Hapo ove u unda mu Jehova?
“Muhona ma kutura imba mbe Mu karera; imba mbe unda mu Ye kamaave pewa ko ondjo.”—EPS. 34:22.
OMAIMBURIRO: 49, 32
1. Ourunde u tjita kutja ovakarere va Mukuru ovengi ve kare noumune uṋe?
OVAKARERE va Mukuru ovengi va hungira otjomuapostele Paulus ngwa tja: “Tjiri, owami omundu ngu mba ningisa ondjenda!” (Rom. 7:24) Ongwaye tji tu kara noumune otja imbo? Mena rokutja nangarire kutja tu vanga okutjita imbi mbi tjata ku Jehova, atuhe twa rumata ouvi nouhahomonena. Kunao, tu yenena okurihahiza poo okuningisa ondjenda tji tu ha tjitire ombango ya Jehova. Ovakambure tjiva mba tjita ourunde ounene ve muna kutja Mukuru kamaa yenene okuveisira.
2. (a) Epsalme 34:22 ri raisa vi kutja ovakarere va Mukuru kave nokuhepa okurivera? (b) Matu kerihonga tjike morupa ndwi? (Lesa okaongo nga, “ Oviṋa mbi matu rihongere ko, poo omaheero woviṋa ovinene?”)
2 Posi yokutja, Ombeibela i tu pa ongamburiro kutja tji twa undu mu Jehova, katu nokuhepa okurivera. (Lesa Epsalme 34:22.) Hapo okuunda mu Jehova ku heya tjike? Omikambo viṋe mbi matu sokutoora kutja tu mune otjari nondjesiro ya Jehova? Omaziriro komapuriro ngo matu ye munu, tji twe rihongo ohunga novihuro vyomaundiro mbya ri mu Israel otjikuru. Otjiperi kutja ondyero ndjo ya zikamisiwa kehi yOmatwako womerikutiropamwe, nga pingenisiwa na warwe poPentekoste yombura ndji 33 O.Z. Posi yokutja, atu zembi kutja Omatwako ngo ya zire ku Jehova. Kunao, ondyero yovihuro vyomaundiro, mai tu hongo kutja Jehova u noumune uṋe ohunga nouvi, novarunde, na imba mbe ritanaura komauvi wawo. Rutenga ngatu tare kutja ondando yovihuro mbi ya ri oyatjike, nokutja aavi ungurisiwa ku ye.
“TOOROREYE OVIHURO VYOMAUNDIRO”
3. Ovaisrael aave tjiti vi komundu ngwa zepa omukwao owina?
3 Jehova aa yandja ko ombango tjinene indu omundu tja zepewa. Indu Omuisrael tja zepa omukwao owina, omuzamumwe wopopezu womundu ngwa zepewa, ngwaa tjiukwa otja “omusutise wombinḓu,” aa sokumuzepa. (Num. 35:19) Momuano mbwi, omundu ngwa zepa omukwao aa sutu nomuinyo we omuini. Indu omuzepe tje ha hakahanene okuzepewa, aaku zunḓa Ehi Ekwizikwa, poo kaa ri varwa otjehi eyapuke rukwao. Orondu Jehova wa tja: “Tji mwa tjiti nai, indino mamu yamburura ehi ndi mu mwa tura. Omazepero ye yamburura ehi.”—Num. 35:33, 34.
4. Ovaisrael aave tjiti vi indu omundu tja zeperere omukwao?
4 Nu hapo Ovaisrael aave tjiti vi indu omundu tja zeperere omukwao? Nangarire kutja katjitire owina, omuzepe ngwi ngunda wa ri nondjo yokutirahi ombinḓu yomuhinandjo. (Gen. 9:5) Posi yokutja, aa raisirwa otjari mokuyandjerwa okutaurira ku tjimwe tjovihuro vyomaundiro, kutja omusutise wombinḓu e he mu zepa. Ingo aa yenene okukamuna ko ondjeverero. Eye aa sokukara motjihuro tjomaundiro ho, nga omupristeri omunene tja ṱu.—Num. 35:15, 28.
5. Ondyero yovihuro vyomaundiro mai tu vatere vi okutjiwa Jehova nawa?
5 Ondyero yovihuro vyomaundiro kari ondunge yovandu. Jehova omuini ongwa rakiza Josua kutja ma raere nai kOvaisrael: “Toororeye ovihuro vyomaundiro.” Ovihuro vyomaundiro vya ri ovihuro mbya ‘toororwa.’ (Jos. 20:1, 2, 7, 8) Mena rokutja oJehova omuini ngwa toorora ovihuro mbi komaungurisiro wapeke, mape ya atu pura kutja: Ondyero ndji mai tu vatere vi okukara noumune ousemba ohunga notjari tja Jehova? Nu mavi tu hongo tjike ohunga nomuano mbu matu yenene okuunda mu ye ndino?
EYE NGA ‘KASEREKARERE KOVANANE VOTJIHURO IMBI MBYA TJITWA’
6, 7. (a) Kahurura kutja ovanane votjihuro ve notjiungura tjaye indu tji mave pangura omundu ngwa zeperere omukwao. (Tara kotjiperendero pomautiro worupa ndwi.) (b) Ongwaye tja ri omukambo wounongo komutaure okuyenda kovanane votjihuro?
6 Omuisrael tja zeperere omundu, eye aa sokutaurira kotjihuro tjomaundiro “na kaserekarera kovanane votjihuro imbi mbya tjitwa.” Neye aa sokuyakurwa nawa. (Jos. 20:4) Oruveze oruṱiṱi kombunda yanao, eye aa hindwa rukwao kovanane votjihuro ka zepera omundu, nu ovanane mbo aave sokupangura otjiposa. (Lesa Numeri 35:24, 25.) Indu ovanane votjihuro tji va tjivisa kutja eye tjiri kazepere omundu ngo owina, omutaure ngwi otjaa yenene okuyaruka kotjihuro tjomaundiro.
7 Ongwaye ovanane votjihuro tji va ri norupa motjiposa? Owo aave sokuṱiza ombongo ya Israel oukohoke, nokuvatera omundu ngwa zeperere omukwao kutja ma mune ouwa motjari tja Jehova. Omukonḓonone umwe wOmbeibela wa tja, indu omutaure tje ha ire kovanane votjihuro, “aaku hee oumba ounene ku ye.” Eye komurungu wa tja: “Eye ma kara nondjo konḓiro ye omuini indu tje ha ungurisire ondjeverero Mukuru ndje mu pe.” Ombatero opu ya ri komundu ngwa zeperere omukwao, posi yokutja eye aa sokupaha ombatero ndjo nokuiyakura. Indu tje ha kapahere omaundiro mu tjimwe tjovihuro Jehova mbya toorora, omuzamumwe wopopezu womundu ngwa zepa wa ri nouyara wokumuzepa.
8, 9. Ongwaye Omukriste ngwa tjiti ourunde ounene tji ma sokukapaha ombatero kovanene vombongo?
8 Kundino, omukambure ngwa tjiti ourunde ounene, ma sokupaha ombatero yovanene vombongo kutja ma ṱune oupanga we kuna Jehova. Ongwaye okutjita nao tje ri otjiṋa otjinanḓengu? Rutengatenga, ondyero yokutja ovanene vombongo ombu mave sokupangura ovitjitwa vyourunde ounene, ya za ku Jehova otja Embo re tji ri raisa. (Jak. 5:14-16) Otjitjavari, ondyero ndji i vatera kutja imba mba katuka ve kare mondjeverero ya Mukuru nu ve ise okutjita ouvi. (Gal. 6:1; Hebr. 12:11) Otjitjatatu, ovanene vombongo va toororwa nokuhongwa kutja ve vatere imba mba katuka nu mbe ritanaura okuwisa omitima vyawo pehi, nokuvevatera kutja ave he rivere oveni nokuisapo omuhihamo wawo. Jehova u vara ovanene vombongo mbe raisa ongaro ndji, ‘otjomaundiro kotjivepo tjombura.’ (Jes. 32:1, 2) Hapo ko nakuitavera kutja ondyero ndji i raisa otjari Mukuru tje na tjo na eṱe?
9 Ovakarere va Mukuru ovengi va muna ouwa mbu za mokupaha ombatero kovanene vombongo. Okutara kotjihorera, omurumendu omukambure wena Daniel, wa tjita ourunde ounene, nungwari oure womieze omingi eye aa tira okuyenda kovanene vombongo. Eye wa tja: “Kombunda yoruveze orure, ami ee ripura kutja kape notjiṋa ovanene vombongo nai tji mave yenene okutjita. Posi yokutja, ami aruhe ee tira kutja ovandu varwe mave utu okutjiwa ohunga nouvi wandje. Nu ee munu kutja tji me kumbu ku Jehova me sokuuta ongumbiro aihe nondjesiro ku ye.” Korusenina, Daniel wa paha ombatero yovanene vombongo. Nu tji me ripurire koviṋa avihe mbi, eye wa tja: “Otjiperi kutja ee tira okuyenda ku wo. Nungwari tji mba za nokuyenda ku wo, ya ri tjimuna pe nomundu ngwa isako omutwaro omuzeu koviṱuve vyandje. Nai mbi muna kutja me yenene okukumba ku Jehova nokuhina otjiṋa tji matji ndji tjaere.” Kundino Daniel u nomeritjiviro omawa womomutima, nu nai wa za nokuzikwa otjomuvatere wombongo.
“EYE MA SORA OKUTAURIRA KU TJIMWE TJAVYO”
10. Omundu ngwa zeperere omukwao aa sokuhakahana okutjita vi?
10 Omundu ngwa zeperere omukwao aa sokutjita otjiṋa, kutja ma ṱirwe otjari. Eye aa sokutaurira kotjihuro tjomaundiro tji tji ri popezu na ye. (Lesa Josua 20:4.) Kamaatu undjire ko kutja mape ya a ha yandja ombango, orondu okuvaza kotjihuro ho tjimanga nokukara mo, ootjiṋa atjiyerike tjatja tji yama omuinyo we! Aaku hepa ozongondjero ozonene ku ye. Eye aa sokuisa oviungura vye, nondjuwo ye, nu kari nouyara wokuryanga, nga omupristeri omunene tja ṱu. * (Num. 35:25) Posi yokutja kari omungandjo. Indu omutaure ngwi tja piti motjihuro tjo, eye atja raisa kutja kena konatja poo ke nomuhihamwatima nombinḓu ndja tirahi, nu omuinyo we omuini atja u kara moumba.
11. Omukriste ngwe ritanaura tjiri, ma yenene vi okuraisa kutja u nondangi tjinene kotjari tja Mukuru?
11 Omundu ngwa tjiti ourunde ounene ndino wina ma sokutjita otjiṋa, tji ma vanga kutja Mukuru me mu ṱire otjari. Matu sokuisa ongaro ngamwa aihe yourunde. Nu matu sokupoka kourunde ounene, na imbwi ouṱiṱi wina, mbu mape ya au tu hingi okukatjita imbwi ounene. Omuapostele Paulus wa hingwa i ombepo ondjapuke okukahurura ovitjitwa vyOvakriste moKorinte, mbe ritanaura komauvi wawo. Eye wa tja: “Tareye ihi oruhoze tji rwa tjita ku eṋe otja kombango ya Ndjambi: Orwo rwa pendura oupyuke mu eṋe okurundurura oviṋa, nonḓero yokuraisa okuhinandjo kweṋu, nokupindikira ingwi ngwa rira omunandjo, nemuma komazenge wandje, nonḓero yokundjimuna, nongondjero yeṋu yokuvera ingwi ngu nondjo.” (2 Kor. 7:10, 11) Tji twa tjiti ozongondjero zomasa kutja tu ise ongaro yourunde, tu raisira Jehova kutja katu tjaterwa i ongaro yourunde mu tu ri, nokutja tu nondangi tjinene kotjari tje.
12. Ovikeṋa Omukriste mbi ma hepa okupoka ko kutja Mukuru ma yenene okumuṱira otjari?
12 Ovikeṋa Omukriste mbi ma sokupoka ko, tji ma vanga kutja Jehova me mu raisire otjari? Eye ma sokupoka koviṋa nandarire mbya suvera tjinene, tjinangara mavi tjiti kutja ma katjite ourunde. (Mat. 18:8, 9) Omapanga woye tjiva tji yekuhinga okutjita oviṋa mbi ha tjata ku Jehova, hapo mo teya oupanga kuna wo? Tjinangara ku rira ouzeu kove okuritjaera okunwa otjikariha tjinene, hapo mo nakaura ozongaro nḓu mape ya aze ku twa momarorero wokunwa tjinene? Tji ku rira ouzeu kove okuritjaera kozonḓuma zoruvakiro, hapo u nakaura ozomuvi, notungovi poo ovitjitwa mbi mape ya avi tjiti kutja u hare omeripura omahakohoke? Tjiwa kutja ozongondjero ngamwa azehe nḓu mo tjiti kutja u ṱakame ku Jehova, kamungandjo. Okumuna kutja Jehova we kwesa, tjiri otjiṋa otjivi tjinene. Nu otjiṋa otjikovise okukara ‘morusuvero rwe nga aruhe.’—Jes. 54:7, 8.
MA “HENE KOMURUMENDU NGU MA VANGA OKUMUSUTISA”
13. Kahurura kutja ongwaye omutaure tjaa yenene okukara mondjeverero nondjoroka motjihuro tjomaundiro.
13 Omutaure tja vaza motjihuro tjomaundiro, eye wa ri mondjeverero. Jehova wa tja nai ohunga novihuro vyomaundiro: “Omundu ngwa zeperere omukwao ma yenene okutaurira ku vyo.” (Jos. 20:2, 3) Jehova kaa undjire ko kutja omuzepe ma pangurwe rukwao kotjiposa otjingetjo, nu omusutise wombinḓu wina kaa yandjerwa okuhita motjihuro tjomaundiro kutja ma zepe omutaure ngwi. Kunao, omutaure kaa hepa okutira okuzepewa. Eye ngunda e ri motjihuro hi, wa ri kehi yondjeverero nondjamo ya Jehova. Otjihuro hi katja ri otjovakamburwa. Eye ngunda e ri mu tjo aa yenene okuungura, nokuvatera varwe nu aa yenene okukarera Jehova mohange. Eye aa yenene okukara nehupo ewa rondjoroka!
Kara nongamburiro kutja Jehova me ku isire (Tara koparagrafa 14-16)
14. Omukriste ngwe ritanaura komauvi we ma yenene okukara nongamburiro yaye?
14 Ovakarere va Mukuru ovengi mba tjita ourunde ounene nu mbe ritanaura komauvi wawo, ve rimuna otjovandu mbe ri motjovakamburwa mena rokurivera oveni. Tjiva nangarire ve muna kutja Jehova kamaa roro okuzemba ouvi mbu va tjita. Tji u noumune otja imbwi, arikana tjiwa kutja indu Jehova tje ku isire, eye u isira tjiri! Ko nakuhepa okurivera rukwao. Daniel ngwa tamunwa rukuru, wa muna kutja imbwi ouatjiri. Indu ovanene vombongo tji va za nokumuvyura nokumuvatera okuhara omeritjiviro omawa womomutima, eye wa tja: “Ami hee hepa okurivera rukwao. Ouvi tji wa kapita, tjiri wa kapita. Otja Jehova pa heya, eye u isapo omauzeu woye aehe nu u ye yumba kokure na ove. Ove ko nakuhepa okuyemuna rukwao.” Omutaure tja hiti motjihuro tjomaundiro, eye kaa hepa okuripurira komusutise wombinḓu. Momuano otjingewo, Jehova tja isire omauvi wetu, eṱe katu nakuhepa okutira kutja mape ya a paha omuano wokutupangura poo okutuverera omauvi ngo rukwao.—Lesa Epsalme 103:8-12.
15, 16. Otjihako tja Jesus otjOmukuture notja Omupristeri Omunene, matji ku pe vi ongamburiro motjari tja Mukuru?
15 Eṱe tu nepu ewa ndi matu sokukarera nongamburiro motjari tja Jehova. Paulus tja za nokuraisa kutja eye omundu ngwa ningisa ondjenda mena rokuhina okuṱakama nawa momirari vya Jehova, eye wa tja: “Okuhepa uri ku Ndjambi! Eye u tjita nai mu Jesus Kristus oMuhona wetu!” (Rom. 7:25) Hapo Paulus aa hee tjike? Nangarire kutja aa kondjo nozonḓuma zouvi, nozondataiziro nḓa tjita morukapitaveze, eye wa ri omundu ngwe ritanaura komauvi we. Kunao wa ri nongamburiro kutja Mukuru me mu isire mena ra Jesus. OtjOmukuture wetu, Jesus u kohorora omeritjiviro wetu womomutima nu u tupa ohange momuinyo. (Hebr. 9:13, 14) Nu otja Omupristeri wetu Omunene, eye “otje nomasorero, nambano na aruhe, okuyama imba mbe ya ku Ndjambi mena re, Eye tjinga e nomuinyo nga aruhe okuveyarikaṋena ku Ndjambi.” (Hebr. 7:24, 25) Moruveze orukuru, omupristeri omunene aa vatere Ovaisrael okukara nongamburiro kutja Jehova ma isire omauvi wawo. Nu okukara na Jesus otjOmupristeri wetu Omunene, wina maku tu pe ongamburiro yokutja ‘matu kapewa ounyaṋutima nu matu kamuna otjari okuvaterwa moruveze orusemba.’—Hebr. 4:15, 16.
16 Okutja tji matu vanga okuunda mu Jehova, eṱe matu sokuraisa ongamburiro mombunguhiro ya Jesus. O yakura uriri kutja ombunguhiro ya Jesus poo otjisuta tje tjonguturiro tji vatera ovandu ovengi. Nungwari wina kara nongamburiro kutja matji ku vatere. (Gal. 2:20, 21) Kara nongamburiro kutja Jehova u isira omauvi woye mena rotjisuta tjonguturiro hi. Kara nongamburiro kutja otjisuta tjonguturiro tji kupa omaundjiro womuinyo waaruhe. Ombunguhiro ya Jesus, otjiyandjewa Jehova tja yandja kove.
17. Ongwaye tji mo vanga okuunda mu Jehova?
17 Ovihuro vyomaundiro aa vi raisa kutja Jehova u notjari. Ondyero ndjo aai raisa kutja omuinyo otjiṋa otjihuze, nu i raisa omuano ovanene vombongo mu ve tu vatera. Oyo wina aai raisa kutja okuritanaura tjiri ku heya tjike, nokutja ongwaye tji matu yenene okukara nongamburiro kutja Jehova me tu isire tjiri. Hapo ove u unda mu Jehova? Kape noruveze rwarwe orusemba okuunda mo! (Eps. 91:1, 2) Morupa ndu maru kongorere ko, matu katara kutja ovihuro vyomaundiro mavi tu vatere vi okuhorera komuano Jehova ma raisa otjari nousemba.
^ par. 10 Otja kovakonḓonone vOvajuda, pe munika aayo eṱunḓu romutaure ngwi aa ri tjindire kotjihuro tjomaundiro kutja ri yekukara puna ye.
