu sokuningira ovandu okuhungira oumune wawo nu okuzambo atu puratene nombango. Omurumendu omukambure moEngland u pura ovandu oumune wawo ohunga nokukara norukupo oruṋingandu, okukurisa ovanatje, nokutjinda ouhasemba. Tja zu nokupuratena koumune wawo, eye u tja: “Hapo mo munu kovi ohunga noumune mbwa tjangwa ozombura ape 2 000 nḓa kapita?” Okuzambo, nokuhinokuungurisa embo ndi “Ombeibela,” eye u ve raisira omatjangwa nga toorora mongoze ye.

9. Hapo eṱe matu vatere vi ovandu mbe ha vanga okuhungira ohunga na Mukuru?

⁹ Eṱe matu yenene okuṱuna komitima vyovandu mbe ha vanga okuhungira ohunga na Mukuru mokuhungira ohunga noviṋa mbi ve ṱuna. Otjotjihorera, ovengi ve tjaterwa i yoviutwa. Ove mo yenene okutja, “ngahino motjiwa kutja oviṋa vyakandino ozonongo zovimemwa mbi va ungura va horera koviṋa mbya ri ko rukuru moviutwa. Otjotjihorera, ovandu mbe ungura ozombako ve konḓonona omatwi, nu mbe ungura otjiperende ve konḓonona omeho. Hapo ovikwaye mbi ya mouripura woye tji moripura ouhunga noviutwa? Ove u muna kutja omasa omahimise, omundu, poo otjiṋa tjarwe?” Tjiwa zu nokupuratena nawa, mo yenene okutja, “ozoingineya tji maze rihongo ohunga nomatwi nomeho, eṱe mape ya atu ripura kutja owo ve horera ku uṋe. Mba tjaterwa i yomutjange omukuru womiimbo ngwa tja: ‘Ngwa uta omatwi wetu, ke nakuzuva are? NEye ngwa uta omeho wetu, ke nakumuna are? . . . Ke nakuhonga ovandu avehe ondjiviro are?’ Ozonongo zovimemwa ze kambura momambo ngo nu ve kambura moviutwa wina.” (Eps. 94:9, 10) Okuzambo matu yenene okuraisa okavidio okuza ko-jw.org^® kehi yorupa ndwi “Interviews and Experiences” mongongorasaneno ndji “Viewpoints on the Origin of Life.” (Twende korupa rOtjiingirisa ndwi PUBLICATIONS > VIDEOS.) Poo mo yenene okuyandja omambo wetu nga Was Life Created? poo The Origin of Life—Five Questions Worth Asking.

10. Hapo eṱe matu utu vi ehungi ku nomundu ngu ha vanga okuhungira ohunga na Mukuru?

¹⁰ Ovandu ovengi ve vanga oruyaveze oruwa. Nungwari, ovengi ve tira kutja ouye mau yandekwa nu ka mu nokuturwa. Omutarere ngu varura ozombongo moNorway wa tja ovandu mbe ha vanga okuhungira ohunga na Mukuru potuingi ve vanga okuhungira ohunga noviṋa mbi tjitwa mouye. Tja zu nokukorisa ovandu, eye u tja:  “Hapo mo munu kovi ohunga noruyaveze oruwa? Hapo omaundjiro wetu woruyaveze oruwa ye za kovanane vopolotika, ovanongonone poo omundu warwe?” Tja zu nokupuratena nawa, eye u lesa poo a hungire etjangwa ndi ma ri hungire ohunga noruyaveze oruwa. Tjiva ve nanukirwa i yomakwizikiro wOmbeibela wokutja ehi mari karerere nga aruhe nu ovandu ovawa ombu mave tura mu ro nga aruhe.—Eps. 37:29; Omuzuv. 1:4.

11. Ongwaye tji matu sokuuta ehungi momiano pekepeke, nu matu horere vi kotjihorera tja Paulus tji tji ri mOvaroma 1:14-16?

¹¹ Eṱe matu sokuuta ehungi momiano pekepeke kuna imba mbu matu hakaene. Ongwaye tji matu tja nao? Mena rokutja ovandu va panguka. Otjiṋa tji matji nana ombango yomundu umwe katji matji nana ombango yomundu warwe. Tjiva ve vanga okuhungira ohunga na Mukuru poo nOmbeibela nu varwe ve vanga okuhungira ohunga noviṋa vyarwe rutenga. Mongaro ngamwa aihe, eṱe matu sokuhungira ku novandu avehe. (Lesa Ovaroma 1:14-16.) Matu sokuzemburuka kutja Jehova ongu tjita kutja ouatjiri u kure momitima vya imba mba suvera ousemba.—1 Kor. 3:6, 7.

12. Eṱe matu zuvarisa vi kovandu mba tura momahi wa Asia, mbe ha kambura kutja Omuute okeri poo keko?

¹² Ovazuvarise ovengi mouye ve hakaena ku novandu mba za komahi wa Asia, mu muna tjiva mba za komahi oviungura tjiva vyozongamburiro mu vi ha yandjerwa. Momahi wa Asia, owo tjiri kave ripura kutja omuute okeri poo keko. Ovengi ve vanga okutjiwa nu ve yakura omerihongero wOmbeibela, nu varwe mape ya ve keyakeya okuyakura omerihongero wOmbeibela. Hapo eṱe matu yenene vi okuvevatera? Ovazuvarise tjiva va muna ouwa mokuuta ehungi ohunga noviṋa vyakauriri, okuraisa onḓero mu wo, nu ve hungira kutja okukongorera omirari vyOmbeibela kwa rundurura vi ehupo rawo.

13. Otjikwaye tji matji nana omabango yovandu kOmbeibela? (Tara kotjiperendero tjokombanda yokambo nga.)

¹³ Ovandu ovengi ve nanukirwa i yomirari omisemba mbi ri mOmbeibela. (Omuzuv. 7:12) Omukazendu omukambure moNew York, ngu ryangera ovandu mbe hungira Otjimandarin wa tja: “Ami mbi kondja okuraisa onḓero nokupuratena ku wo. Ami tji mba tjiwa kutja owo ovandu ovape mba zire kehi rarwe, mbi ve pura kutja, ‘uri vi nai tjiwa zire nokutjinda? Ove wa munu oviungura? Ovandu momaturiro wetu mave ku tjindi nawa?’” Povikando tjiva omapuriro nga ye mu vatera okuhungira ohunga nOmbeibela. Tje ri ohepero, omukazendu omukambure ngwi u pura kutja, “otjikwaye otjinanḓengu tjinene tji matu sokutjita okukara noupanga ouwa ku novandu? Me yenene okukuraisira erakiza ndi ri mOmbeibela? Ma ri tja: ‘Okuuta ozombata ku ri otja okuhaṋa erindi; tjaera ozombata ngunda aze hiya ryama komurungu.’ Ove momunu kutja erakiza ndi mari tu vatere kutja tu kare noupanga ouwa kuna varwe?” (Omiano 17:14) Omahungi otja ingo maye tu vatere okutjiwa kutja ovandu veṋe mbu mave vanga okurihonga ovingi.

14. Omurumendu omukambure ngwa tura mehi ndi ri kOutjiro u vatera vi ovandu mbe tja kave kambura mu Mukuru?

¹⁴ Matu yenene okuhungira tjike ku novandu mbe tja kave kambura mu Mukuru? Omurumendu omukambure ngwa zuvarisa oure wozombura ozengi kovandu mbe tja kave kambura mu Mukuru, komahi wokokure nga ri kOutjiro wa tja: “Indu omundu tja tja, ‘hi kambura mu Mukuru,’ eye u heya kutja ka kambura moomukuru ovandu ovengi momaturiro ngo ku ve rikotamenena ko. Omundu tja tja nao, aruhe mbi mu raera kutja oomukuru ovengi mbo va ungurwa i yovandu nu kava katjiri. Potuingi mbi lesa Jeremia 16:20: ‘Omundu ma sora okuriungurira oomukuru ve  omuini are? Ayee indee! Nu tje ve ungura, indino owo kamaave rire oomukuru vatjiri.’ Okuzambo epura epuriro ndi: ‘Hapo eṱe matu yenene vi okuhaṋa pokati ka mukuru uatjiri na ingwi ngwa ungurwa i yovandu?’ Ami mbi puratena nongengezero, nu okuzambo e lese Jesaja 41:23 ndi mari tja: ‘Tu raereye oviṋa vyoruveze ndu maru ya, indino otji matu tjiwa kutja oweṋe oomukuru.’ Nu okuzambo mbi raisa oviṋa Jehova mbya hunganeka ohunga noruyaveze.”

15. Matu rihongere ko tjike kotjihorera tjomurumendu omukambure ngwa tura kOutjiro wa Asia?

¹⁵ Omurumendu omukambure kOutjiro wa Asia u ungurisa oviṋa mbi mavi kongorere kehi mba, indu tji ma vanga okuyaruka rukwao kovandu mbu va hakaene. Eye u tja: “Ami mbi ve raisira ovihorera vyounongo mbi ri mOmbeibela, omaprofetero nga yenenisiwa mOmbeibela, nomazikameneno woviutwa mevaverwa. Nu okuzambo mbi ve raisira kutja oviṋa avihe mbi vi raisa kutja ku nomuute omunazondunge. Indu omundu tja yakura kutja Mukuru okeri, ami mbi mu raisira kutja Ombeibela i tja tjike ohunga na Jehova.”

16. Otja kOvaheberi 11:6, ongwaye ovahongewa vyOmbeibela tji ve hepa okukara nongamburiro mu Mukuru na mOmbeibela, nu matu ve vatere vi okukara nongamburiro?

¹⁶ Indu tji matu rihongo Ombeibela ku novandu mbe hi nongamburiro kaaṋi poo mbe ha kambura mu Mukuru, eṱe matu sokukayenda komurungu okukurisa ongamburiro yawo yokutja Mukuru okeri. (Lesa Ovaheberi 11:6.) Nu eṱe matu sokuvevatera kutja ve kare nongamburiro mOmbeibela. Ihi matji he kutja eṱe matu sokuyarukira po oviṋa tjiva povikando ovingi. Otjikando atjihe tji matu rihongo kuna wo, eṱe matu hepa okuraisa kutja Ombeibela Embo ra Mukuru. Imbi mape ya avi kamburire mo ehungi esupi ohunga nomaprofetero nga yenenisiwa mOmbeibela, ounongo wovimemwa nouatjiri ohunga nomakuruhungi, poo nokutja Ombeibela i tu vatera vi mehupo retu.

17. Orusuvero ndu matu raisa kovandu ru ve ṱuna vi?

¹⁷ Eṱe tu vatera ovandu okurira ovahongewa va Kristus mokuveraisira orusuvero nandarire kutja ve kambura mu Mukuru poo kave kambura mu Mukuru. (1 Kor. 13:1) Otja tji matu ve hongo, ondando yetu oyokuveraisira kutja Mukuru we ve suvera nu eye u vanga kutja tu mu suvere. Ombura aihe ovandu ovengi mbe ha ri nonḓero yokuvanga okutjiwa Mukuru ve papitisiwa mena rokutja ve rihonga okusuvera Mukuru. Kunao kara noumune ouwa, nu raisa orusuvero nonḓero kovandu avehe, nokupuratena ku wo. Nu kondja okuvezuva nawa. Notjihorera tjoye, ve honga kutja ve rire ovahongewa va Kristus.