1-2. Omomiano viṋe mu matu ṱakamisa erakiza ndi ri mOmiano 4:25? Yandja otjihorera.

NGATU tare kovihorera vitatu mbi. Omukazendu omukambure omunene motjiwondo me ripura ohunga noviṋa oviwa mbya tjitwa ku ye morukapitaveze. Nandarire kutja omukazendu omukambure ngwi u muna ouzeu mehupo nai, eye u kayenda komurungu okukarera Jehova otja pu ma yenene. (1 Kor. 15:58) Eyuva arihe eye u ripura ohunga nOparadisa mu ma ka kara puna eṱunḓu re nomapanga we. Omukazendu omukambure warwe u zemburuka omuano mbwa hihamisiwa i yomukambure mombongo, posi yokutja wa tya okuhinokuripurira ko. (Kol. 3:13) Omurumendu omukambure u zemburuka ozondataiziro nḓa tjita morukapitaveze, posi yokutja u kondja pu ma yenene nai okurira omuṱakame ku Jehova.—Eps. 51:10.

² Hapo ovihorera vitatu mbi vya hitasana vi? Avehe ve zemburuka oviṋa mbya tjitwa kuwo morukapitaveze, posi yokutja kave ripurire ku vyo nomasa. Nungwari owo ve “tara osemba komurungu.”—Lesa Omiano 4:25.

3. Ongwaye tji matu ‘sokutara osemba komurungu’?

³ Ongwaye tje ri ohepero ‘okutara osemba komurungu’? Tjimuna omundu tje ha yenene okukayenda ongarate indu tji ma kara pokutara kongotwe, momuano otjingewo eṱe kamaatu karere Jehova okuura indu aruhe tji matu ripura ohunga noviṋa mbya tjitwa poo oviṋa mbi twa tjita morukapitaveze.—Luk. 9:62.

4. Matu ka hungirira kuye morupa ndwi?

⁴ Morupa ndwi, matu katara koviṋa vitatu mbi mape ya avi tjiti kutja tu ripurire koviṋa mbya tjitwa morukapitaveze. Ovyo  mbi ri: (1) okuzera oviṋa oviwa mbi twa ri navyo, (2) okukara nongore, (3) okurimuna ondjo tjinene. Morupa aruhe, matu katara komirari vyOmbeibela mbi mavi tu vatere kutja atu he ripurire ku “imbi vyokombunda” nungwari tu ripurire ku “imbi vyokomeho.”—Fil. 3:13.

5. Omuzuvarise 7:10 ri tu rakiza ohunga na i ye?

⁵ Lesa Omuzuvarise 7:10. Ezeva ndo ka ri nokuraisa kutja o navi okupura kutja, “Okutjavi omayuva woruveze orukuru tji ya ri omawa?” Okuripurira koviṋa oviwa otjiyandjewa okuza ku Jehova. Nungwari oro ra tja: “O pura kutja okutjavi omayuva woruveze orukuru tji ya ri omasemba pu inga owanambano?” Kunao, matu sokukengeza kutja atu ha sasaneke omuano mbwaatu hupu rukuru ku nomuano mbu tu hupa nai, nokumuna kutja omuano mbwaatu hupu wa ri omusemba komuano mbu tu hupa nai. Ombeibela imwe ya tja: “O pura kutja, ‘Ongwaye oviṋa tji vya ri oviwa tjinene moruveze orukuru?’ Kaunongo okupura epuriro otja indo.”

6. Ongwaye tje ri ounongo okuhinokumuna kutja ehupo retu morukapitaveze ra ri ewa pu indi? Yandja otjihorera.

⁶ Ongwaye tje ri ounongo okuhinokuripura kutja ehupo retu morukapitaveze ra ri ewa pu indi? Okuripurira koviṋa oviwa mbya tjitwa morukapitaveze ku tjita kutja atu he ripurire ku imbi ovivi. Tara kotjihorera tjOvaIsrael voruveze orukuru. Kombunda yokupita moEngipte, owo va hakahana okuzemba omuano ehupo rawo mu ra ri ezeu moEngipte. Nungwari, owo aave ripurire kovikurya oviwa mbyaa ve ri uriri. Owo va tja: “Matu zemburuka omahundju nguyatu ri uriri moEngipte, nandarire omakungu, nomatanga, nozoseu, nozonyanga, nozomongorwa.” (Num. 11:5) Posi yokutja, hapo owo aave ri “uriri” nokuhinokusuta? Kako. Ovaisrael ve tjimunine ko, owo aave tatumisiwa nokuungurisiwa otjovakarere moEngipte. (Eks. 1:13, 14; 3:6-9) Nandarire nao, owo va zemba ohunga nondatumisire ndji va munine nu aave vanga okuyaruka. Owo aave yandja ombango komayuva omawa omakuru pendje nokuripurira koviṋa oviwa Jehova mbye ve tjitira. Jehova kaa tjaterwa i yongaro yawo.—Num. 11:10.

7. Ovikwaye mbya vatera omukazendu omukambure okuhinokuzera oviṋa oviwa mbya kapita?

 ⁷ Ovikwaye mbi mavi tu vatere okuhinokuzera oviṋa oviwa mbya kapita? Tara kotjihorera tjomukazendu omukambure ngwaa vatere poBetel ya Brooklyn mombura ndji 1945. Kombunda yozombura, eye wa kupwa i yomurumendu omukambure ngwa ungura poBetel nu aveyevari va kayenda komurungu okukarera mbo ozombura ozengi. Posi yokutja, mombura ndji 1976, omurumendu we wa uta okuvera. Indu omurumendu we pe ye ma ṱe, eye we mu raera omambo omawa nge mu vatera okukayenda komurungu kombunda yonḓiro ye. Eye we mu raera kutja, “Eṱe twa ri norukupo oruwa. Ovandu ovengi kave ya rora okukara norukupo tjimuna orwetu.” Eye wina we mu tunduuza kutja, “Me tjiwa kutja komoo zembi oviṋa oviwa mbi twa tjita pamwe nungwari o ripurire ku vyo tjinene. Noruveze mo kara nawa. O pindike nokuwa momuinyo tjinene mena ra imbi mbya tjitwa kove. Kara nondjoroka kozombura ozombwa nḓu twa kara pamwe okukarera Jehova. . . . Okuzemburuka oviṋa oviwa mbya tjitwa morukapitaveze otjiyandjewa ku eṱe okuza ku Mukuru.” Inga tjiri ya ri omambo omawa.

8. Omukazendu omukambure wa muna ouwa waye mokupuratena komambo womurumendu we?

⁸ Omukazendu omukambure ngo wa puratena komambo womurumendu we. Eye wa karera Jehova nouṱakame nga tja ṱa nozombura 92. Ozombura ozonḓiṱi ngunda e hiya ṱa, eye wa tja: “Oure wozombura 63 nḓu mba karera Jehova oruveze aruhe, ami tjiri me yenene okutja mba ri nehupo ewa.” Omena ra ye? Eye wa tja: “Eṱe matu yenene okukara nehupo eṋingandu mena rokutja oweṱe orupa rweṱunḓu rovakambure. Nu tu nomaundjiro wokukahupa nga aruhe kombanda yehi mOparadisa, mu matu ke rikotamena kOmuute wetu Omunenenene, ngu ri Mukuru watjiri Jehova nga aruhe.” * Eṱe tjiri matu yenene okurihonga oviṋa ovingi okuza komukazendu omukambure ngwi ngwaa yandja ombango komakwizikiro wa Jehova.

9. Otja ku Levitikus 19:18, oruṋe tje rira ouzeu okuisira omundu ngwe tu pindikisa?

⁹ Lesa Levitikus 19:18. Povikando tjiva i rira ouzeu okuisira omundu mombongo, epanga retu, poo omuzamumwe ngwe tu hihamisa. Otjotjihorera, omukazendu omukambure wa kumininwa i yomukambure warwe kutja wa vaka ovimariva vye. Kombunda omukazendu omukambure ngwe mu kuminina wa ningira ondjesiro, posi yokutja eye wa pindikire nu kaa yenene okuhina okuripurira ko. Hapo ove wa rora okukara noumune mbo? Nandarire kutja ka twa rora okukara mongaro otjingeyo, otjingi tjetu mape ya twa rora okukara mongaro yokumuna kutja kamaatu isire omundu ngwe tu hihamisa.

10. Ovikwaye mbi mavi yenene okutuvatera indu tji tu nongore nomundu?

¹⁰ Hapo ovikwaye mbi mavi yenene okutuvatera indu tji tu nongore nomundu? Matu sokuzemburuka kutja Jehova u muna oviṋa avihe. Nandarire indu tji matu tjindwa nouhasemba. (Hebr. 4:13) Nu tji mu hihamisa indu tji matu munu omauzeu. (Jes. 63:9) Jehova we tu kwizikira kutja ma ka isapo ouhasemba auhe mbu tjitwa ku eṱe.—Omavan. 21:3, 4.

11. Ouwa waye mbu tu muna indu tji twa isire?

¹¹ Eṱe wina matu vanga okuzemburuka kutja okuisira ku tu yetera ouwa. Nu omukazendu omukambure ngo wa muna owatjiri womambo ngo. Otja oruveze tja ru kayenda eye wa yenena okuisira omukazendu omukambure ngo ngwe mu kuminina okuvaka oviṋa vye, nu wa isa okutjinda ongore. Eye wa muna kutja indu tji twa isire varwe, Jehova wina utu isira. (Mat. 6:14) Nandarire kutja aa tjiwa kutja omukazendu omukambure wa tjiti otjiṋa otjivi, eye wa yenena okumuisira. Nu mena ranao, omukazendu omukambure ngo wa ri nondjoroka nu wa yenena okuyandja ombango kokukarera Jehova.

12. 1 Johanes 3:19, 20 ma ri tu hongo tjike?

¹² Lesa 1 Johanes 3:19, 20. Atuhe povikando tu ri muna ondjo. Otjotjihorera, tjiva ve ri muna ondjo mena roviṋa mbi va tjita ngunda ave hiya tjiwa ouatjiri. Nu varwe ve rimuna ondjo kozondataiziro nḓu va tjita kombunda yombapitisimo. (Rom. 3:23) Otjingaperi kutja tu vanga okutjita imbi ovisemba. Posi yokutja, “atuhe tu tataiza moviṋa ovingi.” (Jak. 3:2; Rom. 7:21-23) Nandarire kutja povikando okurimuna ondjo katjiṋa tji tu zera, otjo otjiṋa otjiwa. Ongwaye? Mena rokutja okurimuna ondjo ku tu vatera kutja tu tjite omarundurukiro mehupo retu nokutja atu ha yarukire po okutjita ozondataiziro nḓo rukwao.—Hebr. 12:12, 13.

13. Ongwaye tji tu ha sokukayenda komurungu okurimunondjo?

¹³ Irira oupupu okurimunondjo tjinene, nandarire kutja twe ritanaura nu Jehova wetu raisira kutja wetu isira. Katjiṋa otjiwa okurimunondjo momuano mbo. (Eps. 31:10; 38:3, 4) Ongwaye tji matu tja nao? Tara kotjihorera tjomukazendu omukambure ngwe rimunu ondjo mena rouvi mbwa tjita morukapitaveze. Eye wa tja: “Ami ee munu kutja kahepero okuungura oukukutu motjiungura tja Jehova mena rokutja mape ya eha yamwa.” Otjingi tjetu mape ya tu noumune tjimuna mbo. Kunao, matu sokukengeza kutja atu he ri munu ondjo tjinene. Omena raye? Mena rokutja Satan ma kara nondjoroka tjinene indu tji twa isa okukarera Jehova nandarire kutja Jehova we tu isira.—Sasaneka 2 Ovakorinte 2:5-7, 11.

14. Matu tjiwa vi kutja Jehova u vanga okutuisira?

¹⁴ Eṱe mape ya atu ripura kutja, ‘Hapo me tjiwa vi kutja Jehova tjiri we ndji isira?’ Indu tji mo pura epuriro ndo matji raisa kutja Jehova ma yenene okukuisira. Ozombura ozengi nḓa kapita, okambo kOruhungu ka tja: “Eṱe mape ya atu u povikando ovingi mena rotjiṋa  otjivi tjaatu tjiti morukapitaveze nungwari tji tjiri otjizeu okutjesa. . . . O yumbu ohama. O munu kutja wa tjiti ouvi Jehova mbwe hi nokuyenena okukuisira. Satan u vanga kutja tu kare noumune mbo. Indu tji u nomuhihamwatima mena rotjiṋa otjivi tji wa tjiti iho tji raisa kutja ka ove omundu omuvi, nu Jehova ma yenene okukuisira. Risusuparisa, nu kayende komurungu okuningira ondjesiro ku Mukuru kutja u kare nomeritjiviro omawa womomutima nokutja o ha yarukire po rukwao okutjita ondataiziro ndjo. Tjimuna okanatje tji ke yenda ku ihe indu tji ke ri mouzeu, kainatja kutja opovikando vingapi, kunao eṱe wina matu sokukayenda komurungu okuningira ombatero ku Jehova. Nu eye me tu vatere mena rotjari tje.” *

15-16. Ongaro iṋe tjiva ndji va ri nayo indu tji va muna kutja Jehova we ve isira?

¹⁵ Ovakarere va Jehova ovengi va muna omahuhumiṋino indu tji va muna kutja Jehova we ve isira. Otjotjihorera, ozombura tjiva nḓa kapita, omurumendu omukambure wa tjaterwa i yotjihorera tjomukambure tja lesa mokambo kOruhungu. Mokambo ngo mwa ri norupa ohunga nomukazendu omukambure ngwa munu kutja Jehova kee mu suvera mena roviṋa ovivi mbya tjita. Nu aa munu nao nandarire kombunda yokupapitisiwa oure wozombura ozengi. Posi yokutja, indu tje ripurira ko oukoto kotjisuta tjonguturiro kwe mu vatera okumuna kutja Jehova we mu suvera. *

¹⁶ Otjihorera tjomukazendu omukambure tja vatera vi omurumendu omukambure ngo? Eye wa tja: “Indu tji mba ri omuṱiṱi ee tara koviperendero vya kamuzu tjinene, nu tja tjita kutja tji rire ouzeu ku ami okuhina okutara ku vyo. Nu oupe, mba tara ku vyo rukwao. Ami mba ningira ovanene vombongo okundjivatera. Nu tjiri ve ndji vatera tjinene. Owo ve ndji vatera okumuna kutja Mukuru we ndji suvera nu ma yenene okundjiisira. Posi yokutja, povikando mbi muna kutja kawami omunanḓengu nu Jehova ke nokundjiisira. Okulesa otjihorera tjomukazendu omukambure tjo kwe ndji vatera tjinene. Nai me tjiwa kutja, indu tji me munu kutja Jehova kee ndji isira ku heya kutja me tja otjisuta tjonguturiro tjOmuna we katji ya yenena okusuta  omauvi wandje. Ami mba konda orupa ndo kokutja aruhe tji me rimunu okuhinonḓengu mbi ru lese nokuripurira ko oukoto.”

17. Omomuano uṋe omuapostele Paulus ma kondja okuhina okurimuna ondjo tjinene?

¹⁷ Ovihorera otja imbyo vi tu zemburukisa ohunga nomuapostele Paulus. Ngunda e hiya rira Omukriste eye aa tjiti oviṋa ovivi tjinene. Paulus aa zemburuka oviṋa mbya tjita posi yokutja kee ripurire ku vyo tjinene. (1 Tim. 1:12-15) Eye aa vara otjisuta tjonguturiro otjotjiyandjewa ku ye okuza ku Jehova. (Gal. 2:20) Kunao, Paulus kaa yandja ombango tjinene kokurimuna ondjo nungwari aa yandja ombango kokuungurira Jehova otja pu ma yenene.

18. Morupa ndwi twe rihongo tjike?

¹⁸ Twe rihongo tjike okuza komiano vitatu mbya tamunwa morupa ndwi? (1) Okuripura ohunga noviṋa oviwa mbya tjitwa ku eṱe morukapitaveze ozondaya okuza ku Jehova. Nandarire kutja ehupo retu morukapitaveze rwa ri ewa, ehupo mouye oupe mari ririre ko ewa. (2) Varwe mape ya ave tu hihamisa posi yokutja indu tji twe ve isire maku tu vatere kutja tu yandje ombango kokukarera Jehova nai. (3) Okurimuna ondjo tjinene ku tjita kutja atu he rikotamene ku Jehova nondjoroka. Kunao, tjimuna Paulus, eṱe matu hepa okukara nongamburiro kutja Jehova we tu isira.

19. Matu tjiwa vi kutja mouye oupe ka tu nokukeripurira koviṋa ovivi mbi twa tjita?

¹⁹ Eṱe tu nomaundjiro wokukahupa nga aruhe. Nu mouye oupe eṱe ka tu nokukeripura ohunga noviṋa mbi mavi tu wisa momuinyo. Ohunga noruveze ndo Ombeibela mai tja: “Ovitjitwa vyoruveze ndwa kapita mavi zembwa.” (Jes. 65:17) Tjiva mokati ketu va kurupa, posi yokutja mouye oupe mave rire omitanda rukwao. (Job 33:25) Kunao, ngatu kondje okuhina okuzera oviṋa oviwa mbya tjitwa ku eṱe morukapitaveze. Nungwari, ngatu yandje ombango koruyaveze nokukondja pu matu yenene kutja tu ka kare mouye oupe.