1. Otjikwaye tjimwe tji tja tjita kutja ovandu ve kare nonḓengu povinamuinyo?

OTJIṊA tjimwe tji tji tjita kutja ovandu ve kare nonḓengu povinamuinyo omena rokutja owo va ungurwa nomeritjiviro womomutima. Imbo ouatjiri okuza kombutiro youye. Adam na Eva tji va za nokuteya etwako ra Jehova, owo ve ke rihoreka. Ihi tji raisa kutja omeritjiviro wawo womomutima aa ye ve pe ondjo.

2. Omeritjiviro wetu womomutima ye sasanekwa vi ku notjihinge tjoskepi? (Tara kotjiperendero pomautiro worupa ndwi.)

² Imba mbe nomeritjiviro womomutima nge ha rongerisirwe nawa, ve ri tjimuna oskepi ndji notjihinge tji tja teka. Okutoora ouyenda notjihinge tji tji he ri mongaro ombwa mape ya a ku tu twa moumba. Ovivepo ovinamasa nozongazona ma vi yenene okutanaurira oskepi momuhunga mbu u he ri wo. Otjihinge tji tji ri mongaro ombwa ma tji yenene okuvatera omuhinge okuhinga momuhunga omusemba. Omeritjiviro wetu womomutima ma ye yenene okusasanekwa ku notjihinge tjoskepi. Owo otjiṋa tji tjiri mweṱe nu tji tji tu hinga okuhaṋa pokati kouwa nouvi. Nungwari kokutja omeritjiviro wetu ye ungure nawa, owo ye hepa okurongerisiwa nokutarewa nawa.

3. Otjikwaye tji matji yenene okutjitwa indu omeritjiviro wetu tji ye ha rongerisirwe nawa?

 ³ Indu omeritjiviro womundu tji ye ha rongerisirwe nawa, owo ka ye yenene okumuvatera okumuna kutja ma tjiti ouvi. (1 Tim. 4:1, 2) Nu omeritjiviro otja ingo mape ya aye tjiti kutja tu mune kutja “ouvi owo ouwa.” (Jes. 5:20) Jesus wa rakiza ovemukongorere kutja: “Noruveze maru ya auhe ngu me mu zepa tji ma tjangovasi mokutjita nao eye ma karere Ndjambi.” (Joh. 16:2) Nu imbo tjiri ouatjiri mbwa tjitwa i imba mba zepa omuhongewa Stefanus, nu varwe wina va zepewa mongaro tjingeyo ndjo. (Oviung. 6:8, 12; 7:54-60) Tjiri indjo onyekera ndja i tjitwa i ovanane vozongamburiro mba ve paha okuriraisa kutja ve ṱakamisa omatwako wa Mukuru, nungwari handje mave teya! (Eks. 20:13) Tjiri oukahu kutja omeritjiviro wawo womomutima aa ye ve wovisa oparukaze!

4. Matu yenene vi okutjita kutja omeritjiviro wetu ye kare ama ye ungura nawa?

⁴ Matu yenene okutjita vi kutja omeritjiviro wetu womomutima ye kare a maye ungura nawa? Omatwako nomirari mbi ri mEmbo ra Mukuru vi “nonḓengu onene yokuhonga ouatjiri nokupirukira omahongero woposyo, nokuvyura ozondataiziro, nokukuna ongarero osemba.” (2 Tim. 3:16) Kunao, mokukonḓonona Ombeibela nawa, okuripurira oukoto ku imbi mbi mai hungire, nokuviyenenisa mehupo retu, tjiri matu yenene okutjiwa kutja Mukuru u ripura vi, nu matji rire otjiṋa tji matji tu hongorere. Indjo tu tare kutja omatwako nomirari vya Jehova mavi yenena okutuvatera vi okutjita nao.

5, 6. Tu muna ouwa waye mokukongorera ozoveta za Mukuru?

⁵ Kokutja tu mune ouwa momatwako wa Mukuru, matu hepa okutjita ovingi pendje nokuyelesa nokuyetjiwa uriri. Matu sokuyesuvera nu atu kara nondengero ku wo. Embo ra Mukuru ri tja: “Tondeye ouvi mu suvere ouwa.” (Amos 5:15) Hapo ihi matu tji tjiti vi? Otjiṋa otjisemba, okukara noumune wa Jehova ohunga noviṋa. Okusasaneka: Ngatu tje rumwe ove ko rara nawa. Nu onganga yoye a i ku raere oviṋa mbi mosokutjita kutja u rare nawa tjimuna, ovikurya mbi u sokurya, okurikuturisa orutu, nokurundurura oviṋa tjiva mehupo roye. Nu tji wa zu nokurora, omunu kutja tjiri ma vi ungura! Tjiri ove mokara nondangi kombatero ndji wa pewa i onganga yoye.

⁶ Momuano tjingewo, Omuute wetu we tu pa omatwako nge tu tjevera komaumba nge ye twa i ouvi, nu ye tu etera ehupo ewa. Ripura nomuano mbu tu muna ouwa mokuṱakamisa omatwako wOmbeibela ohunga noviṋa tjimuna ovizeze, ovineya, okuvaka, otuvakiro, ozondjito zoutwe noundjai. (Lesa Omiano 6:16-19; Omavan. 21:8) Tji matu munu ouwa mbu za mokutjita oviṋa otja kombango ya Jehova, tu kara nondangi norusuvero ku Jehova nozoveta ze.

7. Okulesa nokuripurira komahungi wOmbeibela maku tu vatere okutjita vi?

⁷ Otjiṋa tji matu sokutjiwa, otjo hi tjokutja ka tu nokuhepa okuteya omatwako wa Mukuru kutja tu rihongere ko. Eṱe matu yenene okurihongera kozondataiziro za varwe, tjimuna imba mba tjangwa mOmbeibela. Omiano 1:5 ri tja: “Omiano mbi mavi yenene okuweza ko ondjiviro komunaunongo, nokuyandja omahongero omanazondunge komuhongwandu.” Eṱe tjiri tu muna omahongero omasembasemba okuza ku Mukuru, indu tji matu lese nokuripurira oukoto koviṋa vya katjiri mbya tjitwa mOmbeibela. Otjotjihorera, ripurira kouzeu Ombara David mbwa muna indu tja teya etwako ra Mukuru na tjiti oruvakiro kuna Batseba. (2 Sam. 12:7-14) Tji matu lese nokuripurira  oukoto kehungi ndo, mapeya atu ripura oveni kutja: ‘Ombara David a tja ye pa vi ouzeu mbwa ri a we mu kuramene mena rorukatuko ndwa tjita kuna Batseba? Indu tji mba hungamwa i omarorero tjimuna ngo, hapo me yenene okuyepirukira nouvanḓe? Me ye pirukire tjimuna Josef, poo meriyandjere ku wo tjimuna David?’ (Gen. 39:11-15) Mokuripurira koviṋa ovivi mbi etwa i oruvakiro, matu yenene okurongerisa omitima vyetu kutja tu ‘tonde ouvi nu tu suvere ouwa.’

8, 9. (a) Omeritjiviro wetu ye tu vatera movikwaye? (b) Omirari vya Jehova nomeritjiviro wetu vi ungura vi kumwe?

⁸ Eṱe nga tu kare kokure novitjitwa ovivi Mukuru mbya tonda. Posi yokutja pe noviṋa vyarwe ovingi mehupo, Ombeibela mu i ha yandja ozoveta ongahukiro. Moviṋa otja imbyo, hapo matu yenene vi okutjiwa kutja ovikwaye mbi mape ya a vi tjata ku Mukuru? Imbo Omeritjiviro wetu womomutima o pu ye utira okuungura.

⁹ Jehova wetu pa omirari vye norusuvero, mbi ungura ku nomeritjiviro wetu womomutima nga zikamena kOmbeibela. Eye omuini wa tja: “OwAmi Muhona Ndjambi woye, ngu mbi vanga okukuhonga ihi tji tji ri ombatero kove, nu ngu me ku urikire ondjira mu mo sokuryanga.” (Jes. 48:17, 18) Mokuungurisa ozondunge nomitima vyetu mokuripurira komirari vyOmbeibela, tu riṱuna, tu ri twa momuhunga mbu ri wo, nu tu rongerisa omeritjiviro wetu womomutima nawa. Nu imbi vi tu vatera okutoora ozondando nḓe ri zo.

10. Omirari ovikeṋa, nu Jesus we vi ungurisa vi nawa?

¹⁰ Omirari vyOmbeibela ovyo ouatjiri ounanḓengu, omahongero nge ungurisiwa mokuripurira koviṋa poo okutjita oviṋa. Okuzuva omurari nawa ku kamburira mo okutjiwa ouripura wOmuyandje womatwako nokutja omena ra ye tja yandja omatwako wo ri ve ngo. Motjiungura tje tjokuzuvarisa, Jesus wa honga ovahongewa ve okutjiwa ovikongorere ko mbi etwa i ongaro poo omukambo worive. Otjotjihorera, eye wa honga kutja omapindi nongore vi eta otjitandi nu oruhuro ru yenena okuyeta omakatukiro worukupo. (Mat. 5:21, 22, 27, 28) Kokutja tu kare nomeritjiviro womomutima nga rongerisiwa nawa, matu sokuyandjera omirari vya Mukuru okutuhongorera, nu monao matu eta ohiviro ku Mukuru.—1 Kor. 10:31.

11. Omeritjiviro womomutima ya panguka vi?

¹¹ Povikando tjiva, Ovakriste vevari mbe nomeritjiviro womomutima nga rongerisiwa nawa mave yenene okukara noumune mbwa panguka. Nga tu tare komaungurisiro wotjikariha. Ombeibela kai tjaere omundu okunwa. Nungwari, oyo i tjaera okupurukisiwa i otjikariha poo okunwa okukapitisa etota. (Omiano 20:1; 1 Tim. 3:8) Hapo ihi ma tji hee kutja Omukriste opuwo ma sokuripura kutja tji manu otjikariha kaṱiṱi pa yenene mena rokutja Ombeibela i tja nao po? Kako. Nandarire kutja omeritjiviro we ma ye mu pe nao, Omukriste auhe nge ripurire komeritjiviro wovakwao womomutima wina.

12. Ovaroma 14:21 mari tu vatere vi okutenga omeritjiviro wa varwe womomutima?

¹² Ohunga nounanḓengu wokuripurira komeritjiviro wOvakriste ovakwao womomutima, Paulus wa tja: “Okokuwa omundu tje hi nokurya onyama poo tje hi nokunwa omavinu poo tje hi nokutjita otjiṋa ngamwa tji matji putarisa omukwao.” (Rom. 14:21) Hapo ove mo yenene okunakaura oviṋa mbi ma vi putarisa ovakweṋu mbe nomeritjiviro womomutima nga panguka ku inga owo ye, nandarire kutja vi ri mouvara woye? Otjiperi kutja tjiri mo tjiti nao. Ngunda ave ha tjiwa ouatjiri, ovakambure  ovakwetu tjiva aave ungurisa otjikariha navi, posi yokutja nai kave nu rukwao. Okutja tjiri, ka maatu vanga okukara norupa mombutarero yomukambure omukwetu ndji mai kaeta omihihamo ominene! (1 Kor. 6:9, 10) Kunao, katjina ku rira orusuvero okuṋiṋikiza ovakambure ovakweṋu mbu wa ṋanga ko yoye tji ve hi nokuvanga okunwa.

13. Timoteus we tu pa vi otjihorera otjiwa kokukayendisa oviungura vyOuhona?

¹³ Timoteus tja ri nozombura ape 20, we ri yandjera okusukarisiwa momihihamo kokutja a ha putarisa Ovajuda varwe ka sokukazuvarisa. Ongaro ye ya ri tjimuna indji yomuapostele Paulus. (Oviung. 16:3; 1 Kor. 9:19-23) Tjimuna Timoteus, hapo u nonḓero yokutjita oviṋa kutja o ha putarisa varwe?

14, 15. (a) Okuryama komurungu ku kamburira moye? (b) Okuraisa orusuvero ku varwe ku raisa vi omaryameno wokomurungu otjOvakriste?

¹⁴ Ovakriste avehe mave sokukara nonḓero yokuisa “ovirihongwa ovitenga vyokuzuvarisa Kristus” nu ave ryama “komurungu.” (Hebr. 6:1) Ihi katjiṋa tji tja ungurwa mweṱe. Eṱe tu hepa okuryama “komurungu,” poo okuungurira ko aruhe. Okuryama komurungu ku kamburira mo okukura mounongo nozondunge. Nu tjiri tu tunduuzwa aruhe okulesa orupa rOmbeibela eyuva arihe. (Eps. 1:1-3) Hapo ove u tjita nao aruhe? Okutjita nao maku kupe ozondunge momatwako nomirari vya Jehova, nomazuviro omakoto wEmbo ra Mukuru.

¹⁵ Etwako enenenene kOvakriste orusuvero. Jesus wa raera ovahongewa ve kutja: “Tji mwa suverasana, indino avehe otji mave tjiwa kutja oweṋe ovahongewa vandje.” (Joh. 13:35) Jakobus, omuangu wa Jesus, we ri isana kutja “etwako rouhona waNdjambi.” (Jak. 2:8) Paulus wa tja: “Norusuvero owo omayenenisiro wOmatwako aehe.” (Rom. 13:10) Omaṋuṋisiro worusuvero nga ka ma himise, orondu Ombeibela i tja “Ndjambi tjinga e ri orusuvero.” (1 Joh. 4:8) Orusuvero rwa Mukuru katjiṋa tji tji hungirwa momambo yotjinyo uriri. Johanes wa tja: “Nu Ndjambi wa raisa orusuvero rwe ku eṱe, indu tja hinda Omuna we erike porwe kouye, kokutja eṱe tu mune omuinyo mu Ye.” (1 Joh. 4:9) Ii, orusuvero rwa Mukuru rwe mu hinga kutja ma tjite otjiṋa. Eṱe tu raisa omaryameno wetu wokomurungu, indu tji matu suvere Jehova nOmuna  we, Ovakriste ovakwetu novandu varwe wina.—Mat. 22:37-39.

16. Otja tji matu ryamene ko komurungu, ongwaye omirari tji vi rira omiṋandengu kweṱe?

¹⁶ Otja tji mo ryama komurungu, moutu okumuna kutja omirari vyOmbeibela ominahepero tjinene kove. Nu omena rokutja omatwako mape ya aye ungurisiwa potuveze tjiva uriri, posi yokutja omirari tu hepa okuviungurisa apehe pu tu ri. Otjotjihorera, omuatje omuṱiṱi mape ya a ha tjiwa oumba wokukara nomapanga omavi, okutja omunene wozondunge ma twapo ozoveta nḓu ma ze mu tjevere. (1 Kor. 15:33) Posi yokutja omuatje ngwa kaha, u kara nozondunge nḓa yenene okuripurira komirari vyOmbeibela. Kunao, aruhe ma yenene okutoorora omapanga omawa. (Lesa 1 Ovakorinte 13:11; 14:20.) Tji matu ripurire komirari vya Mukuru, tu yenene okuṱaṱera komeritjiviro wetu womomutima nge hitasana nomeripura wa Mukuru.

17. Ongwaye tji matu tja tu noviṋa mbi tu hepa okutoora ozondando ozombwa?

¹⁷ Nu hapo tu noviṋa avihe mbi heperwa po okutoora ozondando nḓu ma ze tjata ku Mukuru? Ii. Mokuungurisa omatwako nomirari mbi ri mEmbo ra Mukuru nounongo, Ombeibela mai tja omundu ngu ri nao ma rire “omupyuke tjinene nu e rirongerere okuungura otjiungura ngamwa atjihe otjiwa.” (2 Tim. 3:16, 17) Okutja, konḓonona omirari vyOmbeibela kutja u ‘tjiwe imbi Muhona mbi ma vanga kutja u tjite.’ (Ef. 5:17) Ungurisa oviungurisiwa vyomakonḓononeno nawa mbya yandjwa i yombongo yOvakriste, tjimuna oumbo wOruhungu oukuru, Okambo komakonḓononeno kOvahongonone va Jehova, o-Watchtower Library, o-Watchtower ONLINE LIBRARY, no-JW Library app. Oviungurisiwa mbi vya rongerisiwa okutuvatera kourike wetu na pomerikotameno weṱunḓu.

18. Tu muna ozondaya za ye tji matu hupu otja komatwako nomirari vya Jehova?

¹⁸ Ozondaya ze za mokuṱakamisa omatwako nomirari vya Jehova, tjimuna tji pe raisiwa mEpsalme 119:97-100: “Tjiri, ami mba suvera omatwako woye! Mbi ripura na wo oure weyuva arihe. Etwako roye ri ndji pa ounongo pu imbwi wonavita na ami, oro aruhe ri ri pu ami. Ami mbi nozondunge komeho yaavehe mbe ndji honga, orondu mbi ripura nomaraerero woye. Mbi nounongo povakurundu avehe, orondu mbi ṱakamisa omarakiza woye.” Eṱe matu yenene okukara nounongo aruhe, nozondunge nomazuviro omawa wina, indu tji twa twapo oruveze atu “ripura” nomatwako nomirari vya Mukuru. Tji twa kondjo nomasa, “matu sana komundu ngwe kura okuyenena nu ngu nomuseka ohamukwao na imbwi owaKristus” otja tji matu yandjere kutja omatwako nomirari vya Mukuru vi hongorere omeritjiviro wetu womomutima.—Ef. 4:13.