OZOMBUNGUHIRO za ri orupa orunanḓengu momerikotameneno wouatjiri. Ovaisrael aave yandja ozombunguhiro zovinamuinyo, nu Ovakriste aave tjiukirwa ‘kombunguhiro yondangero.’ Posi yokutja pe nozombunguhiro zarwe Mukuru nḓe yakura. (Hebr. 13:15, 16) Ozo ze eta ondjoroka nozondaya, otja tji matu kamuna movihorera mbi mavi kongorere mba.

Hana, ngwa ri omukarere wa Mukuru omuṱakame woruveze orukuru, aa vanga omuatje omuzandu tjinene, posi yokutja kaa yenene okupanduka. Eye wa kumba ku Jehova na tjiti oruyano ku ye kutja tje mu pe omuatje omuzandu, eye ‘me mu yapurire ye oure womuinyo we auhe.’ (1 Sam. 1:10, 11) Kombunda yoruveze Hana wa rira otjingundi, na panduka omuatje omuzandu wena Samuel. Hana tja za nokuisako Samuel komaihi, we mu twara kondanda yomaturiro, otja pa kwizika. Jehova wa sera Hana ondaya mena rombepo ye yomeriyandjerero. Eye wa muna ondjingonekero yokupanduka ovanatje varwe 5, nu Samuel wa rira omuprofete nomutjange wOmbeibela.—1 Sam. 2:21.

Tjimuna Hana na Samuel, Ovakriste ndino ve nondjingonekero yokuungurisa omiinyo vyawo motjiungura tjOmuute wawo. Jesus wa kwizika kutja matu serwa ondaya kozongondjero ngamwa azehe nḓu matu tjiti momerikotameneno wetu ku Jehova.—Mar. 10:28-30.

Meserewondo etenga, pa ri omukazendu Omukriste wena Dorkas ngwaa tjiukwa otjomundu ngwaa “tjiti oviungura oviwa nokuvatera ovasyona.” Nu ouhumandu eye “otja vera na koka,” nu ihi tja eta oruhoze kombongo. Ovahongewa tji va zuva kutja Petrus u ri popezu, owo ve mu ningira kutja ma hakahane okuya. Ripura uriri kutja va ri nondjoroka onene pu pe ṱa pi indu Petrus tje ya na pendura Dorkas! Indji oombendukiro ondenga ndja tjangwa mOmbeibela nu ndja tjitwa i omuapostele. (Oviung. 9:36-41) Mukuru kena pa zemba oviungura vya Dorkas. (Hebr. 6:10) Ehungi re ra tjangwa mEmbo ra Mukuru otjotjihorera otjiwa ku eṱe okuhorera ko.

Omuapostele Paulus wina wa raisa otjihorera otjiwa tjomundu ngwaa yandja oruveze nombango ye ku varwe. Indu tja tjanga orutuu kovakambure ovakwao moKorinte, eye wa tja: “Ami itje vanga okuyandja avihe mbi mbi na vyo, nangarire imbwi omuinyo wandje porwawo, kokutja mbi mu vatere.” (2 Kor. 12:15) Eye we rihonga kutja okutjita ozongondjero mena rovakweṋu ku eta ondjoroka. Nu otjinanḓengu tjinene, ku tjita kutja tu yakurwe nokuserwa ondaya i Jehova.—Oviung. 20:24, 35.

Ihi otjiraisiro otjikahu kutja, Jehova u tjaterwa tji matu ungurisa oruveze nomasa wetu mena rOuhona we, na tji matu vatere ovakambure ovakwetu. Nu hapo pe nomiano vyarwe mu matu yenene okuyandja oruvara koviungura vyokuzuvarisa Ouhona wa Mukuru? Ii, opu vi ri! Eṱe wina matu yenene okuyozika Mukuru mokuyandja oviyandjewa vyouharupu. Ovyo vi ungurisiwa okuvatera noviungura vyokuzuvarisa vyouye auhe, nokuvatera ovahindwa na varwe mbe ungurira Jehova oruveze aruhe. Ovyo wina vi vatera okurongerisa nokutoroka omambo nozovidio, nokueta ombatero tji kwa tjitwa oumba. Nu wina vi vatera momatungiro wOmatuwo wOmerikotameneno. Matu yenene okukara nongamburiro kutja “ondaya i undja omundu ngu notjari.” Nu kombanda yanao, tji matu yandja oviṋa vyetu ovinanḓengu ku Jehova, tu mu yozika.—Omiano 3:9; 22:9.