1, 2. (a) Ovakarere va Mukuru vena omaundjiro waye? (b) Otjikwaye tji matji tu vatere okuyandja ombango kondjambi yetu? (Tara kotjiperendero pomautiro worupa ndwi.)

TJIMUNA omuapostele Paulus, Ovakriste ovatwirisiwa ndino wina va pewa otjiyandjewa ‘otjihuze tjeyuru. Otjihuze hi otjo omuinyo omupe Ndjambi mbwe ve isanena.’ (Fil. 3:14) Owo ve undja nonḓero okunana puna Jesus Kristus mOuhona womeyuru, nokukara norupa mokuvatera ovandu okurira ohomonena. (Omavan. 20:6) Tjiri ingo omaundjiro omawa! Ozonḓu inḓa ozarwe zena omaundjiro warwe. Owo ve undja nonḓero okukahupa nga aruhe kombanda yehi, nu inga tjiri omaundjiro omawa!—2 Petr. 3:13.

² Paulus aa vanga okuvatera Ovakriste ovatwirisiwa kutja ve rire ovaṱakame nokutja ave ha pukisiwa. Neye wa tja ku wo: “Zemburukeye imbi vyokombanda.” (Kol. 3:2) Owo aave hepa okuyandja ombango komaundjiro wawo wokukahupa meyuru. (Kol. 1:4, 5) Okuripurira oukoto kozondaya Jehova nḓa kwizika, ku vatera ovakarere ve avehe okuyandja ombango kondjambi yawo, kutja ve  nomaundjiro wokukahupa meyuru poo kombanda yehi.—1 Kor. 9:24.

3. Paulus wa rakiza Ovakriste ovakwao ohunga nomaumba waye?

³ Paulus wina wa rakiza Ovakriste ohunga nomaumba ngu mape ya aye tjiti kutja ave ha munu ondjambi yawo. Otjotjihorera, eye wa tjanga kombongo ya Kolose ohunga nOvakriste voposyo mbaave kondjo okuritjatisa ku Mukuru mokukongorera Omatwako wa Moses, moruveze rwokukambura mu Kristus. (Kol. 2:16-18) Paulus wina wa hungira ohunga nomauzeu nge ri ko nga kundino, ngu mape ya aye tu tjaere okumuna ondjambi. Otjotjihorera, eye wa kahurura omuano wokuritjevera kozonḓuma zourunde, nomuano wokutjinda omauzeu ku novakambure ovakwetu, nouzeu meṱunḓu. Omaronga Paulus nga yandja ngo, maye yenene okutuvatera ndino. Kunao, ngatu konḓonone omaronga tjiva worusuvero Paulus nga yandja kombongo yOvakolose.

4. Ozonḓuma zetu zourunde maze tu tjaere vi okumuna ondjambi?

⁴ Indu Paulus tja za nokuzemburukisa ovakambure ovakwao ohunga nomaundjiro wawo omawa, eye wa tja: “Mamu sokukoza ozonḓuma zouye nḓe ri mu eṋe; okutja ombakirasaneno, ouhakohoke, omananukiro wonyama, ozonḓuma ozombi, noukorokope.” (Kol. 3:5) Ozonḓuma zourunde peya aze kara nomasa tjinene, naze teya oupanga wetu kuna Jehova nomaundjiro wetu woruyaveze. Omurumendu umwe omukambure ngwa tjita oruvakiro na kotoka kombongo, wa tja: “Ami mba nanenwa kouvi i omasa omahimise nu hee yenene okupoka ku vyo, nga tji pa kapitwa.”

5. Matu yenene vi okuritjevera oveni indu tji tu ri mozongaro nḓu mape ya aze tu etere oumba?

⁵ Ounahepero tjinene kweṱe okukengeza, indu tji tu ri mongaro ndji mape ya ai tu hingi kutja atu ha kongorere omirari vya Jehova. Otjotjihorera, ovandu mbu mave tarerasana nondando yokuvanga okukupasana, okuza komautiro mave sokutwapo omirari pu mave sokuyandera ohunga noviṋa tjimuna okuṱunasana, okuhupitasana poo okukara pamwe aveyerike. (Omiano 22:3) Ozongaro zarwe nḓu mape ya aze eta oumba, eendu Omukriste tja piti noviungura, poo tje ungura puna omundu ngu heri omukazendu omukwao poo omurumendu omukwao. (Omiano 2:10-12, 16) Indu tji wa kara mongaro otja indjo, ritjiukisa kutja oove Omuhongonone wa Jehova, ritjinda mongaro ombwa, nu tjiwa kutja okunyanda orombe ku eta oumba onene. Nu wina matu sokukengeza indu rumwe tji tu noruhoze momuinyo, poo tji matu rimunu ourike. Tji tu ri mozongaro otja inḓo, tu zera okupewa ombango. Nu nandarire mape ya atu zeri ombango ya varwe tjinene nga tji matu yakura ombango okuza komundu ngamwa auhe. Tji wa kara mongaro otja indji, kumba ku Jehova nu ningira ombatero okuza kovakambure ovakweṋu, kutja o ha pandjara ondjambi yoye.—Lesa Epsalme 34:18; Omiano 13:20.

6. Matu sokuzemburuka ye, indu tji matu toorora omanyando?

⁶ Tji matu vanga okukoza ozonḓuma zourunde, matu sokunakaura omanyando nge tunduuza ozongaro ozombi zomeritjindiro. Oviṋa ovingi mbi raisiwa motiivii, mbi tu lesa momambo na mbi tu puratena ko ndino, vi raisa ozongaro nḓa ri moSodom na Gomora otjikuru. (Judas 7) Ovandu mbe pitisa omanyando nga, ve munikisa ovitjitwa vyoruvakiro otjoviṋa mbi he ri ovivi, nu mbi ha eta oumba poo omuhihamo. Okutja matu sokukengeza aruhe, kutja atu ha yakura omanyando ngamwa aehe. Nungwari, matu sokutoorora omanyando nge hina okututjaera okumuna ondjambi yetu yomuinyo.—Omiano 4:23.

7. Omauzeu waye ngu mape ya atu munu mombongo?

⁷ Okurira okaṋepo kombongo yOvakriste otjiṋa tji tji eta ondjoroka. Omerihongero wEmbo ra Mukuru nge yandjwa pozombongarero zetu zombongo, nombatero norusuvero ndu tu pasana, vi tu vatera kutja tu siririke omeho wetu kondjambi. Posi yokutja, povikando tjiva mena roumune mbwa panguka poo mena rokutja umwe ka zuvire omukwao nawa, peya ombepo ombi pokati kovakambure mombongo. Tji tu ha hakahanene okuisapo omauzeu nga, mape ya aye twara komazenge.—Lesa 1 Petrus 3:8, 9.

8, 9. (a) Matu sokukara novikaṋena viṋe kutja tu mune ondjambi yomuinyo? (b) Otjikwaye tji matji tu vatere kutja tu ṱize ohange, indu omukambure omukwetu tje tu hihamisa?

⁸ Matu yenene vi okutjaera kutja omazenge aye ha tjiti kutja tu pandjare ondjambi yetu? Omuapostele Paulus wa tunduuza ombongo yOvakolose na tja: “Oweṋe otjiwaṋa tja Ndjambi otjitoororwa, nEye we mu suvera. Otji mamu sokukara notjari nounyaṋutima nomerisusuparisiro noupore nomuretima. Tjindasaneye nu mu isirasane umwe tje nombiri nomukwao. Nu mamu sokuisirasana otja Muhona punga e mu isira. Nu kombanda yaimbi avihe suverasaneye. Orusuvero ondu ri otjiwaneke tji tji mu kuta kumwe okuura.”—Kol. 3:12-14.

⁹ Okuraisa orusuvero notjari maku tu vatere kutja tu isirasane. Otjotjihorera, indu omambo poo ovitjitwa vyomukambure omukwetu tji vye tu hihamisa, matu yenene okurizemburuka noruveze eṱe wina tji twa hihamisa ovakwetu nomambo poo novitjitwa vyetu. Otjiperi kutja twa ri nondangi tjinene kutja ve tu raisira orusuvero notjari mokutuisira ozondataiziro zetu! (Lesa Omuzuvarise 7:21, 22.) Nu tjinenenene tu nondangi kotjari tja Kristus mokuwanisa Ovakriste vatjiri. (Kol. 3:15) Atuhe twa suvera Mukuru umwe, tu zuvarisa ombuze imwe, nu tu muna omauzeu omengi nge ri tjimwe. Tji matu raisa otjari nokuisira ovakwetu norusuvero, ku tjita kutja ombongo i kare nombwaneno nu ku tu vatera kutja tu siririke omeho wetu kondjambi yomuinyo.

10, 11. (a) Ongwaye eruru tji ri eta oumba? (b) Matu sokutjita vi kutja atu ha yandjere eruru okututjaera okumuna ondjambi yetu?

¹⁰ Ovihorera mbi ri mOmbeibela vi tu zemburukisa omuano eruru mu ri yenena okutuisako ombango kondjambi yetu. Otjotjihorera, Kain wa ṱeruru nomuangu we Abel, nu e mu zepa. Korak, Datan, na Abiram va ṱeruru na Moses, nu ave mu pirukire. Ombara Saul wina wa ṱeruru na David, nu wa kondja okumuzepa. Katjikumise kutja Embo ra Mukuru ri tja: “Pu pe neruru nozombata wina pe nomazunganeno nourunde ngamwa auhe.”—Jak. 3:16.

¹¹ Tji tu norusuvero notjari momitima vyetu, kamaatu kara neruru. Embo ra Mukuru ri tja: “Orusuvero ru nomuretima, ru nounyaṋutima; orusuvero karu neruru.” (1 Kor. 13:4) Kutja atu ha hara eruru momitima vyetu, eṱe matu sokukara noumune tjimuna owa Mukuru. Nu matu sokukondja okuvara ovakambure ovakwetu otjouṋepo worutu rumwe, ndu ri ombongo yOvakriste. Ihi matji tu vatere kutja tu raisasane otjari, otja komambo wOmbeibela nge tja: “Nokaṋepo kemwe tji ka yozikwa, ouṋepo auhe oukwao mau nyanda pamwe na ko.” (1 Kor. 12:16-18, 26) Kunao, pendje yokuṱira varwe eruru tji va serwa ondaya, eṱe matu yoroka puna wo. Ngatu tare kotjihorera tja Jonatan, omuatje wOmbara Saul. Jonatan kena pa ṱeruru indu David tja rira ombara. Nungwari, eye we mu zeuparisa. (1 Sam. 23:16-18) Nu hapo mape ya atu raisa otjari norusuvero tjimuna Jonatan?

12. Eronga riṋe okuza mOmbeibela ndi ma ri vatere eṱunḓu roye okumuna ondjambi?

¹² Okuṱakamisa omirari vyOmbeibela ku eta ohange nouṋingandu keṱunḓu, nu ku ve vatera okumuna ondjambi. Paulus wa yandja omaronga  yeṋe okuza mOmatjangwa komaṱunḓu moKolose? Eye wa tja: “Vakazendu, riwiseye kehi yovarumendu veṋu, otja ovakambure mu Muhona tji ve sokutjita. Varumendu, suvereye ovakazendu veṋu, nu amu kara nombeze ku wo. Vanatje, kareye nonḓuviro kovanene veṋu mu avihe, orondu tjinga ape tjata ku Muhona. Vanene, amu handjisa ovanatje veṋu, tjapo ngaave mumapara.” (Kol. 3:18-21) Otjiperi kutja ovarumendu, novakazendu, novanatje tji va ṱakamisa omaronga nga, maye vatere eṱunḓu arihe.

13. Omukazendu Omukriste ma yenene vi okuvatera kutja omurumendu we ngu heri omukambure ma ute okukarera Jehova?

¹³ Mo tjiti vi, indu tji u ri omukazendu omukambure nu u muna kutja omurumendu woye ngu heri omukambure ke ku tjindi nawa? Okuposa kuna ye mape ya aku rundurura ongaro ye po? Nangarire kutja eye wa utu okutjita atjihe tji mo vanga, hapo mape ya o tjiti kutja ma ute okukarera Jehova? Kamaape ya. Posi yokutja, tji wa raisa ondengero komurumendu woye otjotjiuru tjeṱunḓu, ove mo yenene okueta ohange meṱunḓu. Wina mo yandja ohiviro ku Jehova, nu mape ya onanene omurumendu woye komerikotameneno wouatjiri. Momuano mbwi amuyevari mamu munu ondjambi.—Lesa 1 Petrus 3:1, 2.

14. Omurumendu omukambure ma sokutjita vi indu omukazendu we ngu heri omukambure tje he mu raisire ondengero?

¹⁴ Indu tji u ri omurumendu omukambure nu  u muna kutja omukazendu woye ngu heri omukambure ke ku pe ondengero, mo tjiti vi? Hapo mape ya otjiti kutja me ku tenge indu tji mo mu rokohere, otjomuano wokumuraisira kutja oove ngu u ri otjiuru tjeṱunḓu? Kako! Mukuru u undjira ko kutja ove u hongorere eṱunḓu roye norusuvero, otja Jesus tjaa tjiti kombongo. (Ef. 5:23) Jesus u hongorera ombongo ye norusuvero nomuretima. (Luk. 9:46-48) Omurumendu omukambure tji ma horere ku Jesus, eye mape ya a tjiti kutja omukazendu we ma ute okukarera Jehova.

15. Omurumendu omukambure u raisa vi kutja wa suvera omukazendu we?

¹⁵ Jehova wa ronga ovarumendu na tja: “Varumendu, suvereye ovakazendu veṋu, nu amu kara nombeze ku wo.” (Kol. 3:19) Omurumendu ngwa suvera omukazendu we, u mu raisira ondengero mokupuratena koumune we, nokumuraisira kutja oviṋa mbi ma hungire ovinanḓengu tjinene ku ye. (1 Petr. 3:7) Nandarire kutja kaaruhe eye tji ma yenene okutjita avihe omukazendu we mbi me mu ningire okutjita, indu tja pura ondunge ku ye maku mu vatere okutoora ozondando ozombwa. (Omiano 15:22) Omurumendu ngwa suvera omukazendu we, kaṋiṋikiza omukazendu we okumutenga, nungwari u raisa otjihorera otjiwa, nu ihi tji hinga omukazendu kutja me mu pe ondengero. Omurumendu ngwa suvera omukazendu we novanatje ve, potuingi u kara neṱunḓu ndi karera Jehova nondjoroka, noro ma ri munu ondjambi yomuinyo.

16, 17. Otjomutanda, mo yenene vi okukondja kutja o ha pindikire ovanene voye?

¹⁶ Indu tji u ri omutanda nu u muna kutja ovanene voye ovakambure kave ku zuu nawa poo ve ku tjaera tjinene, mo tjiti vi? Ihi mape ya atji ku pindikisa tjinene nga tji mo utu okukeyakeya okukarera Jehova. Posi yokutja indu tji wa yandjere omapindi woye ye tjite kutja o ha karere Jehova rukwao, ove omuini mokamuna kutja kapena omundu mouye mbwi ngwe ku suvera tjiri, pendje yovanene voye Ovakriste, novakambure mombongo.

¹⁷ Ripurira ku imbi: Andakuzu ovanene voye kave roro okukuvyura tji wa tataiza, ove hapo kotjo himwa kutja owo tjiri ve rikendera kove? (Hebr. 12:8) Otjiperi kutja owo kavandu ohomonena, okutja omuano mu mave ku vyura, mape ya au ku pindikisa. Nungwari o yandja ombango komuano mu mave ku pe omavyuriro, kondja okuzuva epu ndi mave tjitire nao. Okutja kondja okuraisa oupore nu o raisa ongaro ombi pu pe heri ohepero. Embo ra Mukuru ri tja: “Ngamwa ngu nondjiviro mu ye omuini ka hungire aruhe. Omundu ngwa mwina u nozondunge, tjiri.” (Omiano 17:27) Nga rire ondando yoye okuraisa kutja oove omundu ngwe kura mongamburiro, nu ngu yakura omavyuriro nokuhina okupindika. Yandja ombango komuano omavyuriro nga mu maye ku vatere, nungwari kamomuano mu ya yandjwa. (Omiano 1:8) Okukara novanene mba suvera Jehova tjiri, ondaya onene. Owo tjiri ve nonḓero yokukuvatera kutja u kamune ondjambi yomuinyo.

18. Ongwaye tji we rirongere okukondja okuhina okuyandjera otjiṋa okukutjaera okumuna ondjambi yomuinyo?

¹⁸ Kutja tu nomaundjiro wokukahupa nga aruhe meyuru, poo moparadisa kombanda yehi, atuhe tu nomaundjiro omawa tjinene. Omaundjiro wetu tjiri maye yenenisiwa, orondu Omuute wetu ongwe tu kwizikira. Mukuru wa tja nai ohunga nOparadisa kombanda ehi: “Ehi mari ura nondjiviro ya Muhona.” (Jes. 11:9) Moruyaveze rwopopezu, ovandu avehe kombanda yehi mave kahongwa i Mukuru. Indji tjiri ondjambi ndji matu sokukondjera. Okutja yandja ombango ku imbi Jehova mbye ku kwizikira, nu o yandjere otjiṋa okukupukisa!