1, 2. (a) Ongwaye tji tu yanḓiparisiwa i imba mbe zuvarisa nouṱakame momaturiro wovandu mbe ha puratene? (Tara kotjiperendero pomautiro worupa ndwi.) (b) Jesus wa tja tjike ohunga nokuzuvarisa “mehi re omuini”? (Tara komambo wokehi.)

SERGIO NA OLINDA ovakupasane ovakandjira votjiwondo tjozombura ape 80, mbe kara moUnited States. Katjisupi, omarama wawo ya uta okuhihamwa, nu ihi tji tjita kutja i rire ouzeu ku wo okukaenda. Posi yokutja, otja tji ve tjita ozombura azehe, omuhuka omunene auhe mohambombari, owo ve yenda koruveze pu pe nyangatara ovandu tjinene mondoropa. Ve kurama poruveze rwawo, meṋe yomarondero wozombesi nu ave utu okuyandja oumbo mbwa zikamena kOmbeibela kovakapite. Otjingi tjovandu kave vepe ombango, posi yokutja ovakupasane mba ve kara poruveze rwawo ndo, nu ve meṱameṱa kovandu mbu mave kapita. Nu momahatenya, owo ve hona kaṱiṱi okuyaruka konganda. Omuhuka omunene warwe, mohambombari, handje veri mbo rukwao. Nu tjiri, ovakupasane ovaṱakame mba ve zuvarisa ombuze yOuhona omihuka ominene avihe  hamboumwe motjivike, okuza kombura nga kombura.

² Tjimuna Sergio na Olinda, otjingi tjovakambure ovaṱakame mouye auhe va zuvarisa ozombura ozengi momaturiro ovandu mbe ha puratene. Tjinangara uri mongaro ndjo, tjiri tu nondangi konḓaro orure yoye. * Onḓaro orure yoye mu Jehova, tjiri otjiṋa otjiyanḓiparise kovengi, nandarire ku imba mba kara orure mouatjiri. Ovatarere vozombongo ve tja: “Tji me ungura pu novakambure ovaṱakame mba motjiungura tjokuzuvarisa, tjiri mbi hara omasa omape mena rotjihorera tjawo otjiwa.” “Ongamburiro yawo indji yanḓiparisa okukayenda komurungu, nokundjipa ouvanḓe mokuzuvarisa.” “Otjihorera tja wo tji ndji ṱuna komutima.”

3. Omapuriro yeṋe yetatu ngu matu ka tara ko, nu omena ra ye?

³ Morupa ndwi matu ka zira omapurio yetatu nga: Ongwaye tji mape ya povikando atu u momuinyo? Okuyeta ovihape ku heya tjike? Otjikwaye tji matji tu vatere okuyeta ovihape monḓaro orure? Okutjiwa omaziriro komapuriro nga, ku tu yanḓiparisa okukayenda komurungu notjiungura tjokuzuvarisa, Jesus tja yandja kweṱe.

4. (a) Ongaro ombi yOvajuda ovengi ya ṱuna vi ku Paulus? (b) Ongwaye Paulus tja ri mongaro ndjo?

⁴ Tji wa rora okuwa momuinyo motjiungura tjokuzuvarisa mena rokutja ovandu ka ve puratene, zemburuka kutja omuapostele Paulus wina wa ri mongaro tjinge yo. Mozombura ape 30 zotjiungura tje tjokuzuvarisa, eye wa vatera ovandu ovengi okurira ovahongewa va Kristus. (Oviung. 14:21; 2 Kor. 3:2, 3) Posi yokutja, ka toṋene okuisapo Ovajuda avehe okurira ovahongewa. Nu wina, tjiva va wo va tondere Paulus, nu tjiva ve mu tatumisa. (Oviung. 14:19; 17:1, 4, 5, 13) Hapo omeritjindiro wOvajuda ngo ya ṱuna vi ku Paulus? Eye wa tja: “Ami me hungire ouatjiri; owami owaKristus . . . tji me tja mbi noruhoze orunene, nokutja mbi nomuhihamwatima.” (Rom. 9:1-3) Ongwaye Paulus tja ri mongaro ndjo? Omutima we wa ri kotjiungura tjokuzuvarisa. Eye wa zuvarisira Ovajuda mena rokutja ee rikendere wo tjinene. Okutja tjiri ya ri oruhoze ku Paulus okumuna Ovajuda a mave nakaura otjari tja Mukuru.

5. (a) Otjikwaye tji tji tu hinga okuzuvarisa kovandu? (b) Ongwaye tje heri oukumise kutja povikando tu yenena okuwa momuinyo?

⁵ Tjimuna Paulus, eṱe tu zuvarisira ovandu orondu tu rikendera wo tjinene. (Mat. 22:39; 1 Kor. 11:1) Ongwaye? Eṱe tu rimunina oveni ozondaya Jehova nḓe sera ku imba mbe vanga okumukarera. Tji matu ripura nomundu kourike we momaturiro wetu, tu ripura oveni kutja, ‘Oweṱe mbu tu sokuvevatera okumuna oviṋa ovinanḓengu tjinene!’ Kunao, eṱe tu kayenda komurungu okuvevatera okurihonga ouatjiri ohunga na Jehova nondando ye kovandu. Momuano warwe, eṱe tu tja nai ku imba ku tu zuvarisa: ‘Twe ku etere otjiyandjewa otjiwa. Arikana kambura.’ Okutja ovandu tji ve hi nokuyakura otjiyandjewa hi, kaukumise kutja eṱe tu kara “nomuhihamwatima.” Okukara nomuhihamwatima nao ka ku hee kutja katu nongamburiro, nungwari ku he ya kutja omitima vyetu viri motjiungura tjokuzuvarisa. Nandarire kutja povikando tjiva tu yenena okuwa momuinyo, tu panḓera po. Elena, ngwa kara omukandjira ozombura zokombanda 25 u noumune tjimuna owetu atuhe, indu tja tja: “Okuzuvarisa kaupupu. Posi yokutja, ka pe noviungura vyarwe mbye tje vanga okuungura.”

6. Epuriro riṋe ndi matu tara ko, nu omomuano uṋe?

⁶ Ongwaye tji matu yenene okukara nongamburiro kutja matu eta ovihape oviwa, ngamwa akuhe ku matu zuvarisa? Okuzira epuriro  enanḓengu ndo, nga tu tare komasasanekere yevari ya Jesus nge raisa ounanḓengu ‘wo ku ruka ovihape.’ (Mat. 13:23) Otjitenga ohunga nomuvite.

7. (a) “Omuungure wotjikunino”, “omuvite” ‘notutavi’, vi kuramena pouṋe? (b) Matu kapaha eziriro kepuriro riṋe?

⁷ Lesa Johanes 15:1-5, 8. Jesus wa raera ovaapostele ve, na tja: “Ma rire ondjozikiro onene ku Tate indu tji mamu eta ovihape ovingi, nu momuhingo mbwi eṋe mamu rire ovahongewa vandje.” Jesus wa hangununa Jehova otja “omuungure wotjikunino,” nu eye we ri tja “omuvite watjiri,” nu ovahongewa ve “otutavi.” * Nu hapo, ovihape viṋe ovakongorere va Kristus mbi mave sokuruka? Motjisasanekero hi, Jesus kena pa hungira kutja ovinge hape, posi yokutja eye wa raisa otjikaṋena tji matji tu vatere okumuna eziriro.

8. (a) Motjisasanekero hi, ongwaye ovihape tjivi ha hee ovandu mbu tu isapo ovahongewa? (b) Ovikwaye Jehova mbye undjira ko kweṱe?

⁸ Jesus wa tja ohunga na Ihe: “Eye ma teya orutavi ngamwa aruhe ndu ri mu Ami nu ndu hi nokuruka ovihape.” Momambo warwe, Jehova u tu vara otja ovakarere ve indu tji matu ruku ovihape uriri. (Mat. 13:23; 21:43) Pu mape hee kutja, motjisasanekero hi, ovihape Omukriste auhe mbi ma sokuruka, ka vi nokuheya imba mbu matu eta kongamburiro youatjiri. (Mat. 28:19) Ndovazu peri nao, okutja ovazuvarise ovaṱakame mbe hiya isa po ovandu ovahongewa momaturiro ovandu mu ve ha puratene, okutja mave kara tjimuna otutavi tu tu hi novihape motjisasanekero tja Jesus. Posi yokutja oumune otja imbo ouposyo! Omena ratjike? Eṱe ka maa tu ṋiṋikiza ovandu okurira ovahongewa. Nu Jehova oMukuru omunarusuvero. Eye kamaa ṋiṋikiza ovakarere ve okutjita otjiṋa tji ve hina okuyenena okutjita. Jehova u tu ningira otjiṋa tji matu yenene okutjita.—Deut. 30:11-14.

9. (a) Otjiungura tjiṋe tji tu ungura okuruka ovihape? (b) Otjisasanekero tjiṋe tji matu katara ko, nu omena ratjike?

⁹ Nambano, ovingee hape mbi matu sokueta? Oukahu kutja, ovihape mbi vi heya otjiungura auhe wetu tji ma yenene okuungura. Nu hapo otjiungura tjiṋe tji tji tjita kutja tu ‘ruke ovihape’? Okuzuvarisa ombuze ombwa yOuhona wa Mukuru. * (Mat. 24:14) Otjisasanekero tja Jesus tjomukune tji raisa oukahu ohunga nepu ndo. Indjo tu tare kotjisasanekero otjitjavari tji.

10. (a) Ehi nondwi vi kuramena po ye motjisasanekero tji? (b) Ovihweka vyovikokotwa vi eta ovikwaye?

¹⁰ Lesa Lukas 8:5-8, 11-15. Motjisasanekero tjomukune, ondwi ondji ri “embo raNdjambi” poo ombuze yOuhona wa Mukuru. Ehi ri kuramena po omitima vyovandu. Ondwi ndja wire mehi ewa i twako omize, avihandjauka, nu avi hapa okurira ovihweka vyovikokotwa. Okuzambo, ai “twa ko ovikokotwa, aihe peke esere rimwe.” Nu hapo, ovingee hape mbi etwa i ovihweka vyovikokotwa? Hapo i eta ovihweka vyovikokotwa oviṱiṱi uriri? Kako, i eta ozondwi ozombe, nu nḓu maze rire ovihweka. Motjisasanekero hi, ondwi aihe i twako ovikokotwa esere. Otjiṋenge tjotjisasanekero hi ma tji ṱunu vi kotjiungura tjetu tjokuzuvarisa ndino?

11. (a) Otjisasanekoro hi tjomukune matu yenene vi okutjiungurisa motjiungura tjokuzuvarisa? (b) Matu yeta vi ondwi ombe yOuhona?

¹¹ Mokusasaneka, ngatu tje ozombura ozengi nḓa kapita Omuhongonone poo ovanene vetu Ovakriste ve tu zuvarisira ombuze yOuhona. Nu va muna ondjoroka, mena rokutja va muna omuano omitima vyetu mu vya yakura ombuze yOuhona, ndji sasanekwa nondwi. Tjimuna ehi motjisasanekero tja Jesus tji ra ṱiza ondwi, eṱe wina twa yakura ombuze nu atu i ṱiza. Mena ranao, ombuze yOuhona ndji sasanekwa nondwi, ya toora omize nai hapa tjimuna tji pa kara novihweka  vyovikokotwa, mbya twako ovihape. Nu omuano ovihweka vyovikokotwa mu vya twako ovihape, kai nokuheya ovihweka ovipe, posi yokutja ondwi ombe ndji yeta ovihape, nu ka vahongewa ovape, posi yokutja ondwi ombe yOuhona. * Eṱe tu eta vi ondwi ombe yOuhona? Oruveze aruhe tji matu zuvarisa ombuze yOuhona, momuano umwe po omukwao, tu hungira nokuhandjaura ondwi ndja kunwa momitima vyetu. (Luk. 6:45; 8:1) Kunao, otjisasanekero hi tji tu honga kutja tji matu kayenda komurungu okuzuvarisa ombuze yOuhona , tu “eta ovihape monḓaro orure.”

12. (a) Matu rihongere ko tjike kovisasanekero vya Jesus ohunga nomuvite nomukune? (b) Nu imbi mavi ku ṱunu vi?

¹² Matu rihongere ko tjike kovisasanekero vya Jesus vyomuvite nomukune? Ovyo vi tu vatera okuzuva kutja otjiungura tjetu tjokueta ovihape, katji rekareka komuano ovandu mu mave yakura ombuze yOuhona momaturiro wetu. Nungwari, tji rekareka kouṱakame wetu oveni. Paulus wa hungira omambo otja ingo, indu tja tja: “Ndjambi ma yandja ku auhe ondjambi ye otja koviungura vye mbya ungura.” (1 Kor. 3:8) Matu munu ondjambi mokuzuvarisa nungwari ka mokutja ovandu mave puratene poo indee. Omukazendu omukambure wena Matilda, ngu ri omukandjira oure wozombura 20, wa tja: “Tjiri tji ndji pa ondjoroka okutjiwa kutja Jehova u yandja ondjambi kozongondjero zetu.”

13, 14. Otja ketjangwa rOvaroma 10:1, 2, ongwaye Paulus tje hina wa yumba ohama okuzuvarisira ovandu mba ve raisa ongaro ombi kombuze yOuhona?

¹³ Otjikwaye tji matji tu vatere okuyeta ovihape monḓaro orure? Otja tji twa munu pomautiro, Paulus wa wire momuinyo mena rongaro ombi Ovajuda ndjaa ve raisa kombuze yOuhona. Nandarire kutja pa kara nao, eye kena pa yumba ohama. Tara ku imbi mbya hungira morutuu rwe kOvakriste mo Roma ohunga noumune we kOvajuda: “ami mbi zera nomutima wandje auhe kutja otjiwaṋa tjandje tji mune ondjamo! Opu mbi zokutjikumbira ku Ndjambi. Ami me yenene okuhongonona kutja owo ve pyukira Ndjambi tjinene, nungwari owo ve tjita nao nokuhinondjiviro osemba.” (Rom. 10:1, 2)  Ongwaye Paulus tja kayenda komurungu okuzuvarisa?

¹⁴ Otjitenga, Paulus wa hungira kutja ongwaye aruhe tja zuvarisire Ovajuda. Eye wa tja, aa hingwa i ‘yonḓero yomutima we.’ Eya wa ri nonḓero komutima tjiri kutja Ovajuda tjiva ve yamwe. (Rom. 11:13, 14) Otjitjavari, Paulus wa tja, ope “zokutjikumbira ku Ndjambi.” Eye ee riheke ku Mukuru mo ngumbiro okuvatere Ovajuda tjiva ve yakure ombuze yOuhona wa Mukuru. Otjitjatatu, Paulus wa weza kutja: “Owo ve pyukira Ndjambi tjinene.” Eye aa munu kutja ovandu mape ya ave rundurura ongaro yawo. Oupyuke, tji wa hingwa momuano omusemba, u yenena okurundurura ongaro yovandu overisusuparise mokurira ovahongewa va Kristus ovapyuke, tjimuna tji pa tjitwa ku Paulus.

15. Matu yenene vi okuhorera ku Paulus? Yandja ovihorera.

¹⁵ Eṱe matu yenene vi okuhorera ku Paulus? Rutenga, nga tu kare nonḓero tjiri mokupaha ovandu “imba mba toororerwa omuinyo waaruhe.” Otjitjavari, nga tu ningire Jehova mongumbiro kutja ma paturure omitima vya imba overisusuparise. (Oviung. 13:48; 16:14) Omukazendu omukambure wena Silvana, ngu ri omukandjira ozombura ape 30, wa tja: “Ngunda a mbi hiya vaza pondjuwo momaturiro wandje, mbi kumba ku Jehova, okuningira kutja me ndji pe oumune ouwa.” Eṱe wina tu kumba ku Mukuru kutja ovaengeli ve tu vatere okuhakaena novandu mbu ve vanga okutupuratena. (Mat. 10:11-13; Omavan. 14:6) Omurumendu omukambure wena Robert, ngu ri omukandjira ozombura zokombanda 30, wa tja: “Okuungura puna ovaengeli mbu mave tjiwa kutja mape kayenda ye mondjuwo yovandu mu matu kazuvarisa, tjiri tji ndji pa ondjoroka.” Otjitjatatu, tu kondja okumuna ouwa movandu, wokutja owo mave yenene okukarera Jehova. Omunene wombongo wena Carl, ngwa papitisiwa oure wozombura zokombanda 50 nḓa kapita, wa tja: “Ami mbi tara koviraisiro oviṱiṱi mbi raisa ouwa womundu ngo womomutima, tjimuna tji ma meṱameṱa, tji ma raisa ongaro ombwa, poo tji ma pura epuriro okuza komutima tjiri.” Tjimuna Paulus, eṱe wina matu yenene okueta ovihape monḓaro orure.

16, 17. (a) Matu rihongere kotjike kerakiza ndi ri mOmuzuvarise 11:6? (b) Oviungura vyetu vyokuzuvarisa vi ṱuna vi ku imba mbu mave tu tarere?

¹⁶ Katu sokuzemba kutja otjiungura tjokuzuvarisa tji ṱuna kovandu, nandarire kutja pe munika aayo kave puratene. (Lesa Omuzuvarise 11:6.) Ouatjiri owombwi wokutja, ovandu ovengi kave tu puratene, posi yokutja ve tu tarera. Owo ve muna omuano omuwa mbu tu rihwikika, ongaro yetu ombwa, na indu tji matu meṱameṱa. Otja oruveze tji maru kayenda, omeritjindiro wetu ye yenena okuvatera varwe okumuna kutja, oumune wawo ouvi ohunga na eṱe ka watjiri. Sergio na Olinda, mba tamunwa pomautiro, va muna omarundurukiro nga.

¹⁷ Sergio wa tja: “Oruveze orusupi, eṱe kaa tu yenene okuyenda poṋa paa tu kazuvarisira mondoropa, mena rouvere. Indu tji twa yaruka, ovakapite ve tu pura kutja, ‘Mu kara pi? Twe mu zengisa orure.’” Olinda wa weza ama meṱameṱa na tja: “Ovahinge wozombesi ve tu yerera omake nu ovandu tjiva va ravaera okuza mozohauto zawo nave tja, ‘Otjiungura otjiwa tji mamu ungura ho!’ Nu nandarire ve tu ningira omambo.” Ovakupasane mba va uruma, indu omurumendu tje ya ku wo nu e ve pe ovibloma, na tja okuhepa koviungura mbi ve ungura.

18. Ongwaye tji we rimanene ‘okuyeta ovihape monḓaro orure’?

¹⁸ Tji twa kayenda komurungu okuhina ‘okusuvisa omake wetu’ okukuna ondwi yOuhona, eṱe tu norupa mokuyandja “omahongononeno koviwaṋa avihe.” (Mat. 24:14) Nu tjinenenene, tu kara nondjoroka onene ndji za mokutjiwa kutja Jehova we tu yakura, mena rokutja wa suvera avehe mbe “eta ovihape monḓaro orure”!