1. Ovikwaye Jesus mbya rakiza ovahongewa ve okutjita mu Mateus 28:18-20?

JESUS tja za nokupendurwa eye we rimunikisa kovahongewa ve moGalilea. Eye aa vanga okuveraera otjiṋa otjinanḓengu. Otjikwaye tjaa vanga okuveraera? Omambo we ngo ye ri mu Mateus 28:18-20.—Lesa.

2. Matu katara komapuriro yeṋe?

² Erakiza ra Jesus rokukaisapo ovandu ovahongewa wina ri kamburira mo ovakarere va Mukuru avehe ndino. Kunao, ngatu tare komapuriro yetatu ohunga nerakiza Jesus nde tupa. Etenga, ovikwaye vyarwe mbi matu sokutjita pendje nokukaisapo ovandu ovahongewa? Oritjavari, ovazuvarise avehe mombongo mave vatere vi ovahongwa vOmbeibela okukurisa oupanga wawo kuna Jehova? Nu epuriro oritjatatu, matu vatere vi ovakambure ovakwetu mba isa okupita motjiungura tjokuzuvarisa kutja ve pite rukwao motjiungura tjokuzuvarisa?

3. Ovikwaye Jesus mbya tamuna merakiza re?

³ Omarakiza wa Jesus omakahu. Eṱe matu sokuhonga ovandu oviṋa eye mbya rakiza. Posi yokutja, wina matu sokuyandja ombango kotjiṋa tjimwe otjinanḓengu. Jesus ka tjere, ‘Ve hongeye oviṋa avihe mbi mbe mu raera.’ Nungwari wa tja, ve hongeye “okuṱakamisa oviṋa avihe mbi mbe mu raera.” Kutja tu ṱakamise erakiza ra Jesus ndo eṱe matu sokuhonga ovahongwa vetu oviṋa mbi mave sokutjita, nu wina okuveraisira kutja omomuano uṋe mu mave yenene okuvitjita. (Oviung. 8:31) Ongwaye tji twa sokutjita nao?

4. Kahurura kutja mo hongo vi omuhongwa woye okuṱakamisa erakiza ra Kristus.

 ⁴ Embo ndi “okuṱakamisa” ri heya okukara nonḓuviro. Okuvatera omundu okuṱakamisa poo okukara nonḓuviro kerakiza ra Kristus, ripura notjihorera hi. Hapo omundu u honga vi omundu warwe ngu ma vanga okuhinga ohauto, okuṱakamisa ozoveta zondjira? Rutenga omuhonge u mu raera ozoveta zondjira. Posi yokutja, kutja ma vatere omuhongwa we okuṱakamisa ozoveta nḓo eye ma sokutjita otjiṋa tjarwe. Omuhonge ma sokuhinga pu nomuhongwa we, kokutja me mu raisire omuano mu ma yenene okuungurisa oviṋa mbye rihongo. Matu rihongo tjike okuza kotjihorera tjo?

5. (a) Otja ku Johanes 14:15 na 1 Johanes 2:3, ovikwaye mbi matu sokuhonga ovahongwa vetu vOmbeibela okutjita? (b) Yandja ovihorera vyomuano mu matu yenene okuhonga ovahongwa vetu.

⁵ Indu tji matu hongo ovandu Ombeibela, tu ve honga oviṋa Mukuru mbye undjira ko kweṱe. Posi yokutja pe noviṋa vyarwe mbi matu sokutjita. Eṱe matu sokuhonga ovahongwa vetu vOmbeibela okuṱakamisa oviṋa mbi mave rihongo mehupo rawo. (Lesa Johanes 14:15; 1 Johanes 2:3.) Otjotjihorera, matu yenene okuveraisira omuano wokuṱakamisa omirari vyOmbeibela poskole, poviungura poo potuveze twarwe. Nu eṱe matu yenene okuveraera ohunga notjiṋa tji tja tjitwa kweṱe nokutja okuṱakamisa omirari vyOmbeibela kwetu tjevera vi, poo kwetu vatera vi okutoora omukambo omusemba. Nu indu tji tu ri pu novahongewa vetu, eṱe matu yenene okukumba ku Jehova kutja ombepo ondjapuke i ve hongorere po.—Joh. 16:13.

6. Ovikwaye vyarwe mbi matu sokutjita indu tji matu raere ovahongwa okuṱakamisa omatwako wa Jesus?

⁶ Ovikwaye mbi matu sokutjita indu tji matu hongo ovahongwa vetu okuṱakamisa omatwako wa Jesus? Eṱe matu sokuvatera ovahongwa vetu kutja ve kare nonḓero yokuvanga okuzuvarisa ku varwe. Ovahongwa tjiva mape ya ave tira okuzuvarisa. Kunao matu sokukara nomuretima nawo otja tji matu ve vatere okuzuva ouatjiri wOmbeibela nawa, kutja ve kare nongamburiro yomasa. Nu iho mape ya atji tjiti kutja ve vange okuzuvarisa. Hapo ovikwaye mbi matu yenene okutjita okuvatera omuhongwa kutja ma kare nonḓero yokuvanga okuzuvarisa ombuze ombwa ku varwe?

7. Omomuano uṋe mu matu vatere omuhongwa okukara nonḓero yokuzuvarisa ombuze ombwa ku varwe?

⁷ Eṱe matu yenene okupura omuhongwa wetu wOmbeibela omapuriro otja inga: “Omomuano uṋe Ombeibela mu ye ku vatera okurundurura ehupo roye? Hapo mo munu kutja varwe mave hepa okuzuva ombuze ndji? Ovikwaye mbi mo yenene okutjita okuvevatera?” (Omiano 3:27; Mat. 9:37, 38) Raisira omuhongwa oumbapira mbu ri mOviungurisiwa vyetu vyOkuhonga, nu okuzambo ma toorore kutja oouṋe mbu ma yenene okuyandja kovazamumwe ve, omapanga poo ovandu mbu ve ungura pamwe. Mu raisira omuano mu ma yenene okuyandja oumbapira mbo momuano omuwa. Indu omuhongwa wetu tja rire omuzuvarise ngu hiya papitisiwa, eṱe matu hepa okuzuvarisa puna ye kutja tu mu vatere.—Omuzuv. 4:9, 10; Luk. 6:40.

8. Ongwaye tje ri ounanḓengu kovahongwa vetu okukurisa orusuvero rwawo ku Mukuru novandu varwe? (Wina lesa okaongo nga “ Vatera omuhongwa woye okukurisa orusuvero rwe ku Mukuru.”)

⁸ Ngatu zemburuke kutja Jesus we tu rakiza okuhonga varwe “okuṱakamisa oviṋa avihe” eye mbya rakiza. Imbi vi kamburira mo okusuvera Mukuru novandu, nge ri omatwako yevari omananḓengu. Omatwako nga ye hitasana notjiungura tjokuzuvarisa nokukaisapo  ovandu ovahongewa. (Mat. 22:37-39) Omomuano uṋe? Orusuvero rwetu ku Mukuru na kovandu ru tu hinga okukara norupa motjiungura tjokuzuvarisa. Posi yokutja, ovahongwa tjiva vOmbeibela mape ya ave tira okupita motjiungura tjokuzuvarisa. Eṱe matu yenene okuvepa omasa kutja Jehova ma yenene okuvevatera kutja ave ha tira ovandu rukwao. (Eps. 18:1-3; Omiano 29:25) Okaongo ku ke ri morupa ndwi make kahurura omiano mu matu yenene okuvatera ovahongwa vetu okusuvera Mukuru tjinene. Nu wina kutja ombongo mai vatere vi ovahongwa ovape okuraisa orusuvero?

9. Omomiano viṋe omuhongwa mu ma yenene okurihonga omapu omananḓengu, motjihorera tjomuhongwa ngu me rihongo okuhinga?

⁹ Ripura rukwao notjihorera tjomuhongwa ngu me rihongo okuhinga. Otja tji ma hingi mokati kozohauto zarwe pu nomumuhonge, omomiano viṋe omuhongwa mu me rihongo? Omokupuratena komumuhonge nokutara kovahinge varwe. Otjotjihorera, omumuhonge ma yenene okuurikira omuhongwa omuano omuhinge warwe mu ma yandjere varwe okuhinga komurungu we. Poo ma yenene okumuurikira omuhinge ngu ma wisa omarambe pehi kokutja i rire oupupu kovahinge varwe okumuna. Ovihorera otja imbyo mavi vatere omuhongwa okurihonga omapu omananḓengu ngu ma yenene okuungurisa indu tja utu okuhinga.

10. Ovikwaye mbi mavi vatere omuhongwa okurira omuhongewa?

¹⁰ Momuano otjingewo, omuhongwa ngwa utu okukarera Jehova eye ke rihongere okuza komuhonge we uriri, posi yokutja u rihongera okuza kovihorera oviwa vyovakarere va Jehova. Kunao, otjikwaye tjinene tji matji vatere ovahongwa vOmbeibela okurira ovahongewa? Okuyenda kozombongarero zombongo. Ongwaye? Oviṋa mbi mave zuu pozombongarero zombongo mavi ve vatere kutja ve rihonge ovingi, ve kurise ongamburiro yawo nokuvevatera kutja orusuvero rwawo ku Mukuru ru kurire ko. (Oviung. 15:30-32) Nu imbo, omuhongwa wOmbeibela ma yenene okuhakaena ku novakambure mbe ri mongaro tjimuna indji oye. Nu ma munu ovihorera oviwa vyovakambure mbu mave raisa orusuvero mombongo. Tara kovihorera mbi mavi kongorere mba.

11. Ovihorera viṋe omuhongwa mbi ma yenene okumuna mombongo, nu otjiṋa hi matji ṱunu vi komuhongwa?

¹¹ Omuhongwa wOmbeibela omukombe nu ngu novanatje ma munu omukazendu ngu ri mongaro eye me ri. Tjiri omuhongwa ma tjaterwa okumuna ozongondjero omukazendu omukambure nḓe tjita okuya kozombongarero zombongo pu novanatje ve. Omuhongwa wOmbeibela warwe ngu kondja okuisa okupepa omakaya, wa hakaene ku nomuzuvarise ngwa ri mongaro eye me ri nu ngwa isa omakaya. Omuzuvarise ma raere omuhongwa omuano orusuvero rwe ku Jehova mu rwe mu hinga kutja ma kare nonḓuviro komarakiza wa Mukuru. (2 Kor. 7:1; Fil. 4:13) Kombunda yokuraera omuhongwa omuano eye ma isa omakaya, eye we mu raera kutja, “Ove wina mo yenene okuisa omakaya.” Omuhongwa wa tunduuzwa nu u nongamburiro kutja ma yenene okutjita nao wina. Omukazendu omutanda ngu rihonga Ombeibela ma munu omuano omukazendu omukambure omutanda me yorokera ehupo re otja umwe wOvahongonone va Jehova. Nu omuhongwa wOmbeibela ma vanga okukara nondjoroka tjimuna ye.

12. Ongwaye tji matu yenene okutja omundu auhe mombongo ma yenene okutjita otjiṋa okuvatera ovahongwa vOmbeibela?

¹² Indu omuhongwa wOmbeibela tja tjiwa ovazuvarise pekepeke ovaṱakame, ku mu vatera okutjiwa kutja ku heya ye okukara nouṱakame kerakiza ra Jesus rokusuvera Mukuru novandu. (Joh. 13:35; 1 Tim. 4:12) Tjimuna tji pa tamunwa rukuru, omuhongwa wOmbeibela  ma yenene okurihongera okuza kovazuvarise mbe ri mongaro eye me ri. Otja omuhongwa tji me rihongere okuza kovihorera mbi, eye ma utu okumuna kutja eye ma yenene okutjita omarundurukiro ngu maye heperwa po okurira omuhongewa wa Kristus. (Deut. 30:11) Auhe mombongo ma yenene okukara norupa mokuvatera omuhongwa wOmbeibela okurira omuhongewa. (Mat. 5:16) Hapo ove u tjita ozongondjero zeṋe okutunduuza ovahongwa vOmbeibela mbe ya kozombongarero zombongo?

13-14. Jesus wa tjinda vi ovaapostele ve mba wire momuinyo?

¹³ Matu vanga okuvatera ovakambure ovakwetu mba wa mongamburiro okuuta okuzuvarisa rukwao nokukaisapo ovandu ovahongewa. Omuano Jesus maa tjinda ovaapostele ve mba wire momuinyo, matji tu raisire kutja omomuano uṋe eṱe mu matu yenene okutjita nao ndino.

¹⁴ Komurungu yonḓiro ya Jesus ‘ovahongewa ve avehe ve mu esa nave tupuka.’ (Mar. 14:50; Joh. 16:32) Jesus wa tjinda vi ovaapostele ve indu tji va wire momuinyo? Katjisupi kombunda yombendukiro ye, Jesus wa raera ovemukongorere ve tjiva kutja, “Amu tira! Twendeye mu karaere ovangu vandje” kutja mba pendurwa. (Mat. 28:10) Jesus ka nakaurire ovaapostele ve. Nandarire kutja owo ve mu nakaura, eye we ve isana “ovangu vandje.” Tjimuna Jehova, Jesus wa ri nondjenda nu aa isire.—2 Ozomb. 13:23.

15. Eṱe tu noumune uṋe ohunga na imba mba isa okuzuvarisa?

¹⁵ Eṱe wina tu rikendera na imba mba isa okuzuvarisa. Owo ovakambure ovakwetu nu twe ve suvera. Eṱe ngamba tu zemburuka oviungura ovikukutu ovakambure mbi va ungurira Jehova, nu tjiva va ungura oukukutu oure wozombura ozengi. (Hebr. 6:10) Eṱe tjiri tu zera okuvemuna. (Luk. 15:4-7) Tjimuna Jesus, omomiano viṋe mu matu ve raisire kutja tu rikendera wo?

16. Omomuano uṋe mu matu yenene okuraisira ovakambure ovakwetu mba wa mongamburiro kutja tu rikendera wo?

¹⁶ Norusuvero ve ṋanga kozombongarero zombongo. Jesus wa ṋanga ovaapostele ve mba wire momuinyo kombongarero otjomuano wokuvetunduuza. (Mat. 28:10; 1 Kor. 15:6) Momuano otjingewo ndino, eṱe matu yenene okutunduuza ovakambure ovakwetu mba wa mongamburiro okuya kozombongarero zombongo. Eṱe mape ya atu hepa okuveṋanga povikando pekepeke ngunda ave hiya yakura omaṋangero wetu. Jesus tjiri mape ya wa ri nondjoroka indu ovahongewa ve tji va yakura omaṋangero we.—Sasaneka Mateus 28:16 na Lukas 15:6.

17. Eṱe matu sokutjinda vi omukambure ngwa wa mongamburiro indu tje ya kombongarero yombongo?

¹⁷ Ve yakura okuza komutima tjiri. Jesus aa yakura ovahongewa ve nu eye kaa undju kutja owo ve ye ku ye, posi yokutja eye aa i ku wo nokuvehungirisa. (Mat. 28:18) Hapo matu tjiti vi indu omundu ngwa yaruka ombunda mongambirio tje ya pEtuwo rOmerikotameneno? Eṱe matu sokumuyakura norusuvero. Poutenga, mape ya atu ha tjiwa kutja ngatu tje vi. Eṱe matu yenene okumuraera kutja tjiri tu nondjoroka okumumuna pendje nokumupura omapuriro omengi.

18. Omomuano uṋe mu matu yenene okutunduuza ovazuvarise mba yaruka ombunda mongamburiro?

¹⁸ Ve tunduuza. Ovahongewa va Jesus mape ya aave munu kutja kamaave yenene okuzuvarisa mouye auhe. Jesus wa yanḓiparisa ovemukongorere nomambo nga: “Ami mbi ri puna eṋe omayuva aehe.” (Mat. 28:20) Hapo omambo we ngo ya vatera ovahongewa  ve? Ii. Oruveze orusupi kombunda yanao, owo va uta “okuhonga ovandu nokuzuvarisa Ombuze Ombwa.” (Oviung. 5:42) Ovazuvarise mba wa mongamburiro wina ve hapa omayanḓiparisiro otja ingo. Owo mape ya ave tira okuuta okuzuvarisa rukwao. Matu yenene okuveraera kutja kave nokuhepa okuzuvarisa aveyerike. Indu tji mave vanga okupita motjiungura tjokuzuvarisa, eṱe matu yenene okuyenda puna wo. Owo tjiri mave kara nondangi kombatero ndji matu vepe indu tji va utu okuzuvarisa ombuze ombwa rukwao. Indu tji twa raisire imba mba yaruka ombunda mongamburiro kutja tu ripurira ku wo otja ovakambure ovakwetu, owo mape ya ave utu okuungura nawa rukwao. Nu ihi tji tjita kutja ombongo aihe i kare nondjoroka.

19. Eṱe tu vanga okutjita ye, nu omena raye?

¹⁹ Hapo otjiungura tjokuzuvarisa nokukaisapo ovandu ovahongewa matji kambura orure ndu ṱapi? Nga komaandero wouye mbwi. (Mat. 28:20) Hapo matu yenene okuzuvarisa nokukaisapo ovandu ovahongewa nga komaandero wouye mbwi? Ii tu nonḓero yokutjita nao. Eṱe nonḓero tu ungurisa oruveze, omasa novimariva vyetu okupaha imba mba “toororerwa omuinyo waaruhe” poo imba womitima omiwa. (Oviung. 13:48) Indu tji matu tjiti nao tu horera ku Jesus. Eye wa tja: “Otjikurya tjandje okwo ngwi okutjita ombango yalngwi ngwe Ndji hinda, nokumana otjiungura tje.” (Joh. 4:34; 17:4) Nu wina tu nonḓero otja indjo. Eṱe matu vanga okumana otjiungura tji twa pewa. (Joh. 20:21) Nu matu vanga kutja ovandu varwe na imba mba yaruka ombunda mongamburiro, ve panḓere po motjiungura tji puna eṱe.—Mat. 24:13.

20. Otja kOvafilipi 4:13, ongwaye tji matu yenene okumana otjiungura Jesus tje tu rakiza okutjita?

²⁰ Okuṱakamisa erakiza ra Jesus katjiṋa otjipupu. Posi yokutja, eṱe katu ungura otjiungura hi atuyerike. Jesus we tu kwizikira kutja ma kara puna eṱe. Eṱe tu ungura otjiungura tji otja “ovaungure vapamwe va Ndjambi” nu “otja ovakarere va Kristus.” (1 Kor. 3:9; 2 Kor. 2:17) Kunao, matu yenene okutjiyenenisa. Tjiri ondjingonekero yapeke okukara norupa motjiungura hi, nokuvatera varwe okutjita nao wina.—Lesa Ovafilipi 4:13.