“TJIKE! Ma mu tja vi?”

Ove mutu u korisa ovandu nomambo tjimuna ngo. Nu pe ya oyandja eke komundu poo omupukata otjomuano wokuraisa ombinika yoye yorusuvero. Ozongaro zokukorisa za panguka otja kotuveze nozombazu, posiya okukorisa otjiṋa tjimwe uriri akuhe ku ku novandu. Nu mouatjiri, okuhinokukorisa ovandu poo okuhinokukamburira o moro ku varwa otjokuhinondengero poo ongaro ombi.

Posi yokutja ka vandu avehe mba i ririra okukorisa ovandu. Tjiva ve nohoṋi okukorisa ovandu, nu varwe ve muna kutja ovandu vorive ka ve nonḓengu yokukorisiwa i wo. Varwe ve muna kutja ouzeu okukorisa omundu weraka rarwe poo omuhoko warwe. Nungwari, tjiri okukorisa omundu nomambo nandarire omasupi uriri ku eta ouwa tjinene.

Ripura omuini nai: ‘Hapo okukorisa ovandu ku eta tjike? Nu Embo ra Mukuru ma ri ndji hongo ye ohunga nokukorisa ovandu?’

Indu Petrus tja yakura Omuheidena omutenga, Cornelius, kombongo yOvakriste wa tja: “Ndjambi u vara ovandu avehe pu pe ṱeki pamwe.” (Oviung 10:34) Kombunda, Petrus wa tjanga kutja Mukuru u “vanga kutja avehe ve ritanaure komauvi wawo.” (2 Petr. 3:9) Matu munu kutja omambo ngo maye hitasana nomundu ngu me rihongo ouatjiri. Nungwari Petrus wina wa raera Ovakriste a tja: “Yozikeye ovandu avehe, nu mu suvere ovanangamburiro ovakweṋu!” (1 Petr. 2:17) Hapo nao ko na ku muna kutja o nawa okusuvera okukorisa ovandu kutja ka muhoko woye poo ovahungire veraka rarwe? Nu ma rire omuano umwe wokuraisa ondjozikiro norusuvero ku wo.

Omuapostele Paulus wa raera ku imba mba ri mombongo nu atja: “Otji mwa sokuyakurasana otja Kristus punga e mu yakura kohiviro yaNdjambi.” (Rom. 15:7) Paulus tjinene wa yandja ombango kovakambure mbaa ve mu ‘tarareke omutima tjinene.’ Okutja tjiri otja tji twa hungamwa i omapirukiro wa Satan momayuva nga, otjovakambure tu hepa okuyandjasana omasa tjinene—Kol. 4:11, ftn.; Omavan. 12:12, 17.

Omatjangwa ye raisa kutja okukorisa ku tjita ovingi kombanda yomundu okumuna kutja wa yakurwa uriri.

Oruveze tji rwa yenena kOmuna wa Mukuru okurundururirwa mezumo ra Maria, Jehova wa hinda omuengeli okuhungira ku na ye. “Minikwa, ove ngu wa ingonekwa notjari.” Omuengeli wa tja nao, “Muhona u ri pu na ove.” Maria wa “urumisiwa tjinene,” mokuhinokutjiwa kutja ongwaye omuengeli tji ma hungire ku na ye. Mokumuna mbi, omuengeli wa tja: “O tira, Maria, ove wa munu ondjingonekero komurungu wa Mukuru.” Eye we mu raera kutja ya ri ombango ya Mukuru ku ye okupanduka Messias. Pendje nokuhirimanisiwa i omburuma, Maria wa ziri nonduviro aihe na tja: “Owami omukarere waMuhona; ngape tjitwe ku ami otja punga awa hee.”—Lukas 1:26-38.

Ya ri ondjozikiro komuengeli okuyeta ombuze ya Jehova; posi yokutja, eye ka varere okuhungira ku nomundu omuhahomonena otjiṋa tja kauriri nao. Eye rutenga we mu korisa. Hapo matu rihongere ko otjiṋa kotjihorera ho? Nga tu suvere okukorisa ovandu varwe nokuveyanḓiparisa. Nomambo omaṱiṱi uriri, matu yenene okuvatera varwe nokuvepa omasa mokutja owo ovandu va Jehova wina.

Paulus aa tjiwa ovandu ovengi mozombongo za Asia Minor na Europe. Nu otutuu twe aa tu minike ovandu kourike wawo. Imbi matu vi munu okuza mOvaroma ekondwa 16. Paulus wa hinda ozombinika kovakambure ovakwao ovengi. Eye wa tamuna Febe, “omuungure  wa pamwe na ete,” nu wa raera ovakambure okumuyakura ‘mena ra Muhona ovakambure ovakriste punga ave sokutjita, nu ve mu vatere motjiungura ngamwa, indu tji me ve hepa.’ Paulus wina wa minika Priskila na Akuila, “kawami porwandje ngu me sokutja okuhepa ku wo, nungwari wina ozombongo azehe mokati koviwana ovisenginina.” Wina wa minika imba mbe ha tjiukwa ndino—“epanga randje esuverwa Epenetus” na wina “Trifena na Trifosa, ozoserekaze nḓe ungurira Muhona tjinene.” Ii tjiri, Paulus wa minika omarumbi novaṱena kwe—Rom. 16:1-16.

Ripura uriri kutja tjiri va ri nondjoroka ndji ṱa pi okumuna kutja va zemburukwa norusuvero. Ihi wina ma tji raisa kutja orusuvero rwa wo ku Paulus novakwao rwe kurira ko! Mokuzuva ozombinika nḓo, Ovakriste varwe va vanḓipara nu atji ve pe omasa okupaima mongamburiro. Ii, ozombinika nḓu maze zu komutima tjiri ze raisa onḓero mu varwe nu ze kurisa oupanga, wina ze ze waneka ovakarere va Mukuru.

Indu Paulus tja vaza po Puteoli okukapita ko Rome, Ovakriste mba ri mo ve ya ku ye okuyekumumuna. Omeho we tji ye riveta mu inga owa wo, Paulus wa tja “okuhepa ku Ndjambi nu a yanḓipara tjinene.” (Oviung 28:13-15) Povikando tjiva, tu yenena okumeṱameṱa kaṱiṱi poo okuyera eke otjomuano wokuminika omundu. Nu noho imbo omuano omuwa mbu vatera omundu rumwe kaṱiṱi ngwa hara okuwa momuinyo.

Omuhongewa Jakobus aa hepa okuyandja omaronga omakukutu. Ovakriste tjiva va uta okuwa mombepo mena rokusuvera oviṋa vyouye. (Jak. 4:4) Posi yokutja tara komuano Jakobus ma uta okutja nga orutuu rwe:

“Okuza ku Jakobus, omukarere waNdjambi nowaMuhona Jesus Kristus: Ozombinika kotjiwaṋa tjaNdjambi atjihe tji tja rimbara mouye auhe!” (Jak. 1:1) Okutja tjiri ya ri oupupu kovakwao okuyakura omaronga we tji va munu okuza kombinika ye kutja owo ve noumune umwe komurungu wa Mukuru. Ii, okukorisa nokuminika omundu otjiṋa tji tji paturura omutima womundu, nu i rira oupupu okuhungirira koviṋa ovinene tjinene.

Ombinika yoye nga rire o ya tjiri. Ohepero nandarire kutja varwe ka ve nokumuna nao. (Mat. 22:39) Sisi wetu umwe mo Ireland we ya pEtuwo rOmerikotameneno ape ombongarero i ute. Otja tjaa hakahana okuyenda potjihavero tje, mbuti umwe mbo we mu meṱameṱera nu atja: “Mo tja vi. Ndangi kutja wa vaza.” Sisi wetu ngwi wa haama uriri.

Kombunda yovivike oviṱiṱi, eye we ya ku mbuti wetu ngwi nu e mu raere kutja omayuva nga kapita wa ri nouzeu ponganda. “Tjiri mba ri nombameno momuinyo ongurova ndjo,” eye wa tja nao, “nga tji mbi hi na ee vanga okuyenda kombongarero. Hi zemburuka oviṋa ovingi pombongarero ndjo pendje nokutja otjikonda ho ove we ndji korisa. Tje ndji vatera tjinene. Ndangi.”

Mbutii wetu ngo kaa tjiwa kutja omuano mbwa korisa omukambure omukwao ngo ousupi nao wa eta ouwa ounene pu pe ṱa mbo. “Eye tje ndji raera kutja omambo ngo aa ye hee tjike ku ye,” omukambure ngwi wa tja nao, “Mba tjaterwa kutja mba tjiti ongondjero ndjo. Mba muna ohange mu ami omuini.”

Solomo wa tjanga kutja: “Pwika ouini woye mombwiko yehi rozonganda, orondu kosenina ove mo kamunina po ovihohe.” (Omuzuv. 11:1) Tji twe rihongo okukorisa ovandu, nu tjinene ovakambure ovakwetu, owo wina mave tu korisa tji matu hakaene na wo rukwao, nu ihi ma tji tu etere ouwa. Okutja arikana atu nyeṋuna omasa wokukorisa.