1-2. Ongwaye Omatjangwa tjiva tji mape ya aye rire omananḓengu ku eṱe indu tji pe nomarundurukiro mehupo retu?

 MEYUVA rorukupo, ovakupasane ve puratena kehungi rOmbeibela ohunga norukupo. Omirari mbi mavi hungirwa mbo kaviṋa ovipe ku wo. Posi yokutja okuza keyuva ndo ondjivisiro ndji, mai kara nomaheero omape ku wo. Omena raye? Mena rokutja owo mave i ṱakamisa otjovakupasane.

² Otjingaperi nao wina, indu ovakupasane Ovakriste tji va munu ovanatje. Momakayendero wozombura owo mape ya va zuva omahungi omengi ohunga nokukurisa ovanatje. Posi yokutja, omaronga ngo nai maye rire omanahepero tjinene ku wo. Owo mave kara nomuatje wawo oveni okukurisa. Ingo tjiri omerizirira omanene. Indu oviṋa tji vya runduruka mehupo retu Omatjangwa tjiva ye rira omanahepero ku eṱe. Indi eepu rimwe ndi tjita kutja ovakarere va Jehova ve lese Omatjangwa. Owo ve ripurira ko oukoto kOmatjangwa “omayuva aehe” ngunda ave nomuinyo, tjimuna ozombara za Israel tji za raererwe okutjita.—Deut. 17:19.

3. Morupa ndwi matu kahungirira ku ye?

³ Vanene, eṋe mu nondjingonekero yapeke Omukriste ndji ma yenene okukara na yo, yokuhonga ovanatje veṋu ohunga na Jehova. Posi yokutja ko sokuveraera ondjivisiro ohunga na Mukuru uriri. Nungwari u sokuvevatera kutja ve suvere Jehova tjinene. Ove mo yenene okutjita vi kutja ovanatje voye ve  suvere Jehova? Morupa ndwi matu kahungirira komirari vine vyOmbeibela mbi mavi yenene okumuvatera otjovanene. (2 Tim. 3:16) Nu wina matu katara kutja ovanene tjiva Ovakriste va muna vi ouwa mokuṱakamisa omaronga wOmbeibela.

4. Omurari uṋe mbu mau vatere ovanene okuvatera ovanatje vawo kutja ve suvere Jehova okuza komutima? (Jakobus 1:5)

⁴ Omurari omutenga: Paha omuhunga wa Jehova. Ningira Jehova kutja me ku pe ounongo mbu mo hepa okuvatera ovanatje voye okumusuvera. (Lesa Jakobus 1:5.) Eye Oomundu omusembasemba okukupa ondunge. Pe nomapu omengi ngu maye raisa kutja omena raye. Ngatu katare ku yevari. Etenga, Jehova ongu nondjiviro onyingi otjomunene. (Eps. 36:9) Oritjavari, ondunge ndji me ku pe, oyo aruhe i eta ouwa.—Jes. 48:17.

5. (a) Ovikeṋa otjira tja Jehova mbi tja yandja okuvatera ovanene? (b) Otja tji pa raisiwa mokavidio, we rihongere ko ye komuano Mbuti na Sisi Amorim mu ve kurisa ovanatje vawo?

⁵ Jehova wa yandja ondjivisiro onyingi okupitira mEmbo re notjira tje, ndji mai yenene okuvatera ovanene okukurisa ovanatje vawo kutja ve suvere Jehova. (Mat. 24:45) Otjotjihorera, mo yenene okuungurisa ondjivisiro ndji ri motupa tu tu nepu ndi “Ombatero keṱunḓu,” ndjaai pitisiwa ozombura ozengi mokambo nga Awake! Nu nai mo i vaza korungovi rwetu. Nu wina ouvidio ouingi mbwa pitisiwa mo jw.org, u nomapuriro nomanyando ngu maye yenene okuvatera ovanene okuṱakamisa omirari vya Jehova, otja tji mave kurisa ovanatje vawo. *—Omiano 2:4-6.

6. Omurumendu umwe nomukazendu we, ve noumune uṋe ohunga nomirari mbi ve muna okuza kotjira tja Jehova?

⁶ Ovanene ovengi ve yandja ondangi ku Jehova kombatero ndje yandja okupitira motjira tje. Omurumendu wena Joe wa tja: “Okukurisa ovanatje vetatu mouatjiri katji ungura otjipupu. Ami nomukazendu wandje aruhe tu kumba kutja Jehova me tu vatere. Motjikando atjihe pe pita orupa poo okavidio moruveze orusemba ku ke tu vatera mongaro mu tu ri. Aruhe tu riyameka komuhunga wa Jehova.” Joe nomukazendu we va muna kutja  otupa twi nozovidio, tu vatera ovanatje vawo okutumbuka popezu na Jehova.

7. Ongwaye tje ri ounanḓengu kovanene okukondja okuraisa otjihorera otjiwa? (Ovaroma 2:21)

⁷ Omurari outjavari: Rira otjihorera otjiwa. Ovanatje ve tara kovihorera vyovanene vawo nu potuingi ave tjiti imbi mbi mave munu. Otjingaperi kutja kape nomunene ngu ri ohomonena. (Rom. 3:23) Nungwari ovanene mave sokukondja okuraisa otjihorera otjiwa kovanatje vawo. (Lesa Ovaroma 2:21.) Omurumendu umwe ngu novanatje wa tja: “Ovanatje ve ri tjimuna esembi. Owo ve horera oviṋa avihe mbi mave munu.” Eye wina wa tja: “Owo ve tu raera indu tji tu hi nokutjita oviṋa mbi matu ve hongo.” Okutja, tji matu vanga kutja ovanatje vetu ve kare noupanga ouwa ku na Jehova, eṱe oveni matu sokukara noupanga wopopezu ku na ye nu matu sokuraisa movitjitwa.

8-9. We rihongo tjike okuza komambo wa Andrew na Emma?

⁸ Pe nomiano omingi tjinene ovanene mu mave yenene okuhonga ovanatje vawo okusuvera Jehova. Omurumendu omukambure wozombura 17, wena Andrew wa tja: “Ovanene vandje ve ndji honga ounanḓengu wongumbiro. Ongurova aihe Tate aa kumbu ku na ami nandarire kutja mba kumbu rukuru. Ovanene vandje aave tu zemburukisa aruhe kutja, ‘Mamu yenene okuhungira ku na Jehova povikando ovingi otja pu mamu vanga.’ Mena ranao, ongumbiro otjiṋa otjinanḓengu tjinene ku ami. Nambano oupupu ku ami okukumba ku Jehova nu mbi muna kutja we ndji suvera tjinene.” Vanene, tjiweye kutja orusuvero rweṋu ku Jehova, maru yenene okuhinga ovanatje veṋu okumusuvera wina.

⁹ Wina tara kotjihorera tja Emma. Indu ihe tja isa eṱunḓu, wa isa ina nozondjo ozengi nḓaa sokusuta. Emma wa tja: “Pa ri ovikando ovingi Mama tje ha ri novimariva mbya yenene, posi ya aruhe aa hungire ohunga nomuano Jehova me ṱakamisa ovakarere ve. Ee munu momuano maa hupu kutja eye tjiri wa ri nongamburiro. Mama aa ṱakamisa oviṋa mbyee ndji hongo.” Matu rihongo tjike? Ovanene mave yenene okuraisa otjihorera otjiwa nandarire indu tji ve ri mouzeu.—Gal. 6:9.

10. Oruveze ruṋe tjinene ovanene vOvaisrael ovengi maave yenene okuhungira ku novanatje vawo ohunga na Jehova? (Deuteronomium 6:6, 7)

¹⁰ Omurari outjatatu: Hungira ku novanatje voye aruhe. Jehova wa rakizire Ovaisrael okuhonga ovanatje vawo ohunga na ye aruhe. (Lesa Deuteronomium 6:6, 7.) Ovanene mbo, va ri noruveze oruingi meyuva arihe okuhungira ku novanatje vawo, nokuṋiṋikizira orusuvero rwa Jehova momitima vyawo. Otjotjihorera, okazandona kOmuisrael aake kara oruveze oruingi amake vatere ihe okukuna poo okukonda ovikokotwa. Omuṱena aa uhara oruveze oruingi pu na ina ame mu vatere okuyatata, nokutunga, nokuvatera noviungura vyarwe ponganda. Otja ovanene novanatje tjaave ungura pamwe, aave yenene okuhungirira komapu omengi omananḓengu. Otjotjihorera, owo aave yenene okuhungirira kouwa wa Jehova nomuano eye maa vatere eṱunḓu rawo.

11. Oruṋe ovanene mbe novanatje tji mave yenene okuhungira ku novanatje vawo?

¹¹ Ndino ehupo ka riri tjimuna tji ra ri rukuru. Momahi omengi ovanene kave yenene okukara pu novanatje vawo momakayendero weyuva. Ovanene mape ya ve kaungura nu ovanatje ve kara koskole. Ku nao, ovanene mave hepa okupaha oruveze okuhungira ku novanatje vawo. (Ef. 5:15, 16; Fil. 1:10) Omerikotameneno wEṱunḓu ooruveze orunanḓengu  okutjita nao. Omurumendu omukambure omutanda, wena Alexander wa tja: “Tate aruhe u kondja kutja pe kare Omerikotameneno wEṱunḓu. Neye kayandjere otjiṋa okututjaera kOmerikotameneno wEṱunḓu. Kombunda yOmerikotameneno wEṱunḓu, eṱe tu hungirira kotjiṋa atjihe otjinanḓengu meṱunḓu.”

12. Otjiuru tjeṱunḓu matji sokukondja okuyenenisa ye mOmerikotameneno wEṱunḓu?

¹² Tji u ri otjiuru tjeṱunḓu, mo yenene okutjita vi kutja ovanatje ve yorokere Omerikotameneno wEṱunḓu? Ove mo yenene okurihonga pu novanatje voye embo retu epe ndi Yorokera ehupo nga aruhe. Embo ndi, ri tjita kutja i rire oupupu okukara notjihungiriro otjipaturuke. Tji mo vanga kutja ovanatje voye ve ku raere oumune wawo noviṋa mbi mavi ve kendisa, o ungurisa oruveze rweṋu rwOmerikotameneno wEṱunḓu okuvevyura poo okuveronga. Nu wina kondja kutja o ha pindike indu ovanatje voye tji mave hungire oviṋa mbi hi nokuhitasana ku nOmbeibela. Nungwari kara nondjoroka okutja owo mave ku raere oumune wawo, nu ve tunduuza kokutja ve tjite nao aruhe. Mo yenene okuvatera ovanatje voye nawa indu tji mo tjiwa kutja ve noumune uṋe.

13. Opotuveze tuṋe twarwe ovanene pu mave yenene okuvatera ovanatje vawo okutumbuka popezu na Jehova?

¹³ Vanene, paheye omiano eyuva arihe okuvatera ovanatje veṋu okutumbuka popezu na Jehova. Ove ko nokuhepa okuundja omerihongero wOmbeibela okuvehonga ohunga na Mukuru wetu worusuvero. Omukazendu wena Lisa wa tja: “Eṱe tu ungurisa oviṋa avihe ongondoroka na eṱe okuhonga ovanatje vetu ohunga na Jehova. Otjotjihorera, indu ombwa yetu tji ya tjiti otjiṋa tji matji yorisa ovanatje, eṱe tu ve raera kutja iho otjiraisiro tjokutja Jehova oMukuru wondjoroka, nu wa tjita kutja tu kare nondjoroka nokutja tu tjaterwe i yoviṋa ovikumise wina.”

14. Ongwaye tje ri ounahepero kovanene okuvatera ovanatje vawo okutoorora omapanga omawa? (Omiano 13:20)

¹⁴ Omurari outjaine: Vatera ovanatje voye okupaha omapanga omawa. Embo ra Mukuru ri kahurura oukahu kutja omapanga  wetu maye yenene okutuhinga okutjita oviṋa oviwa poo ovivi. (Lesa Omiano 13:20.) Vanene, mamu tjiwa omapanga wovanatje veṋu? Mwa yenena okuhakaena nokukara noruveze pu na wo? Mo yenene okutjita vi okuvatera ovanatje voye kutja ve tjite omapanga ku na imba mba suvera Jehova? (1 Kor. 15:33) Okuvatera ovanatje voye kutja ve tjite omapanga omawa, mo yenene okuṋanga ovandu mbe noupanga ouwa ku na Jehova, kutja ve yekukara norupa movitjitwa pu neṱunḓu roye.—Eps. 119:63.

15. Ovanene mave yenene okuvatera vi ovanatje vawo okukara nomapanga omawa?

¹⁵ Omurumendu wena Tony wa kahurura kutja eye nomukazendu we va tjita vi okuvatera ovanatje vawo okukara nomapanga omawa. Eye wa tja: “Oure wozombura ozengi, ami nomukazendu wandje twa ṋanga ovakambure ovakwetu pekepeke, ovanene motjiwondo nomitanda poyetu. Tu rya pamwe eriro natu ungura pamwe Omerikotameneno wEṱunḓu. Imbwi omuano umwe wokutjiwa imba mba suvera Jehova nu mbe mu karera nondjoroka. Eṱe twa kara novatarere mbe varura ozombongo, ovahindwa, na varwe ovengi poyetu. Ovanatje vetu ve rihongera ko ovingi komahungi ngaave serekarere, oupyuke mbu va raisa, nokuungura oukukutu motjiungura tja Jehova. Oviṋa avihe mbi, vya vatera kutja ovanatje vetu ve tumbuke popezu na Jehova.” Vanene, kondjeye nomasa okuvatera ovanatje veṋu okukara nomapanga omawa.

16. Hapo mo tjiti vi indu omuatje tja tye kutja ke nokuvanga okukarera Jehova?

¹⁶ Hapo mo tjiti vi indu umwe wovanatje voye tja tye kutja ke nokuvanga okukarera Jehova, nandarire kehi yozongondjero azehe nḓu wa tjita? O munu kutja ozongondjero azehe nḓu wa tjita nḓo za ri omungandjo. Jehova we tu pa otjiyandjewa tjokuritoororera oveni. Auhe wetu ma yenene okutoorora kutja ma karere Jehova poo indee. Nu ihi matji kamburire mo ovanatje voye wina. Omuatje woye tja tye okuisa Jehova, kara nomaundjiro wokutja eyuva rimwe ma kotoka kouatjiri.  Zemburuka otjihorera tjomuzandu ngwa pandjara. (Luk. 15:11-19, 22-24) Omuzandu omutanda ngo wa ungura oviṋa ovivi ovingi, posi ya korusenina wa kakotoka. Tjiva mape ya ave tja: “Iho otjihorera uriri. Hapo mouatjiri otjiṋa ho matji yenene okutjitwa?” Ii matji yenene. Nu ihi tja tjitirwe komurumendu omutanda wena Elie.

17. Otjihorera tja Elie tje ku tunduuza vi?

¹⁷ Elie wa tja nai ohunga novanene ve: “Owo va ungura oukukutu okundjihonga kutja mbi suvere Jehova nEmbo re Ombeibela. Posi ya tji mba ri nozombura ape 15, mba uta okuvepirukira.” Elie wa uta okutjita oviṋa ovivi movineya, nu ovanene ve aave vanga okumuvatera okukara popezu na Jehova, posi ya kaa puratene ku wo. Tja za nokuza po ponganda, wa kauta okutjita oviṋa ovivi. Nandarire kutja pa ri nao, eye povikando tjiva aa hungire ohunga nOmbeibela ku nepanga re. Elie wa tja: “Otja tjee hungire ohunga na Jehova ku nepanga randje, mba uta okuripura tjinene ohunga na Jehova. Kouṱiṱiṱiṱi, ozondwi zouatjiri wOmbeibela nḓa ri momutima wandje, ovanene vandje nḓu va kondjisa nomasa okukuna, za uta okuhapa.” Kombunda, Elie wa kotoka kouatjiri. * Ripura uriri kutja ovanene ve va ri nondjoroka onene ndji ṱa pi kutja va kondja okumuhonga okuza kouṱiṱi we okusuvera Jehova.—2 Tim. 3:14, 15.

18. Mu noumune uṋe ohunga novanene mbe kondja oukukutu okuhonga ovanatje vawo okusuvera Jehova?

¹⁸ Vanene, eṋe mwa pewa otjiyandjewa otjiwa, tjokukurisa ovanatje mbu mave karira ovakarere va Jehova. (Eps. 78:4-6) Iho katjiungura otjipupu. Ku nao, matu mu tjere okuhepa tjinene kozongondjero zeṋu zokuvatera ovanatje veṋu okusuvera Jehova. Tji mwa kayenda komurungu okukondja okuvatera ovanatje veṋu okusuvera Jehova, nokuvehonga okukara nonḓuviro ku ye, mamu yenene okukara nongamburiro kutja Tate wetu womeyuru omunarusuvero ma kara nonyuṋe.—Ef. 6:4.